Vendor Review: 帝廷酒家

當初揀帝廷都算係少少意外，老實講，落咗訂之後有少少後悔！因為當日同埋未來老爺奶奶去睇場，去到帝廷發現勁FULL，佢地好擔心好日子比人HOLD晒所以第二日即刻走返去落訂！帝廷其實都唔錯，個場夠大又有海景，但嗰陣我心儀德藝會多D，西式嘛，樓底又夠高，仲有好多shortlist咗嘅酒店都未睇，突然咁倉促就confirm咗，有少少無奈。。。到而家擺完酒，我先發現錯有錯著，其實呢個決定係啱嘅！

陳經理同公關陶小姐都好helpful，基本上係有問必答，上親去飲茶都會免茶，送糖水，泊車飛，識做！婚前三個月自動打嚟提我地準備相做DVD，印帖，印帖話要一個月，最後個幾星期就起貨！婚紗相DVD效果唔錯，唔算好老土（相比起個成長片段，我覺得佢嘅效果好好多！）簽名布都幾靚，不過細咗少少唔係好夠位簽名！最衰係Seating plan冇softcopy提供，得hardcopy要自己scan咗再用photoshop加枱號！

帝廷都算幾flexible，本來講咗當日四點半先交場，但我個DECO負責人話怕砌唔切個backdrop要早啲到（慢工出細貨！），兩點幾已經比佢開始setup！佢地又比我地預早兩日放嘢上去，仲揾個員工幫我地手去停車場拎嘢！個場本身好四正好好排位，就算我擺三十圍都唔覺迫，我將Photo corner同Candy corner搬咗出𨋢口，場入面鬆動D又唔會阻住reception，基本上佢地任你點set都得，只要之前講定比佢地知就會自己攪掂！當日招呼好週到，貼身個waitress當然醒目啦，成日比水我飲，幫我拉裙尾，搬櫈，我有件晚裝背脊低咗少少有時會露girdle邊，佢好醒一見到即刻提我，又連我第一件晚裝唔記得著綱紗都見到，提我著返，夠晒專業！

價錢唔講，但嘢食水準唔錯，我自己未去過帝廷飲，之前聽講嘢食唔得，只係食個view，唯有安慰自己：”擺親酒都實有人彈啦，就算幾貴幾好食招呼幾好都實會有人唔滿意！“啱啱結婚前兩個月有朋友喺荃灣帝廷擺酒，OMG。。。D嘢食真係唔多掂，隻豬係凍嘅！招呼又唔好，成晚趕收工咁，碟菜啱啱先開始食就即刻幫你分晒佢然後收碟！好彩北京道一號呢間唔係咁，好多親戚朋友都讚招呼同食物有水準！所以貴D都係值嘅！！