玉琪 BLOG: 禧琪新居♡籌備

顯示具有 禧琪新居♡籌備 標籤的文章。顯示所有文章

2012年9月11日星期二

買床單+紅酒杯

新居入伙梗係要買定幾套靚靚床單看門口啦！之前已經買咗兩套質地靚嘅1100針天絲，Casablanca留返結婚做龍鳳披，Hallmark個款麻麻地平時替換，呢套超級無靚仔嘅阿JACK自然成為新屋第一套新床單嘅首選啦！雖然佢得330針純綿，質地無得fright，不過個樣win晒！床單枕袋加埋被笠承惠$760（折咗喇！），好貴呢。。。

我地張床褥係54" x 75"，但厚度有12"，一般床單都係FOR大約8“厚嘅床褥，如果買返54” x 75“就會唔夠大笠唔晒張床褥，每邊都爭咗4“！唯有買King size 72" x 80"，左右兩邊會有5“位多咗，多咗咪攝入床褥底囉，好過唔夠大嘛！Casablanca嗰套14"床褥都用到（但唔係條條LINE都得），Hallmark有花嘅都係FOR 8“，要淨色先FOR 12”，所以我地買咗嗰套Hallmark都應該都唔啱用！下次買床單記得問清楚幾厚床褥用到呀！！

買完床單上咗SOGO九樓，咁啱有家品嘢做緊展銷，沙煲冷撐乜都有，D嘢好似都幾抵，不過好多我地都已經買定晒，所以淨係買咗套RCR紅酒杯，made in Italy，一套6隻都係兩舊水！抵到吖！！（D聲仲好清脆添！）

本來想買埋枕頭，不過冇咩靈感，百幾蚊至成千蚊都有，都唔知有乜分別！見到Casablanca有個香薫枕百幾蚊好似幾抵，又軟淋淋！有冇好介紹呢？？

2012年8月28日星期二

買大門, 冷氣, 梳化, 餐枱

大門

爭持咗好耐買唔買大門，舊嗰度門本身都幾新同實淨，但因為上手業主裝多咗個老虎鎖，拆咗就會有D樣衰，但係換大門連安裝要四五千蚊，我覺得好唔抵囉！！點知師父以為我地已經決定咗換，鋪磚時据爛咗個門腳，就係咁，唔使諗，唯有換啦！！

去返歐洲木業睇，我地喺佢度買咗房門同廁所門，服務唔錯，價錢都算平！顏色冇得揀，因為屋苑規定要用返呢隻紅櫸木，我地揀咗隻貴少少嘅款（隻色已經咁衰冇理由仲揀D老土款啫！），連埋門框門線門鉸，開埋門鉸，埋單＄3350，屈佢免費送貨（本來要加＄50），不過唔送上樓！普通D嘅款二千幾蚊都有，算啦！都唔爭在！！

冷氣洗衣機

買電器上price.com.hk check 價錢好方便，有晒唔同牌子型號，價錢，鋪頭名，聯絡方法，價錢比一般電器鋪平少少，由幾百至千幾不等！我要買嘅嘢唔多，只有一部3/4匹窗口式冷氣，一部2匹窗口式分體，同洗衣機，問過幾間電器鋪同連鎖店，冷氣安裝費間間都唔同，特別係窗口式分體，由千幾至二千蚊都有！有D仲要收$100睇位費（落單可以退返），窗口機平D二百五至三百，洗衣機就會包埋安裝！揾咗以下三間都幾平可以參考吓：

1. 新一代電器 - 價錢最平，送貨加$100，上網訂購，無門市，貨到付款，如果買洗衣機雪櫃電視嗰D可以考慮，但冷氣機要安裝就好似有間鋪有埋師父會穏陣D！

2. 百誠 - 門市喺太子，幾十年老字號，比較老實穏陣，以前細妹幫襯佢買晒全屋電氣，價錢比其他電器鋪較平，但我打去個女仔聽電話，問佢咩型號價錢都唔係好知，叫我留電話覆我又冇覆！咁冇誠信點叫百誠？？本來諗住直接去佢鋪頭問，但最後去咗優質倉冇去到lu！

3. 優質倉 - 淨機（未計送貨安裝）價錢最平，應該算係直銷嗰類，開頭無乜信心，只係見佢價錢平諗住睇吓冇蝕抵！旺角新填地街有成層showroom，serve我地個姨姨都幾pro，唔同牌子型號甚至屋苑都好熟！即場報價價錢可能爭少少（之前電話問百誠都係），但你話返佢知price.com個價佢會平返比你！

優質倉旺角陳列室 - 旺角新填地街470號海島中心22樓全層
優質倉屯門陳列室 - 屯門屯喜路2號栢麗廣場 2618室

廳會裝窗口式分體，因為比起窗口機靜D慳電D靚D（靚D係重點！），比普通分體機安裝維修都方便D，唔使撘棚，喺原本窗口機個位伸個散熱出去就得，再封返塊玻璃，攪掂！但窗分牌子選擇唔多，有飛哥，樂聲，開利，樂信，美的，珍寶，金章！大金同日立都冇，最後揀咗珍寶，專做冷氣好似穏陣D，電器鋪都多數推介佢！

General珍寶ASWX18FAT 2匹窗口式分體 - $6740+1600安裝=$8340（免費送貨，免$160做塊玻璃封返住個窗）
1151269_l

主人房嘅窗口機本來想揀日立，但日立濶咗半寸唔夠位裝，激死！所以揀埋珍寶！細房嗰部唔換住，慳返少少！
General珍寶AK712FNR 3/4匹窗口機 - $2130+250安裝=$2380（免費送貨）

買兩件貨品仲有嘢送添！送咗個電子測脂磅，哈哈！啱晒我！！

仲有洗衣機未買，因為我想買百朗1000轉 7KG嗰部已經唔出，新款貴D又冇delay timer，唔抵咗！姨姨介紹呢隻Bloomberg世邦歐洲牌子，聽都未過，要再做吓功課先！灰色好型呀！！

梳化

我地買咗樓之後第一樣睇中嘅嘢就係呢張灰色絨布L型梳化，一直對佢念念不忘，每次去襯E-MAX都會探吓佢，點知．．．新歡突然出現，我地仲毫不猶豫一致決定要變心迎接新歡！

新歡出場！喺DSC見到呢張灰色布藝梳化，坐落去感覺脹卜卜好舒服，背靠又高D睇電視唔使昂高條頸，重點：價錢平一半有多！又係唔買對唔住自己！！坐三兩年換過張都抵啦！

餐枱

我對餐枱嘅要求好簡單，款式簡單唔使雕花，唔要圓枱長方型枱，方方地方便打麻雀嘛！唔要玻璃唔好咁大張，因為我太輪盡，成日撞襯會好危險！呢張黑色磨沙唔怕手指模唔怕刮花，又可以開大好方便！重點：又係價錢平！！買埋張梳化九折再九折，折咗之後唔使二千蚊！抵！！姨姨仲送咗兩張＄100 cash coupon，遲D買吸塵機可以用！

而家D傢俬電器都買得七七八八，係爭D家品嘢可以入咗伙先慢慢加，希望裝修順順利利快D攪掂啦！！

2012年8月21日星期二

深圳傢俱建材之旅最終回 - 買電視櫃﹠門鎖﹠燈

本來唔使咁快又上大陸買嘢，因為未買嗰D嘢都係差唔多最後先要用，不過為咗個電視櫃，我地喺香港揾咗好多地方都揾唔到啱size嘅，因為standard多數係60"濶，我地個位只有54"放唔落。。。其實之前已經喺「家之福」睇中咗，但因為我地個TV wall嘅制位全部喺右邊，但電視櫃背面嘅空隙位喺左邊，驚就唔到D插蘇電線位要將個櫃擺出D唔貼牆，咁行出行入就會見到個電視櫃同幅牆之間有條"喇"，所以早D上深圳睇清楚，唔啱就要喺香港訂造，好貴吖！！

電視櫃

呢個係原先睇中嗰個可伸縮電視櫃，黑白色鋼琴面，前面有灰鏡，上次報價RMB680，撞鬼今次報RMB800！我估佢上次報錯價，因為姐姐企硬唔肯再減！不過呢個右邊條“喇”位太窄，電制位唔夠過。。。但係又好中意，點算！！？

另一款普通D，都係可以伸縮，黑白色鋼琴面不過冇咗灰鏡，RMB600，平兩舊喎！抵！！睇佢個櫃同面板中間條“喇”幾濶，呢個應該OK！就買佢啦！可以免費裝埋，不過運費會貴少少，因為裝好咗會大件D，裝好運費RMB190，散件運費RMB130，送埋上樓，算啦！差幾十蚊都係裝埋，費事送到落嚟裝唔掂！計埋運費都唔使一千蚊港紙，抵到吖！！
康迪斯（家之福中心店B105）

呢個上次睇過啦！同我地買嗰個差唔多款不過貴好多，RMB880，阿姐話運費要RMB300，仲話冇收貴喎，間間都要！唔係化，厄我細路女唔識嘢！！？

歐尚家具（家之福中心店C098）﹣ 黑店！！

買完電視櫃之後就轉戰「五方家居」買燈！因為「家之福」同「家樂居」呢邊好少款又唔靚，望兩眼都冇咩興趣！臨走前我仲專登走去衛浴公司八掛吓，見到我上次喺「家合居」買咗嗰個洗手盆櫃同鏡櫃，開價RMB2100咋！蝕咗五舊水！！有人話：「咪抵死吖，叫咗你唔好睇唔好問啦，你就死都要問！自己攞嚟嘅！！」不過見佢display出嚟嘅料同手工都真係差D，咁一分錢一分貨，靚D就梗係貴D啦！！（唯有咁樣安慰自己囉。。。）

燈

經過幾次尋燈之旅我已經鎖定咗目標，最後決定買最平嗰幾盞！咁啱啫，我都好少會揀中最平嘅嘢，今次真係咁啱得咁橋上次喺「五方家居」睇到嗰幾款燈又平又中意！價錢平咗又唔使四圍騰，抵晒！！

我始終都係鍾情球型嘅燈，呢盞仲要係磨沙玻璃，透光好靚，又加分！RMB520只包普通燈膽，慳電膽RMB15／個，LED RMB30／個，我地要LED，五個頭即係RMB150，total RMB670，講價講到RMB600成交！除咗呢間仲有一間喺「家樂居」有賣呢款燈，普通膽六百幾蚊，慳電膽都要七百幾蚊，我買得平D！！不過有人話大陸D LED好渣，算啦咁鬼平！用住先，真係壞咗先換囉！盞燈冇現貨要第二日先有，反正咁大咁重我地都拎唔到，就叫電視櫃個運輸幫手送埋，加多十蚊兩舊水攪掂！希望送到嚟唔好有花有問題啦！！

永鑫燈飾（五方家居三樓C018）

兩盞房燈喺同一間買，檸檬燈開價RMB285，鳥巢吊燈RMB380，轉慳電膽11watt同13watt分別係RMB12同RMB15，總數RMB731，講價後RMB680埋單！

宏陽燈飾（五方家居二樓C001）﹣ 兩個哥哥又nice又靚仔，試燈好鬼快手！

兩盞燈都幾大箱，不過好輕，自己拎都冇問題！

房門鎖

買完燈已經六點幾啦，渣渣淋買埋門鎖就走人，之前睇過幾十蚊人仔就有交易，點知唔覺意比我睇到隻靚嘢！太空鋁！！從實用角度去睇，叔叔話呢D實心鋁靚過普通嗰D不銹鋼好多，唔會氧化生銹，我唔識嘢唔知真係假，不過模上手好光滑手感好GOOD！從外觀上睇，梗係呢隻靚好多啦！銀白色磨沙FEEL我中意呀！！

呢款手柄同個鎖係分開嘅，兩個正方型幾特別，不過如果裝得唔正就好樣衰！呢個牌子全線都係雙鎖舌（即係喺門側邊會睇到有兩個鎖位）價錢會貴D，最平嗰間都要RMB150！

另一個牌子有單鎖舌，價錢平D，RMB110！之前喺「家之福」見到都要RMB120，咁即係都平咗吖！為咗靚D開心D，明明幾十蚊買到嘅嘢又要用double價錢買，唉。。。

自己又做埋D衰嘢 ﹣ 買完之後先周圍去格價！事實又再一次証明我買貴咗嘢！！淘寶都有KUB太空鋁門鎖賣，呢款就係我買咗嗰款，淘寶價RMB85，不過計埋運費都唔係平好多，又冇得試冇得check，算啦！當冇見過！！

深圳傢俱建材之旅終於完成喇！真係鬆一口氣！本來要買埋電制面板，不過師父仲未數比我，又有D位可能要改，所以今次買唔到！聞說旺角都有平貨買，又要再做吓功課先！！

2012年8月13日星期一

血拼上海街砵蘭街 (買門, 浴屏, 坐廁, 電子鎖, 水龍頭花洒)

星期六行咗成日上海街，砵蘭街，收穫好豐富吖！因為之前已經行咗幾轉，睇定晒我地要買嘅嘢，所以今次可以一次過掃晒咁多樣！出晒血呀！！

房門廁所門

行咗幾間專賣門嘅鋪頭，「泰華」，「和富」價錢貴DD鋪面靚DD，「加洲木業」平DD，細妹兩年前幫襯呢間，而家D門已經開始黃，都預咗白色門會易黃，不過冇諗住咁快，唔知關唔關佢地D木／油事，「寶龍」感覺好大陸好cheap，最後幫襯咗「歐洲木業」，比佢個PKG吸引咗，但原來最後埋單唔係嗰個價！算啦，可能size大咗，就算去第二間買都係貴D啦！最緊要有我中意嘅款嘛！呢個款好似少見D，第二間都唔覺眼！

PKG係＄980／套，包＄580嘅白色油漆空心門，4"實木門框，1.5"實木封口線（雙面），哥哥話佢地D門都上三層油會襟D（唔知第二間上幾層呢！？）我揀咗個款係＄780，所以要補多＄200，SIZE大咗又要加＄200-300，開埋門鉸＄100／個（佢地工廠用電腦開會靚D，師父用手界當然冇咁靚啦！），三度門共六個即係加多＄600，運費＄50，送上樓加多＄300，買埋門鉸＄25一對，共三對（平過大陸買！）加加埋埋＄5260三度門，都幾貴！！

歐洲木業
上海街728號地鋪
Tel: 2919 6233

浴屏 Sunrise vs DDShower

我地個浴屏大約係27“ x 45”，共72"，想做雙趟門，入口會寬敞D（唔會比個手柄頂住），同埋方便清潔，單趟門點都會有個重疊位清潔唔到！
心水當然係兩隻最出名最穏陣嘅牌子Sunrise同DDShower啦！之前上網睇人話Sunrise防水做得好D，路軌唔會有積水彈水，點知我地去到就見到有兩個嬸嬸投訴緊，話啱啱裝完發現路軌彈水好利害！我地又見display出嚟嘅嘢都好差，膠邊黑忟忟又做得唔貼，趟埋之後會彈返開，塊玻璃仲搖搖吓就冧咁！雖然話係display啫，但都唔係咁離譜嘛！睇完之後完全冇信心買囉！不過我地唔係喺專門店睇，可能係間鋪嘅問題掛。。。

Sunrise 72“ 無框（話無框，但上面都係會有條通，有D樣衰！）雙趟門10MM強化玻璃，折咗＄4800；有框雙趟門8MM強化玻璃，折咗＄4300

相反DDShower就企理好多，D display耐不耐都會換吓，好新淨！上網comment話DDShower鋼水好D，佢D手柄嘅款都靚好多，有光身，拉絲，磨沙，我揀咗拉絲紋唔怕有指模嘛！如果無框款上面都係會有塊平嘅玻璃，好易積水同污糟嘢，所以揀咗呢個頂吊路軌（灰鏡面）款，好靚吖！

DDShower (DS808) 72“ 頂吊路軌雙趟門10MM強化玻璃，折咗＄4480（八折）

SUNRISE SHOWER（旭輝衛浴）
灣仔駱克道212-220號洛洋閣地下9-11號鋪
樺柏行建材有限公司
旺角砵蘭街319號地下／旺角上海街708C地下

DDShower
旺角上海街707-709號地鋪／旺角上海街692號地鋪

Samsung電子鎖 SHS-6020 vs SHS-5230

一直我都係諗住買6020，因為個款slim D銀色靚仔D襯我間屋多D，我又唔係特別中意篤手指又唔覺得特別型，無謂無啦啦比多D錢吖！問過晒最平＄2800，加＄500安裝，即係＄3300，當然係行貨啦！5230指紋鎖貴二千，即係＄5300！

Blogger小妹介紹買水貨（其實YAHOO都有不過始終驚驚地，都唔知係水貨定山寨貨！），見呢間話晒有間鋪就去睇吓啦，原來佢係賣磚嘅，仲好鬼平，雖然少款但有D仲平過大陸！！D鎖只係放喺度寄賣，賣鎖嘅人就係個裝鎖師父，師父係呢間鋪頭老闆嘅朋友，所以免費比佢喺度寄賣，有咩事都係個師父自己跟返！開單淨係寫低資料同價錢，一毫子都唔使比，師父上嚟裝好鎖攪掂晒先比錢！6020賣＄2400（比行貨平＄900），5230賣＄2900（比行貨平＄2400），包安裝，一年保養，由於師奶心態作祟，5230好似抵好多，平咁多唔買真係對唔住自己！所以最後揀咗佢！！

SHS-6020 銀色好CYBER呀！

SHS-5230 大舊D黑忟忟，插隻手指入去就開到門！（唔知隔離屋行過會唔會手痕篤吓呢！？）

旺角弼街28號恆通廣場一樓30-32鋪
關生 6481 5613

坐廁

咁多樣嘢最唔想買就係個屎塔！！因為我地大廈結構問題，個坐廁要係地咀，即係地出去水，高咀低咀自由咀都唔啱用！行暈成個旺角都係得Roca同Kohler兩個牌子各有一個型號啱用，Roca個款勁老土又唔係幾好坐，我中意方型板濶D坐得舒服D，呢款係偏細又唔夠高！Kohler個款靚少少高少少，但塊板超級窄，坐幾秒都覺得“銀”大脾！仲要貴D喎！所以唯有揀返Roca，＄1790加＄200油壓板，咁啱做緊八折，加埋＄150送上樓，埋單＄1742，雖然好平，但真係好唔想比！！

合興隆磁磚潔具公司
旺角砵蘭街310-312號地下

水龍頭花洒

睇中咗好耐啦！Grohe係最出名嘅水龍頭牌子，電度靚又襟用，made in Germany，咁啱見到呢套Grohe Eurosmart系列嘅一套三件裝，開關制係向下嘅孤型（我唔LIEK方型或者有lone嗰D！），流線型得嚟又夠簡單，手感超GOOD！個水龍頭係少少向外斜，唔怕太貼個洗手盆！重點：價錢勁優惠！！＄1988 唔買又係對唔住自己！！

聯興行
旺角上海行682號地下

嚟緊呢個星期六上多轉大陸買燈，電視櫃，電制，房門鎖，咁北上嘅行程就完結喇！跟住就要買傢俬電器沙煲冷罉，真係買到窮呀！！

2012年8月10日星期五

買電視 - Sony vs Samsung

繼床褥之後，我地喺收樓前仲買定咗多樣嘢 - 電視！

因為我地個TV wall好窄，夾咗喺兩度門中間，所以最大只能買46”，間屋唔係大都OK夠睇啦！其實我地冇咩要求，又唔打機，只係煲吓劇睇吓戲，不過想要3D，睇戲好似過癮D嘛！入選牌子有Samsung同Sony，大牌子質素有保證！我覺得Samsung款靚仔D，又可以直接插個hard disc錄影，慳返唔使買機頂盒，但原來呢個內置錄影功能係唔可以睇緊一個台錄另一個台，因為電視入面得一個tuner，咁我都睇緊啦，仲錄嚟做乜！？好白痴喎！！好似話LG同唔知邊隻韓國牌子先可以睇一個台錄另一個台，咁。。。唔考慮啦！仲有，同一個price range，Sony嘅panel係高一個grade嘅，Samsung要去到7系先有Sony panel個質素，咁價錢又會貴一截啦！所以最後決定買SONY 46NX720！！

水晶面無邊設計，型！仲要平到你唔信！點解咁平？？因為係舊款囉！所謂嘅舊款講緊都係上年先出，一年就話係舊款，科技呢D嘢真係呢。。。新款嗰隻HX850基本上同呢隻係一樣，主要分別係新款日本裝嵌，舊款馬來西亞裝嵌，但係零件同panel係一模一樣！咁。。。我唔覺得有乜分別囉！價錢係$18,XXX vs $11,XXX！仲未計贈品喎！！

朋友仔介紹喺AVLife買平D，我地先去百老匯睇款聽講解，千奇咪去豐X，完全零招呼，D sales乜都唔識乜都唔知，問乜都答你唔到！仲唔只一間係咁！！百老匯招呼好好多，D staff又helpful又唔hard sell！HSBC有16X回贈，因為每星期最多只可以回贈HKD200，佢地會開張單比你，每星期拎住張receipt去任何一間分店嘅cashier比一次錢，分四星期攪掂，最高回贈到$800！（大集團係唔同D！）AVLife最多只可以分兩張單，即係回贈$400，但佢地賣價平D，扣埋回贈都仲平五舊幾水！

百老匯：$11,980-$800回贈=$11,180
AVLife：$11,000-$400回贈=$10,600（-$580）

**額外送多2副3D眼鏡，合共4副
**送$1,000超市禮券
**送HDMI線及屏幕清潔套裝價值$198
**送全套原裝Harry Porter Blue ray碟

咁多嘢送真係抵到爛！！另外我地仲加咗$1,200換購Sony S590 Blue ray碟機（原價$1,780），仲有個offer係加$1,600換PS3，不過我地唔打機就無謂啦！

仲有個保養問題，因為我地未裝修，預計十月先入伙，保養係由購買日期起計算，咁咪白白蝕咗兩個月保養！？你知電子產品呢D好難講啦，差嗰兩個月話壞就壞嘛！有見及此，AVLife講明安排送貨之後確認冇問題，可以叫佢地開過張當時嘅發票比你登記保養，GOOD！

同場加映 - 鋁合金活動電視褂牆架，購自鴨寮街，承惠五舊水！咁坐喺飯廳食飯打牌都可以睇電視啦！爽！！（原裝嘅又貴又冇得郁！）

2012年8月6日星期一

深圳傢俱建材之旅3 -「五方家居」+「家合居」買磚﹠洗手盆櫃

「五方家居」

今日師父開工拆嘢做裝修，所以早兩日我地就拿拿聲返大陸訂磚，免得拖慢個進度嘛！由於上兩次都冇去到太寧路嘅「五方家居廣場」，所以今次第一站就係打的去咗呢度睇燈先，然後再戰「家合居」訂磚！羅湖打的去「五方家居」都係廿幾蚊，快靚正！

「五方家居」有三層，賣嘅嘢同「家合居」好相似，但呢度多D傢俬鋪同現成傢俬賣，我有兩個朋友仔都喺呢度訂造傢俬，兩個用埋同一間，有個得有個唔係好得，所以安全起見我都係決定喺香港造！

尚藝空間（五方家居二層D區023號）
1. 4.5'油壓床＋2X床頭櫃
2. 房TV櫃
3. 曲尺書台連吊櫃
4.飯廳長矮櫃
5.客廳TV櫃
朋友仔早幾個月幫襯呢間，五樣嘢連安裝運費只係RMB14,000，真係超抵！但博唔博得過就見仁見智啦！

同「家合居」相比，我覺得「家合居」D人主動，helpful同nice好多，呢度D人好似HEA D咁，個商場又靜英英冇咩人行，所以我地行咗陣都冇咩心機行，主力係睇吓燈，其他嘢應該都唔會幫襯呢樹！

亞加力膠片壁燈＠MIKESI（五方家居二樓C區009號）﹣ RMB480（呢間嘢開價都唔平，唔抵！）
呢盞壁燈有D似曾相識，好似喺香港D boutique見過！

自由扭扭燈for飯廳
左邊慳電膽 x 6 ＠MIKESI（五方家居二樓C區009號）﹣ RMB820
右邊LED膽 x 10 ＠MIKESI（五方家居二樓C區009號）﹣ RMB1570
呢兩盞都可以自由扭曲調較角度，好似懶特別咁，不過如果本身冇乜藝術天份可能會扭得好樣衰！

玻璃葉葉燈for飯廳
永鑫燈飾（五方家居三樓C018）﹣ RMB520
呢盞係我嘅新歡！我比較中意球狀嘅燈，其實類似嘅款有好多，有圓膠片，葉形膠片，鋁片等等，呢款磨沙玻璃片都係第一次見，通透度高D，睇落SHARP好多！但放咁多塊玻璃喺飯廳好似有D危險！

吊吊鳥巢燈for主人房
宏陽燈飾（五方家居二樓C001號）﹣ RMB380
原先諗住主人房用吸頂燈，因為整咗地台怕加埋吊燈會好有壓迫感，但呢款鳥巢吊燈又好似幾特別，如果有埋LED就仲正！

LEMON燈for細房
宏陽燈飾（五方家居二樓C001號）﹣ RMB285
之前揀咗款LED米奇燈都覺得幾靚，又啱小朋友用，點知見到呢盞仲中意！係我最愛嘅黃色呀！！

「家合居」

睇完燈行返出正門，向左手邊一路直行，行到咁上下就會見到田貝站，再繼續直行，好快去到四貝四路「家合居」啦！！

我地今次一到步就去馬可波羅磁磚，因為呢間係名牌，多香港人幫襯，上次嚟過姐姐勁nice & helpful，所以第一時間揾返佢先！過程出乎意料地好順利，價都唔使點講，因為今次報價仲平過之前，所以我地就喺呢間買冇再行第二間啦！

廳房地磚 - 姐姐推介名牌馬可波羅磚，RMB78，包埋運費送落香港！雖然係中國名牌，但真係好貴呢！我budget係RMB30咋！最後都係揀咗另一款佛山磚24" x 24" RMB28，抵！

廁所特色牆 - 呢度都有我地之前睇中咗嘅方型粒粒磚，之前問價12" x 12" RMB8-12，而家姐姐一開價就話RMB7，價都唔使講！
廁所牆磚 - 左邊嗰隻啡色牆磚之前問過價12" x 24" RMB16-18，而家RMB13.5，又平咗！
廁所地磚 - 同啡色廁所牆磚同一系列，揀咗隻深灰做廁所地磚12" x 12" RMB7

我地買晒成屋地磚+廁所牆磚地磚都係四千幾蚊人仔，運費兩噸（連埋洗手盆柜鏡柜）HKD1,100，total只係6千幾蚊HKD，我計過如果喺香港買最平都要萬幾蚊！朋友仔啱啱裝修完，間屋大我地少少，香港買國貨磚都買咗兩萬幾！！我仲叫佢送埋掃口粉（填縫劑），廿幾蚊包，送咗兩包灰色廳用，一包白色廁所用，仲有地腳線1開7，只收磚錢，唔洗加工費添！

諗起個洗手盆櫃就頭痕！原來我地個廁所都幾深，減咗個45寸浴屏，仲有4尺位放個洗手盆櫃！大唔係問題，貴係問題吖嘛！我地又唔想用枱上盆，咁就要訂造洗手盆個尺寸，普通瓷造嗰D係冇得訂造尺寸嘅，要用人造晶石先得！（個名就好聽，不過唔知實質係乜！）喺香港問過做到4尺要HKD5400，唔包送貨，未計鏡櫃添喎！

呢個款好靚好特別呀！可惜只有3尺，RMB2300包落到地（寶興潔具 - 家合居A2043）

睇咗幾間之後最後都係揀返呢個，貪佢夠大嘛！雖然個款唔算好特別，但整體感覺幾好，個三面鏡櫃又靚又實用！佢display嗰個1米濶（40"），RMB2800包落到底，講價後平咗兩舊RMB2600，我再R佢加濶2"到42"，高度又加高2"，鏡櫃又由70cm加高到80cm，全部唔使加錢！為起港紙三千幾蚊，喺香港夠買個鏡櫃咋！（粵寶建材 - 家合居A2050）

其實喺寶安北路「家樂居」造洗手盆櫃會平好多，三尺櫃千幾蚊有一套，不過嗰邊D鋪頭感覺up dup D，款同用料又好似差D，所以横掂喺呢邊買開磚，就喺呢度造埋洗手盆櫃啦！因為要就埋個洗手盆櫃一次過送落香港（平D嘛），所以要十日後先安排送貨！我地買完磚，佢就幫我地安排運輪，間嘢叫”東成”，話老細同佢地好熟喎！公價HKD250/噸，上樓另加HKD300，運費到貨先比司機，因為司機都係香港人！我地買完洗手盆櫃，比埋鋪頭張咭片磚鋪，佢地就會自動波幫我地湊埋一次過送貨落香港，出貨前會打電話比我地CFM，一日未出貨我地都可以改日子，收貨先比埋RMB尾數，勁方便！