Mona Lisa 收相

今日啱啱收到相．比預期快咗一個月喎！原先話要五個月，而家剛剛四個月就收到啦！冇咩驚喜不過都唔差啦！

一張大油畫，我地加錢updrage咗做20" x 30"，大幅D係靚D嘅（比咗八舊水點都要安慰吓自己嘛！）
一個5" x 7"相架
一個8" x 10"相架
一本8" x 12"珍珠面相簿（19相張）
一隻CDR（含29相張）
另加一張”李克勤”4R相

我地揀咗黑色珍珠面，襯埋呢張相勁有FEEL，比預期中靚！

其實喺Mona Lia影相都預咗係行貨，我地嗰時都係一心諗住當練習啫！
紫色呢套衫個妝化得好衰，馬灣公園又唔靚又冇嘢影，所以揀得好少相同埋都係遠景！

呢張覺得有D台灣FEEL，唔似香港Style


同攝影師溝通時已經講明唔要扮cute扮可愛，唔要做埋D低能白痴動作，點知到影嗰時又係出晒嚟囉！真係O晒咀！根本就係個個影親都千篇一律咁抄落去．．．呢張係其中一張，不過包包話佢個表情好真，咁就比佢要一張咁大把啦．．．

呢張其實都低能，不過有阿Jack喺度就唔同啦！

轉返室內景，成個妝同造型都正常返，件婚紗又靚呢！

好中意呢張單人，一個字 - 型！

呢張有個倒影好特別呀！揀相時有諗過做油畫，不過怕會CUT咗個頭所以最後冇揀到！

呢個紅色background都好靚吖！

我覺得呢個攝影師影室內唔錯，好多燈光效果都做到，係個人串D囉！好似呢張咁，影到個FEEL幾浪漫呀！

Mona Lisa 揀相

影完相第二日晨早就去返珀麗灣揀相，我諗住一張相都唔加，因為仲有一輯去台灣影，已經out budget好多！我好了解自己嘅自sell症同包包對錢嘅疏爽，所以一早已經叫定細妹陪我去揀相，以防有不愉快事件發生 - 出血過多！

我地兩個拍攝景點／造型總共影咗145張相，好似好多咁喎！外景嗰part大部份都影得唔靚，妝唔靚，景唔靚，燈光角度唔靚，post唔靚！睇到一半突然hang機，叫返個姐姐埋嚟攪攪部電腦，點知佢嚇咗一跳，因為我好兇狠地delete淨51張相，我諗佢都估到我地唔會加相，我仲諗住未必揀到28張添呀！好彩後面室內嗰D正常返，最後啱啱好揀夠！

我地個pkg係冇排版嘅，所以有D相落相簿會cut咗一部份，唔係張張夠位放，有幾張好中意但都落唔到相簿，因為會cut咗個頭／面，灰咗！唯有keep softcopy算啦！Pkg包嘅油畫係20" x 24"，同相簿有同樣問題，就係會cut咗一大忽！所以包包想upgrade做原尺寸20" x 30"大油畫，承惠$800！　

本來已經準備埋單，點知包包突然話要加多張相，就係呢張喇！你地又知唔知點解呢！？

Mona Lisa揀相呢part真係麻麻地，D電腦又舊又慢，成日hang機，個mon解像度唔夠高睇到矇查查，D眼耳口鼻時大時細，又冇得zoom大，咁點睇到D detail位呢！？揀油畫嗰張時真係斷估咋，喺mon度睇個人咁細粒，都唔知放大咗係咩樣！

Pre-wedding＠Mona Lisa之後記

上星期六2/4終於完成咗第一輯嘅pre-wedding@Mona Lia喇！星期日仲揀埋相添！

我地約咗2:00pm，去到等咗半個鐘先開始化妝，等嘅時候好多準新娘同準新郎化好妝行嚟行去，原來好多人喺度影相呢！

化妝師叫Angela，拍攝前一日佢打比我confirm日期時間，仲提我要帶ｄ乜，因為佢廣東話唔正所以我認得佢把聲！佢個人好nice，好有經驗，喺Mona Lisa做咗三年幾，佢好有心機同我化，淨係化妝都用咗成2個鐘，可惜我要嘅嘢佢比唔到我！我話要化得隻眼大D圓D，因為我個樣成日都好似好唔精神咁，佢好大反應咁話 "哦！原來你想要日本好誇張嗰D呀！？" 咁又唔使好誇張，大少少得喇．．．但佢就係咁畫長條眼線，假眼睫毛又係勁長，痴雙眼皮膠紙痴到個眼型好怪！佢話畫得對眼長D會sweet D喎，但我唔係要sweet而係要大眼呀！到差唔多完成，我望吓塊鏡，我覺得自己個樣好怪，對眼唔夠圓唔對稱（呢個係本身問題，但應該可以好D），有D鳳眼，睇落好惡！我就同佢講唔得，佢話同我剪短D假眼睫毛睇吓會唔會好D，說時遲那時快手起剪落，咁就剪咗喇！嚇得我吖，幾驚佢剪埋我真嗰D呀！之後再執咗少少，其實都係唔滿意，不過見攪咗咁耐，佢人又OK又大住個肚，勉強收貨啦！

Set頭時多咗個女仔幫手，勁快就set好，可能因為影相多數影唔到後面，所以後面都係求其整！我覺得兩個頭都set得唔錯，我本身係短髮，加咗假髮都幾自然又冇兩截色！GOOD！

唔知點解佢地幫我改條裙改到超窄！連呼吸都有D困難，影外景時又坐又訓草地勁辛苦！

我覺得婚紗個頭靚D，上面係個亂亂地嘅高髻，加咗嬪辮圍住，但比個頭飾遮住咗！我本身唔想揀呢種圍邊嘅款，好似好行咁，不過其他嗰D又唔靚！

到見攝影師Ivan同攝助阿Tom，兩個睇落都好smart喎！Ivan問我中意影邊邊面多D，我簽佢化妝姐姐叫我影右邊因為廋D，但我平時影慣左邊因為眼大D！點知佢一句 "而家我係攝影師由我決定！" 頂！咁你又問我！明玩嘢啫！！我明白好多攝影師都有D藝術家脾氣，但唔係冇嘢揾嘢嚟串囉！如果平時我一定會出聲，但由於輯相仲未影，為咗唔影響拍攝過程同效果，我唯有忍咗佢啦！溝通時我話唔要cute唔要低能，Ivan話OK，即係督住塊面own鼻扭耳仔嗰D動作全部唔要啦，正確！點知到影嗰時乜都出齊晒！咁之前溝通嚟做乜？問嚟做乜傾嚟做乜？佢話點影就點影，影乜就影乜啦！

相反，攝助Tom就非常nice，全程滿面笑容，又幫我地拎嘢，又問我地辛唔辛苦，行上行落都提我地小心D，幾體貼呀！

我地成五點先開始影外景馬灣公園，好快太陽都落山了！越影越大風越凍，感覺出嚟效果應該麻麻．．．到影室內，都幾多唔同background同顏色，Ivan好似認真咗D，一個post/角度試影幾次，影到D燈光效果滿意為止，最後影到差唔多9點先收工，見佢咁有誠意咁專業算啦！反正都冇辦法！

Pre-wedding＠Mona Lisa之準備

嚟緊呢個星期六2/4就影第一輯Pre-wedding喇！原本以為會好緊張，點知又冇喎，仲乜鬼都冇準備添！呢輯係喺HK Mona Lisa影，要準備嘅嘢應該冇去台灣咁多啦，啱啱揾咗少少資料，check check仲爭D乜先！

新娘篇：
1. 婚紗鞋 - 借咗細妹嘅，包包會幫我拎去
2. 晚裝鞋 - 買咗（好靚的！），自己帶
3. 波鞋 (唔洗成日著住高踭鞋) - 唔使啦，著慣咗
4. 拖鞋 (海灘用) - 唔使啦，我地都唔影海灘
5. Girdle / Nu Bra / 乳貼 - 約咗今晚去GLC試／買
6. 束腰褲 / 白色打底褲 - 本身嗰條褲仔好似太短，或者今晚買過條
7. 脫毛 - underarm用咗laser，手腳唔需要
8. Cream / Lotion (For Body/Hand) - 會帶
9. 防曬 - 如果好天帶支spray去
10. 落妝液, 護膚品, 化妝品 (落妝後用) - 會帶
11. 橡筋 / 夾 / hair gel (方便走時唔好披頭散髮) - 會帶
12. 乾粉撲,濕粉撲 - Mona Lisa提供
13. 假眼睫毛 - Mona Lisa提供，不過都會帶定自己嗰D
14. 頭花, 飾物 - 冇準備喎！Mona Lisa提供
15. 毛毛披肩 / 外套 - 帶件大件D同輕身D，方便著出去影相
16. Contact lens + 眼藥水 - 尋日free trial拎咗color con
17. 帽 / 太陽眼鏡 (For唔化妝出街遮黑眼圈) - 或者帶副平光眼鏡
18. 搽手甲腳甲 / 整Gel甲 - 未搽，諗緊gel好gel好
19. 修眉 - 過兩日先自己修
20. Facial - 未做。。。

注意事項：   穿白色或淺色打底褲以防走光
拍攝前至少一星期要勤做facial及有充足睡眠（我冇囉，現在已經太遲。。。）
拍攝之前2天需先修眉（到時先蚊就會紅咗唔靚）
拍攝前一晚睡前唔好飲太多水
不要吃煎炸同辛辣的食物

新郎篇：
1. 禮服白恤衫 / 顏色恤衫 - 喺VA借咗2件，包包自己帶去
2. Casual恤衫 + 牛仔褲 - 我地呢輯冇包影casual wear，要咪用著去嗰套囉
3. Silm d嘅西褲 - Mona Lisa提供
4. 白襪, 黑襪 - 買晒！包包自己帶
5. 白鞋, 黑鞋 - 買晒！包包自己帶
6. 拖鞋 (海灘用) - 唔使啦，我地都唔影海灘
7. 外套 - 著去嗰件得啦
8. 髮泥 - 包包自己帶
9. 鬚刨 - 唔使啦，剃咗先出門口
10. 無鏡片眼鏡框 + Contact lens - 到時唔會戴眼鏡影，尋日已經叫包包開始唔好帶眼鏡，怕會有眼鏡印，佢得百幾度冇問題

注意事項：   穿白色內褲
刮清鬍鬚
修鼻毛

其他雜項：
1. 食物 - 食咗早餐先去，兩點到
2. 水連飲管 - 到時買
3. 絲花花球 / 襟花 - 借咗細妹個絲花花球，自己個Jack Jack留返去台灣先用
4. 結婚公仔 - 未買
5. 紙巾 / 濕紙巾 - 平時都有帶出街
6. 膠布 - 平時都有帶出街
7. 蚊怕水 - no need
8. 雨傘 - 落雨先拎，應該好天嘅！
9. 毛巾 - 包包帶
10. 防水既大袋 - no need
11. 氣球 - no need
12. 同吹泡泡機 - no need
13. 相機 - 包包帶
14. Package Copy - 會帶
15. Job reference - 已save喺iPhone

Mona Lisa 揀衫／試衫

Mona Lisa個網上揀衫系統都幾friend，慳番D時間唔使去到先揀，不過D相好多都影得唔係太清楚／完整，婚紗好多款，晚裝就麻麻。。。我揀咗13件婚紗＋7件晚裝，晚裝真係唔多揀得落手，都係是但揀幾件唔同色試吓咋。。。上星期六去咗試衫喇，最後試咗12件婚紗＋6件晚裝，即係婚紗晚裝各有1件冇得試，應該係比人揀咗啦！幫我換衫個姐姐勁快手，一個鐘頭內已經試晒咁多件，簡直係摩打手呀！！因為有個比我更冇耐性嘅朋友仔陪我去，咁高效率啱晒！！

大露背so sexy！不過呢件冇得試呀！

前短後幾型！不過影outdoor先襯，大心型胸唔得咗！

Halter-neck款我中意！但呢件上身同下身唔係好襯！


呢件好特別呀！亦都好難著得好睇！我覺得我著得幾好睇喎！


宮廷＋公主款，唔啱我喎！


貝殼胸like呀！裙身有幾層，入面係lace出面係紗加立體碎花，好特別！不過長腳蟹著得好肥！我著得仲好睇！


有我中意嘅開心黃呀！但呢件係大長金style，即係肥囉！

呢件靚D呀！佢d catalog好多相都係著住呢件影呢！


簡單得嚟又型又高貴！啱我！可惜晚裝係影outdoor，呢件太grand喇！


Cutting唔錯，著得瘦呀！顏色就麻麻地like，好似老咗少少！

估吓我最終揀咗邊件吖！？？

個姐姐仲拎多咗2件婚紗同2件晚裝比我試添呀！係for Big Day外租嘅，佢地做緊半價promotion，如果啱款都幾平呀！

1婚紗 + 1晚裝／男禮／伴郎禮服／媽媽衫／伴娘禮服 - $2,444（原價$4,888）
1婚紗 + 2晚裝／男禮／伴郎禮服／媽媽衫／伴娘禮服 - $2,744（原價$5,488）
1婚紗 + 3晚裝／男禮／伴郎禮服／媽媽衫／伴娘禮服 - $2,994（原價$5,988）

呢兩件都有Swarovski石，兩件我都覺得好型好中意呀！可惜我已經join咗租晚裝pkg呢。。。

Mona Lisa Bridal Salon 蒙娜麗莎

自從喺婚紗展join咗Four Seasons影pre-wedding之後就成日囉囉戀，因為上網睇返D comments好似好差咁，好多都話佢服務差影得又唔靚，越睇越驚，唯有希望自己好彩D，冇人地講得咁衰啦！

見酒席嗰度送咗張Mona Lisa嘅coupon，我就問包包好唔好喺HK影多輯當practice，希望有一次經驗下次會表現得好D，就算Four Seasons真係d人講得咁差，我地都唔使on居居比人蝦嘛！於是1／1我地無無聊聊冇嘢做就去咗SOGO上面間Mona Lisa，上去之前我仲同包包講 “今日一毫子都唔可以比！！” 最後，當然又係我自sell症發作，然後包包又好乖咁自動比錢啦！

張coupon本身乜鬼都唔包，得十幾張散裝相唔包相簿，兩套婚紗唔包晚裝，男禮又唔包，租兩套都千幾蚊喎！我地本身諗住如果影得靚到時先考慮加錢upgrade，影得唔靚咪由得佢囉，反正當練習啫！點知原來只用coupon唔upgrade嘅話，拍攝時間只限於星期一至五，咁包包咪要特登請假返HK？？而且排期已經排到8月，但我地4月去台灣影喎！咁點當practice呀！？所以諗諗下，加三千幾蚊包埋相簿，油畫，晚裝，男禮，好似都幾抵吖！又可以揀星期六日影，sales姐姐仲話最快2／4就影得喇！最多到時我堅持唔加相唔比錢upgrade，帶埋幾個朋友仔去撳住我唔好比人sell到，咁就冇問題啦！所以最後咪join咗囉！

Coupon內容：
拍攝40款選12相片不連影像
婚紗2款
頭飾連髮型2款，新娘及新郎化妝各1次
多款名貴飾物配襯

4" x 5"相紙 - 12
5" x 7"相紙 - 1
8" x 10"相紙 - 1

Upgrade pkg內容：
8" x 12"相紙19相簿**珍珠封面 - 1
20" x 24"油畫連木框 - 1（原套餐內16" x 20"）
5" x 7"相架 - 1
8" x 10"相架 - 1
數碼影像檔案 - 28

包假眼睫毛，乾濕粉卜，電腦效果
男禮轉公司系列2套
婚紗影相系列**珀麗灣室內拍攝
晚裝可選馬灣公園或沙灘
除油畫外其他為絨面相紙
相簿不包coating及排版設計

原本sales姐姐Jennifer offer比我個pkg係22張softcopy，佢話pkg本身應該得19張，佢已經比多咗3張我，點知我一返屋企上網就發現可以有28張，蝕咗！激屎人喇！蘇州過後冇艇撘，點算！？好彩blogger YanYuen好好咁比咗佢個單number我，我第日即刻打電話比Jennifer AR返！佢真係有問我攞人地個單number check，check完之後先比返28張我，仲叫我唔好同人講添，抵返！