花車公仔到手啦！！

望穿秋水，等咗5個月，我對結婚公仔終於到手啦！！ 9月嗰時喺eBay買咗對公仔，要託朋友喺美國收貨再寄返香港，之後有朋友自動請纓幫手同佢地造衫，朋友去深水埗買料都買咗五百幾蚊，好貴呢！！攪來攪去攪咗5個月，真係等到我頸到長埋呀！！

睇吓佢地未變身前個樣先，阿Jack本身咁型仔，又著埋西裝，所以應該唔使點整都得～

Sally就麻煩D，著住件乞衣衫又唔靚女，見到都頭痕吖！我個朋友仔好鬼有心思，我話乜要求都冇淨係要靚就得，佢就整咗好多我冇expect嘅嘢，出嚟效果好靚好滿意呀！！

登登登登。。。金童玉女出場！！

阿Jack加咗頂禮帽，成套西裝都加咗bling bling閃片，即刻sharp醒晒！！
Sally直頭係大脫變啦，醜小鴨變天鵝，乞衣女變小公主，wakakaa！！

嚟個close up先，bow tie加咗藍色蝴蝶，連襟花都有！！

Bling bling禮帽～

阿Jack有禮帽，Sally當然都要襯返個皇冠同頭紗啦！因為Sally前額冇頭髮，加咗頭紗之前好似光頭咁，好醜樣！朋友仔諗到幫佢加條珠鏈做頭箍，靚咗好多！

Sally D bling bling accessories好勁呀！耳環，頸鏈，皇冠，仲有bling bling eyelashes添呀！不得了！！有冇睇到佢痴咗假眼捷毛！？

裙身LACE底仲釘埋石同銹咗少少黃色花，雖然唔太顯眼，手工亦非專業，但真係誠意撘夠！！！

仲有，我最愛嘅黃色花球，襯晒我嘅theme color呀！！！

Overall手工唔係話好好，因為朋友仔都係自己玩玩吓整過一次，絕非專業，但真係好buy佢嘅心思！成件成品都好靚好中意呀！啱晒我心水！嘿嘿！！
之後仲叫包包用鐵線將佢地整埋喺個花車蝴蝶度，不過我梗係覺得唔係好穩陣咁，到時開開吓車跌咗就真係大吉利是呀！！

結婚花車 Confirmed＠1999

花車呢PART一直都係拖拖拖。。。雖然唔算係咩大item，要攪其實好快，但點解拖咁耐呢？最初好想好想租古典勞斯萊斯，佢同伯大尼簡直係絕配！再加一件超大拖尾婚紗，就係my dream wedding嘅原素啦！

諗就係咁諗啫，但一諗埋個價錢就覺得係奢侈敗家之舉！（雖然包包一見到就舉腳讚成！）問過幾間租車公司，租5個鐘最平都要六七千蚊，如果指定灰色仲要加多二千添！！租得就梗係揀灰色啦，型d grand d嘛，金色好娘紫色又唔靚！不過成九千蚊租架車坐幾個鐘，因為呢樣嘢我已經比好多朋友同事話無謂多餘on居晒錢浪費唔值。。。九千蚊差唔多夠買部iMac可以用幾年啦！於是我就單方面決定取消呢個item，求其租返架Benz算啦，三四千蚊包埋VAN，實惠好多喎！

後來又喺blogger度得知有架黄色波子可以出租做花車，我最愛嘅黃色呀！！可惜13年嘅schedule仲未confirm，等咗四五個月佢都冇覆我，算啦！我唔中意等，無緣！！

早兩日放假就捉咗包包去睇車，冇咩特別，淨係中意個車牌 - 1999！9字係我嘅lucky number，長長久久，幾有意思吖！

BENZ S500L鳳眼加長版 + 24座小巴 - $3700／8小時
包司機，公仔佈置（鬆弛熊或自備），油費
不包停車場費，隧道費，橋費


小巴得一款冇得揀，我冇咩所謂！車牌轉埋1999加＄200，唔轉啦！慳得就慳！！


長長久久1999專業租車公司
郭先生
Tel: 9162 9901/ 6067 1999
E-mail: wa1999kwok@yahoo.com.hk
地址: 太子白楊街近鴨寮街21-29號美景大厦1樓E室

花車公仔 - 揾到喇!!

由於要呢排忙住攪裝修，有關結婚嘅嘢已經全面停工個半月，但啱啱有個好興奮嘅消息點都要分享吓！就係終於揾到我心愛嘅花車公仔喇！真係開心到暈！

本來諗住放棄喇，因為香港揾唔到，好耐之前喺ebay見到有，但當時未諗定用咩花車，又有人反對我揀嘅公仔，所以十五十六遲遲都未決定買，早排自己心血來潮掛住佢地，想買時先發現佢地唔見晒！本來反轉個ebay都係得兩三個seller有，點知突然間冇晒！幾失望呀！！後來過咗一排佢地又出現返，唯一一個seller有齊兩個，但佢唔肯送香港，只送美國或加大拿，我托個朋友仔幫我bid咗送去佢美國朋友度再寄返香港，佢乜都幫我安排晒，我只需要等貨到香港約佢出嚟pick up，收貨先比錢，呵呵！快靚正！真係唔該晒！！寄到返嚟仲要帶佢地去造衫，可能都有排攪！希望可以順順利利完成啦！好期待呀！！！

至於係咩公仔呢。。。secret!!!