Gown Hunting之最終回@Ballroom, Elegance

今日又去尖沙咀尋找我嘅The One，本來約咗三間，Ballroom, Time For Elegance, Heanna Bridal，不過最後冇去到Heanna，因為已經confirm咗其中一間啦！

Ballroom
尖沙咀嘉連威老道77-79號開麟中心二十樓全層
Tel: 2312 2023

Ballroom一向都係穏陣之選，我有幾個朋友仔都喺呢度租，佢地款唔算好多，但勝在service好，婚紗料靚手工好！
我試咗呢件魚尾款，裙尾幾特別，主要係紗再間咗幾行lace，望落幾有層次（但呢張相完全睇唔到囉，失敗！），前面同pat pat位D lace都好靚，清得嚟又唔會太dry，如果唔要條白腰帶改做排石會sharp好多，免費包埋換！

佢地有我中意嘅立體花花款，冇影相蝕咗！胸前D花花同lace襯得好靚好fancy，背面係綁帶所以腰位cutting好修，直身紗款唔使用鋼紗，GOOD！反而個中拖尾dry咗少少，不過佢地話可以加多少少花上去，overall成條裙都係靚，但太fancy太sweet好似唔係好襯我！

單租一件婚紗$3880，兩件就可以用PKG upgrade，即係$6980，佢仲比埋張Expo嘅$500coupon比我可以減$500！

Time For Elegance
尖沙咀金巴利道地鋪73號B
尖沙咀金巴利街1B恒港中心12樓全層
Tel: 2576 1208

呢間好多婚紗款，大拖尾，魚尾，A Line，vintage，Vera Wang嗰類歐美款都有，要誇有誇，要plain有plain，非常多元化，而且質地同cutting都好好！今日serve我個妹妹好pro，佢拎咗幾件紗款比我睇，件件都好啱我心水，每show一件佢都會介紹件衫嘅特點！到第三件時包包突然醒咗，佢個表情話我地知佢叮叮叮，個妹妹拎住件超大拖尾嘅閃閃lace婚紗，好elegant，好grand！入面係少少魚尾款，個魚尾位做得高D，外面加咗層紗所以望落好似A Line咁，背部仲係see through lace添！呢件教堂行禮超GOOD！！佢呢度嘅紗料係我睇過咁多間中最靚，軟熟得嚟又夠挺，仲好滑添呀！而且夠輕，呢件幾層仲要係大拖尾，但著起都覺得好輕鬆舒服，行完禮出去影外景都唔怕辛苦麻煩！

另一件又係mermaid，大心型胸（唔係我著吖嘛！？失禮街坊！）上身係娟面，pat pat位係lace，裙尾係紗，三樣夾埋好特別，本身我好抗拒絹面，不過呢件咁樣襯埋又好OK喎！個大心型胸可以加塊lace上去變款，後面又係少少see through lace，正！

其實仲有幾件我都想試，一件係vintage小拖尾，不過包包唔中意（佢一定要中至大拖尾！）另一件都係lace+紗，前面有兩層，清得嚟又唔會好dry！仲有一件竟然同我台灣影pre-wedding嗰件有90%以上相似！立體碎花大拖尾my favorite！！不過冇理由著過影相到BIG DAY又著返啫．．．

試完之後包包個心已經confirm咗係呢度，佢仲話要租兩件！其實一開始我都想要兩件婚紗，不過攪結婚用咗咁多錢，好多嘢都over budget，仲要攪裝修，又要供樓，全部都係錢呀！我要做個慳家好老婆唔再亂使錢，所以諗住租一件算啦！影相已經著過咁多次，最中意嘅款都著過晒，仲咁貪心咁貪靚做乜！！點知包包堅持要兩件，佢話要我靚靚中意同開心，我真係覺得自己好幸福呀！包包對我咁好咁鍚我，我以後真係要乖D唔好再激佢！（聽住先啦！）

Gown Hunting@L.S. Wedding, Novia Wedding

距離大婚仲有九個月，我仲未揾到The ONE呀！早幾日心血來潮放咗工喺觀塘睇婚紗，唔知係咪地區問題，尖沙咀同觀塘D質素真係好大分別，睇咗兩間都麻麻。。。

L.S.Wedding 婚享
觀塘巧明街115號柏秀中心6樓A室
Tel: 23458098

間鋪都幾大幾多款，我去嗰日咁啱得一個改衫姨姨（姨姨都好nice同helpful），所以我淨係睇咗款冇試到，揀咗兩件覺得OK，睇吓會唔會遲D再約去試（應該都唔會！）

下面呢件成件都好閃好多釘工，珠珠花花閃石乜都有！但D珠珠閃石一睇就覺得係大大粒膠珠唔係石，同埋too much囉！裙尾D立體花花就幾靚，加埋少少閃石幾sharp！不過條裙勁重，重到我差D拎唔起，姨姨話有五層紗，點解要造咁多層呢！？呢件係剛剛新造起仲未出過街，單租都要三千幾，唔值囉！！

另一條mermaid款，全條都係閃閃lace，冇咩特別，$1888，拖尾加$500，都係唔值！

Novia Wedding 花嫁社
觀塘巧明街115號柏秀中心15字樓B室
Tel: 36199122

另一間係Novia Wedding，我上佢地website book trial，好快已經有人打返比我，又有e-mail confirm，感覺幾交帶！點知上到去，間嘢黑忟忟，又冇相簿睇要自己逐件揭，D婚紗勁少款又舊，求其揀咗一件試，cutting唔得質地唔得．．．唔係講笑，一個字 - 差！

揀唔到婚紗就睇吓晚裝啦，都係八掛吓啫！晚裝好似多D款同顏色，見到我最中意嘅開心黃，唔啱都試吓啦！D料同手工都係唔得，胸前D羽毛甩甩地毛，腰間大排石一睇就覺係cheap嘢，釘工又唔得！

失敗 + 失望！明天再戰尖沙咀！！

費加洛婚禮 - 終於收相喇！

真係等到頸都長！費加洛星期一話D相攪掂寄得，星期二應該已到香港，點知好衰唔衰速遞公司架車壞咗送唔到！（都唔知係咪個速遞哥哥耍我！！）尋日屋企又冇人得閒等佢嚟，所以拖到今日先收到！本身話八點送，點知又等到十點幾，攪到人地鬼死咁心急！！！

算！收到D相開心返晒！！

有D後悔揀咗呢張做油畫．．．因為Mona Lisa嗰幅係婚紗，所以想要幅晚裝，又要老英格蘭景，呢張一定唔係最中意，但乎合以上要求，點知晒咗出嚟效果未如理想，唔夠sharp又冇FEEL！錯晒！！


白色摩天輪好靚呀！仲幫我晒埋相入埋相，每幅相底面各一張，細心到呢！！

相架係透明亞加力膠襯咗條灰色邊，好靚吖！

相簿封面design麻麻，我想要白色，因為Mona Lisa係黑色，呢款算係最正常，其他嗰幾款仲"娘"！！不過冇緊要啦，張相靚咪得囉！

Thank you card有三款，仲要印埋我地個名！讚！！

十萬個多謝費加洛婚禮！！！

費加洛婚禮 - 美編OK!!

台灣輯pre-wedding終於攪掂啦！前前後後都攪咗兩個月，費加洛婚禮嘅回覆，執相，美編（排版）各樣效率都算快，係我地自己覆得慢啫！因為包包weekend先返HK，所以次次都要等幾日佢返嚟過目先confirm到！

4/10-11  台中影相
4/24       第一次修相完成
5/10       共6次修相OK（每次佢地都係一至兩日就執好返嚟，因為我地麻煩，每次改DD改完又改又隔幾日先覆所以先攪咁耐）
5/15       揀相
- 30"油畫 x 1
- 10“相架 x 2
- 謝咭 x 3
- 簽名布 x 1
- 摩天輪相架 x 6
- 掌中本 x 3（每本20張，三本不同相，我一本，媽咪一本，未來奶奶一本）
- 大相簿封面 x 1    
5/24      第一次美編完成（比預計早咗一日添！）
6/7        共三次美編OK（都係兩三日就攪掂！）
6/18      相簿製作完成 ﹣ 期待收相！！！

由DAY 1到台灣影相至今，樣樣嘢都好滿意（出發前嗰D搖言誤會就唔好提啦！）總之就成個pre-wedding旅程同拍攝效果都好滿意！佢地嘅排版都唔錯，當然都有部份唔得同攪笑，但起碼唔會好"娘"或者大陸FEEL先，去相啦！！

我中意佢地呢種將幾張相merge埋一齊嘅手法，唔會一個個框框咁老土！

將兩塊草地合二為一，勁！（可能好易整，不過對一個電腦白痴嚟講已經好犀利！）

加幾個bubble清清地已OK，唔好攪咁多嘢唔該！

Puzzle圖案都OK吖！幾sweet幾開心呀！！

右邊係兩張單人相拼埋，一個字 - 型！

呢張都唔錯，將background幅相dim咗，望落好舒服！

張相影得靚點擺都係靚！Wakakaa....

張相打横都可以變打直，又一勁！

睇完D OK嘅又睇吓D攪笑嘅先！
有好多張都係毛神神加咗D無厘頭字，好似呢張咁，仲有嗰兩隻蝴蝶見到都唔開胃．．．執走晒即刻順眼返，不過唔知點解佢執走埋個太陽（而家先睇到添！）仲有要提吓個相框 - 讚！

D字唔知有乜關係，對戒指又唔係我地嘅，全部唔要！！！執走晒之後得返D閃星星，靚晒！！

兩張細相duplicate咗，個音符同五線譜又唔襯！換過張相，靚晒！

L-O-V-E！娘爆！！不過個心心相框好靚吖！

突然諗起N年前黎明首歌．．．Su...su...sugar in the marmalade，真係想打爆佢！仲要襯埋D咁嘅花！！

呢兩張係最攪笑嘅，因為我地揀得少相（真係越講越後悔，越諗越心痛），少不免會有兩張單丁咗，佢就求其揾個位塞落去就算，會唔會敷衍咗D呢！？不過佢地都好好，我要求佢抽返張相出嚟另外開多一版，佢地又OK喎，話晒印多版成本都高D嘛！

其實我自己中意一版一張相，無排版仲靚！

Last嗰張係就係求其咗D，不過算啦，佢地肯加多頁比我都算係咁啦！

呢個鴨屎綠色真係好鬼礙眼！我又唔知配咩色先好睇，佢地有改過隻色比我不過都係唔襯，算！放棄唔改！

今日下午收到e-mail話相簿已經製作完成，confirm地址就可以寄出！Yeah！！好期待收相呀！！！
快遞公司仲text話我知運費幾錢，真係細心！！

CASABLANCA邁向20週年慶 - 大減價

CASABLANCA專門店做緊大減價呀！呢個牌子D床上用品嘢質地一向好OK，朋友仔都有買開，咁啱見佢做緊20週年慶大減價，我地當然唔執輸，為新居入伙做定準備啦！



我地買咗呢套1100針雙面全天絲系列嘅床笠，枕袋連被，承惠$999！係就係貴咗D，不過真係滑不留手，飛身插落床都唔拍刮親呀！
有幾款平DD，＄788-888，不過係單面唔係雙面！單面即係一面係絲另一面係綿，冇咁滑同有機會起毛頭囉！差少少都唔爭在，梗係買套貴D好D啦！

另外仲買咗張大豆盧薈四季披，$299，天然D喎！其實唔知有乜好，淨係覺得好軟熟，夠啦！

買滿一千蚊仲有睡衣送，我揀咗件銀灰色，都幾靚吖！

婚禮進度表 - 倒數9個月

唔覺唔覺就倒數9個月喇！呢幾個月進度唔錯吖！因為仲有好多時間，所以之後應該都係慢慢hea住嚟攪！有D唔願攪嘅items都係繼續唔願攪，攪唔攪都得嘅DIY嘢都係未開始攪，嚟緊又要攪裝修攪搬屋，真係有排攪有排煩啦！

Yuki & Kenneth's Wedding Ceremony - 16 Mar 2013 (Sat)
進度表 - 16 June 2012 (倒數九個月)

註冊 & 婚宴
出門地點：	嫲嫲屋企
註冊地點：	伯大尼
婚宴場地：	北京道一號帝廷
結婚戒指：	六福, 已取
証婚律師：	岑漢和律師
結婚証書套：	律師提供
戒指枕：	律師提供
羽毛筆：	律師提供
場地佈置：	帝廷 + DIY
音樂：	TBC
MC：	Handsome + 車
回禮小禮物：	未必整
結婚蛋糕：	帝廷送8磅
席前飲品小食：	帝廷提供
紅白酒 & 烈酒：	已買5箱紅酒，白酒烈酒未買
Reception - 座位表：	TBC
Reception - 簽名布：	板橋費加洛婚禮提供
Reception - 簽名筆：	淘寶
Reception - Welcome Board：	Hei Hei Wedding
Table Card：	TBC
啤牌：	未買
兄弟姊妹團
伴郎：	Davis
伴娘：	Kelly
兄弟團名單：	Handsome, Bon, Ming, James, Vincent
姊妹團名單：	車, Avis, C, Phoebe, Ning
兄弟姊妹聚會：	TBC
禮服
新娘 - 裙褂：	褂皇@錦發
新娘 - 婚紗：	TBC
新娘 - 晚裝：	Perfection x 3 (已hold)
新娘 - 褂鞋：	未買
新娘 - 婚紗鞋：	未買
新娘 - 晚裝鞋：	已買@Topicks
新郎 - 禮服：	VA x 3
新郎 - 恤衫：	VA x 3
新郎 - 皮鞋(黑+白)：	已買@Jusco + 荷里活
媽咪衫(褂+晚裝)：	玲瓏 x 2 (已hold)
奶奶衫(褂+晚裝)：	TBC
伴娘裙：	TBC
姊妹裙：	TBC
兄弟bow tie：	TBC
頭飾：	Perfection & Gipsy提供
Girdle：	已買girdle & nu bra@GLC
MUA
新娘化妝 & 造型：	Gipsy
媽咪, 奶奶化妝：	Gipsy's team
伴娘化妝：	Gipsy's team
姊妹化妝：	自己攪掂
禮儀
過大禮日期：	2013-2-21 (擇日)
過大禮用品：	TBC
妝禮金：	TBC
西式喜餅：	已買160張＠美心
中式喜餅：	已買52張＠奇華
龍鳳被 & 床單：	未買
金器/ 嫁妝：	TBC
囍字貼 & 對聯：	未買
男女家上頭時間：	2013-3-15晚
男女家上頭用品：	未買
男女家上頭睡衣：	未買
老公老婆拖鞋：	未買
好命公：	未來外父
好命婆：	My lovely mama
接新娘 - 綵球：	未買
接新娘 - 遊戲道具：	TBC
接新娘 - 愛的宣言：	TBC
接新娘 - 開門利是：	TBC
敬茶 - 茶具：	媽咪珍藏 + 未來姑奶’s
敬茶 - 紙杯：	未買
敬茶 - 紅棗蓮子：	未買
敬茶 - 跪墊：	未買
出門 - 紅傘：	未買
出門 - 米&紅豆：	未買
回門乳豬：	帝廷提供
利是：	TBC
囍帖
囍帖：	帝廷提供
信封：	帝廷提供
封口貼紙：	TBC
回禮利是：	TBC
婚照 & 攝錄
當日攝影攝錄：	Luster Angle
成長片段 / 早拍晚播：	Luster Angle
Pre-wedding by MonaLiza：	2月已拍，7月取相
Pre-wedding by Figaro：	4月己拍，待收相
其他
鮮花球：	未買
絲花球：	Jack Jack + Phoebe’s
主禮人襟花：	未買
兄弟襟花：	未買
姊妹手花：	未買
主花車：	TBC
24座van：	TBC
花車公仔：	未必買
花車佈置：	TBC
兄弟姊妹分工表：	TBC
工作人員Contact list：	TBC
賓客名單：	TBC
Rundown：	TBC
Check list：	TBC

失驚無神租褂皇@錦發

我本身對裙褂冇乜研究亦冇乜要求，只係覺得一定要著住嚟出門，一來係傳統，二來一生人只會著一次（婚紗都會著幾次啦！），結婚嗰日唔著就一世都冇機會著啦！雖然呢個係must have item，但又唔代表一定要貴喎！阿未來奶奶話要去冠南華租，我係唔識嘢，但都知冠南華係好嘢，仲係貴嘢添！我覺得係差唔多嘅嘢，點解要比多咁多錢呢！？所以我已經單方面決定一定一定唔會去冠南華租褂，睇吓八掛吓都OK！比錢就Noway！！我要求好簡單，度度都有啦！

1. 一定要傳統褂唔要潮褂，著潮褂不如唔好著！
2. 唔好太紅，我覺得咁紅好似好"娘"咁（純粹個人意見）
3. 要平腳款唔要波浪腳，傳統D嘛

本來都冇打算咁早去租褂，咁啱去開太子睇媽媽衫咪順道帶媽咪去八掛吓囉！由太子行去旺角，第一站打算去美華，原來執咗！再行到去朗豪坊過D嘅錦發，叔叔比咗幾本相簿我睇，件件都係咁嘅樣有咩分別呢！？？R晒頭！！嬸嬸問我中意D咩款，我點知喎．．．淨係話唔要紅卜卜嗰D，佢就話由中五褔睇起啦！佢一拎出嚟我已經唔中意，我覺得紅得滯唔靚！不過拎咗出嚟冇理由唔試啫，咪著吓囉，相都冇影添！中五褔$688平到我唔信！

嬸嬸話咁你要試D"行"D喎！咩叫"行"D呢？！多D金銀線貴氣D咪"行"D囉！哦．．．

呢件就係"行"D嘅大五褔啦！我覺得都OK吖，幾順眼，不過又冇咩特別咁囉，件件都係咁上下啦！呢件係"金龍彩鳳"褂后，$1188，褂后！？唔係大五褔咩？？原來褂后即係大五褔，唔該晒，學到嘢！！但隻鳳明明係綠色，點解叫彩鳳呢！！？之前喺婚展見過鴻運繡莊褂后要三千幾蚊！有冇差咁遠呀！！

試完嬸嬸見我都係麻麻地，就叫我試埋件褂皇，咁褂皇即係乜褔呢？嬸嬸冇答我！
嘩！呢件嘢一著上身覺得好厚好硬，嬸嬸話因為全部都係金銀線，繡得密所以係會硬D，好似機械人咁！但我又覺得好靚好順眼喎，有D古代大家閨秀FEEL！雖然成件褂都好淺色（好似好白咁），但其實睇落都幾sharp！我覺得好特別吖！Um...不過係咪大件咗少少呢？有冇細D size定係咁鬆鬆地著先啱？？嬸嬸話呢件已經係加細碼最細，唔係化！我平時著細至中碼喎，莫非呢個係鬼婆size！？但裙褂係中國傳統嘢嚟噃！！

著褂露腳指好攪笑！

我諗諗吓都係擔心太淺色影相唔好睇，可能都係紅返少少會sharp D精神D，又問嬸嬸有冇其他選擇，有冇頭先件褂后同呢件褂皇嘅中間，佢就摷咗呢件"金龍金鳳"出嚟，呢件同頭先件"金龍彩鳳"係同款，不過隻鳳唔係綠色係金色，我覺得金色靚好多sharp好多！都係貴一百蚊咋！勁優惠！！

媽咪覺得呢件好睇D，但我諗咗一陣，又想再試多次褂皇，左睇右睇我都好似係中意褂皇多D，比褂后貴五百蚊，都唔係好貴吖！Within budget！只係擔心影相出嚟唔夠sharp，同埋咁重著住敬茶又會唔會好辛苦好唔方便呢？選擇困難症又發作！我望住塊鏡猶豫之際，包包同我講："中意邊件就租啦！"　我望吓佢，我知喇！我係中意褂皇的！因為我著住件褂皇時有種好幸福嘅感覺，仲唔拾得除添！！原來著褂仲開心過著婚紗呀！大愛！！！

跟住包包就比錢啦，我地好似都冇諗過要再去第二度睇，OK啦！錦發咁出名，嬸嬸nice又好笑容，件褂皇又咁鬼靚，最緊要價錢OK嘛！雖然冇比折頭，但就送咗件睡衣，落訂都好隨意！媽咪話要買返個紅D嘅花球，驚到時影相唔夠sharp喎，OKOK！佢話買乜就買乜啦！！

好期待Big Day嗰日可以成套著上身呀！！

媽媽衫@玲曨

哈哈！尋日KO咗媽媽衫啦！之前一直覺得媽媽衫奶奶衫好難攪，因為我媽媽奶奶都係懶後生又貪靚，但始終佢地年紀都唔細加上我媽媽又比較 "大隻"，好難著D好simple好fashion既衫，但佢又唔中意D好誇張好閃或者好媽媽奶奶FEEL嗰D，所以一直都好頭痕唔知點攪好！尋日媽咪無啦啦自己話想去睇吓D晚裝，難得佢咁有興緻，我梗係樂意奉陪啦！我既planning係第一轉先去金都，可以一次過試多幾間嘛，但一定唔會喺金都租，黑店多嘛！等媽咪試到咁上下，有個idea自己中意咩色咩款，之後再轉戰尖沙咀！

點知我地睇到第二間就confirm咗啦！原來佢之前已經同阿姨周圍睇過，所以都知出面個market大概有D咩款，好快就揀到心水啦！My lovely mama 真係為我著想，我又可以煩少樣！

呢件桃紅加黑色晚裝我覺得勁型！（我pre-wedding喺老英格蘭影夜景嗰件都係咁上下色啦！）黑色部份全部都係閃閃地但又唔係釘晒珠珠閃片嗰D，我都唔知係乜，總之就幾sharp啦！重點係腰間嗰塊布，束到個腰型出嚟！連我媽咪咁水桶腰都揾得返條腰！（佢唔會睇到我blog所以坦白D都唔怕啦！）仲有個袖位唔要，改返做背心，咁先似返件晚裝嘛！

另一件係中式旗袍，一般嗰D啡紫深紅好老土，絲絨就仲驚！淺色不外乎粉紅淺藍米色金色，呢個銀灰色算係比較特別同young，我覺得仲好高貴大方添！開頭仲諗住著淺色會好肥，點知出嚟都OK喎！

租呢兩件衫又over budget，用咗三件價錢租兩件！諗都冇諗過金都會貴過尖沙咀囉！不過最緊要媽咪中意同靚靚啦！佢地D媽媽衫款都幾多幾特別，新娘婚紗晚裝就不敢恭唯喇！唉！阿奶奶應該仲難攪，話明唔會去金都租喎！咁咪去尖沙咀揀D最靚最貴囉！希望快快手手攪掂埋佢唔使煩，咁我就可以專心揾我嘅The One啦！

同場加映，有個媽媽喺我地隔離狂揾D姅娘姊妹裙嚟試，試咗兩件之後連新娘晚裝都唔放過，我地喺隔離睇到O晒咀，連鋪頭個姨姨都忍唔住笑！

First Trial@Perfection 唯美主義

尋日去咗Perfection試晚裝啦！我join個PKG係三件晚裝only，唔會喺佢地度租婚紗，因為我想要嘅立體花花款或者vintage款佢地都冇，佢地D男禮又唔得（包包淨係中意VA），媽媽衫又唔優惠，所以咪join得三件晚裝咁少囉！

我開頭仲以為可以試20件，原來係10咋，不過原來10件都好多，我揀咗8件已經揀唔到喇！唔係佢地D衫唔靚，而係好多款同顏色我都唔中意，去到邊度都一樣，泡泡層層公主款deep V唔要，紫色藍色綠色啡色粉紅色又唔要，咁諗吓淨返落嚟仲有幾多嘢可以揀！？冇計啦！我又怕麻煩又有嚴重選擇困難症，所以為咗慳時間同為免自己揀到發脾氣，咪唯有唔比自己揀咁多囉！

席前：最初中意誇張款，一生人一次梗係有咁誇得咁誇啦！不過試過咁多晚裝婚紗，又影完pre-wedding，漸漸想揾返D簡單D嘅款，簡單得嚟有D特別有D detail位，襟睇D過多幾年都唔會覺得out！

1) 一開波就梗係揀我最中意嘅開心黃啦！呢個黃色真係勁靚勁sharp勁開心！呢款上身比較清，只係腰間有D閃石點綴，排石啱啱包住條腰，睇落條腰會幼D，裙身好重層次感！不過因為太多層，條裙勁重！

D閃石現場睇梗係閃D啦，但又唔會太誇張，下身D層層都做得幾靚好有質感！（唔該唔好睇我D鬼鼠肉）

2) 第二件係呢件淡黃色紗裙，心型胸（勉強都叫著到啦），落細鋼紗感覺唔會太公主，cutting著得幾slim

前面D閃石珠珠同立體碎花唔會太誇張，做得都幾detail添！

3) 呢件係同款灰色，著出嚟比淡黃色仲sharp，仲閃！意然有D叮叮叮嘅感覺！雖然D立體花花變咗做粉紅色（我最憎！），不過望落又幾順眼喎！可惜影相效果好似差少少，唔夠現場睇咁sharp！

呢件D花花比黃色嗰件做得仲靚！真係非常別緻！我本身唔中意咁多釘工，但呢件真係好靚好特別呀！

4) 佢地知我想揾直身紗款，就比咗呢件我試，我嫌個款簡單得咗D，深紫紅色太成熟唔得！佢地話遲D會有隻新色返但未知係咩色，唔知會唔會係黃色呢！？

敬酒：鮮紅色，西式晚裝款中式pattern，或者旗袍款

5) 呢係shocking pink旗袍睇相時係個鬼妹model著，好sharp好特別，點知我都未著上身只係睇咗實物，已經覺得好有青樓女子FEEL！同埋件衫都幾舊！

大露背加咗幾串珠鍊，so sexy！但唔係人人接受到囉！

6) 呢件就係我中意嗰類中式pattern晚裝（前面嗰三條珠鍊唔要吖唔該！）出面見到好多間都有中式pattern晚裝，都係紅色底加金色或藍色花嗰隻，間間都係咁上下，你抄我我抄你！反而呢件簡單得嚟又幾特別！

7) 呢件shocking pink cutting幾靚，係我最唔中意嘅娟面，但呢件我又接受到喎！最緊要係唔會著到凸肚腩！呢件係幾靚但又冇乜特別咁囉，佢仲有一件鮮紅色，敬酒可能著返鮮紅色會好D！

後面少少拖尾，如果嫌唔方便有個手指圈可以拎高條裙

送客：高貴大方，但唔好太成熟

8) 呢件nude色好elegant！Cutting都好正好slim！因為呢件上手剪咗個pat，加返上去會好睇好多！

後面又係少少拖尾，裙身D閃石一串一串落到裙尾，好高貴呀！不過呢個色唔知會唔會dry得滯，送客咁多人，到時可能冇人見到你！

9) 我個list入面係排除咗紫色嘅，我唔係唔中意紫色（亦唔係特別中意），只係紫色太多人揀，同埋紫色其實我蝦人著！淺紫會好娘，深紫會好沉，紫紅會好老．．．但呢件我喺Expo見到model著住行catwalk已經覺得好靚好sharp！因為佢全條裙都好閃，魚尾cutting好靚，嗰條披亦係精綷所在（雖然有人會覺得多咗！）

拎住塊嘢唔知做乜勁低能！

10) 呢件係第一次trial時試過嘅，幻彩色好sharp，不過硬係覺得好似伴娘裙多D！

其實最初係為咗一件深紫啡色嘅前短後長晚裝先join Perfection，但因為型得滯唔係人人接受到（梗係話男家嗰邊啦！），都唔知席前定送客著好，所以最終都係冇揀返佢，咁啱我揀衫呢日條裙又出咗行，無緣啦！相都冇得睇添！而家hold咗三件for席前／敬酒／送客，但越諗越唔對路，有D後悔想再揀過，選擇困難症又發作，個心打緊交囉囉戀．．．點算？？？可唔可以話我知你地有咩心水？


Perfection 唯美主義
尖沙咀女金巴利道60號C地下
Tel: 34212408

請各位Bloggers自重，不要COPY或公開我D相，多謝！！