金器大晒冷!!

媽咪好鍚我我梗知啦, 其他家人都好錫我, 老爺奶奶同老公嘅家人都好錫我! 好感恩!! 結婚前真係冇諗過會收到咁多金器, 到結婚當日收到咁多金器同鑽飾, 都真係意料之外!! 之後要開個保險箱好好保存, 影返張相留念先, 唔係都唔知幾時先會再見到佢地!!

應急百寶箱 Wedding Day Emergency Kit

上網睇到呢個應急百寶箱嘅POST都幾有用，大家都不防參考吓吖！

http://dreamalittlewed.mysinablog.com/index.php?op=ViewArticle&articleId=2774344

迷你針線盒 (包括針,線,鈕,扣針)
防走光膠紙
小較剪
透明指甲油
強力去污筆 (Tide To Go)
香口珠
膠布
雞眼貼
胃藥
止痛藥
藥油
面油紙
棉花棒
眉鉗
指甲銼
潤唇膏
防曬
紙巾
濕紙巾
髮夾
梳
潤膚露 / Hand Cream
透明碎粉
小鏡
特定顏色指甲油 / 洗甲水
牙籤 / 牙線
眼藥水
絲襪
耳環托
白色粉筆 (可遮蓋婚紗上的污漬)
香水
衛生墊
水
飲筒
小許零食或 Energy Bar
鞋墊
橡筋
超能膠
充電器
蠟燭 （擦在鞋跟內防刮腳）

當然以上的只是建議,可因應個人需要加加減減,而此百寶盒可由伴娘或姊妹負責看管,到她們結婚時亦可循環再用! 希望可以幫到大家啦！

愛的宣言 Visa Card

之前都爭扎咗一輪買唔買呢款愛的宣言，因為Visa Card近期好似好多人用咁，不過求其買張都要一百幾十蚊啦！呢款加埋自己張相，之後可以放返喺屋企做裝飾（反正台灣PW嗰兩個相架都打爛咗！）最後揀唔到其他款，都係買返呢張啦！！

正面係Visa Card，實物真係好靚呀！顏色好sharp，塊Foamboard都幾厚，又有外盒包裝，物超所值！！


背面就係愛的宣言啦，有幾十款內容揀呀！！唔使自己四圍揾！


http://shop33734008.taobao.com/category-382380614.htm?spm=a1z10.1.0.0.CqdEJj&search=y&parentCatId=35604032&parentCatName=%D3%AD%C7%D7%B1%D8%B1%B8&catName=%B0%AE%B5%C4%D0%FB%D1%D4

仲有好多其他款呀，不過太CUTE啦唔啱我！！嘻嘻！

過大禮 - 落訂了！

上星期日1/27終於落訂了！

其實我媽咪好簡單，只要求買籃生果同少少海味，花膠一定要！因為係我同媽咪嘅至愛！！禮金唔少得啦，幾多都冇特別要求，我諗同細妹嗰時咁上下就OK！其他嘢就包羅萬有利是攪掂！誰不知未來老爺話一定要椰子喎，咁我禮貎上咪問埋未來99有乜要求囉，點知佢乜都唔知話要問未來姑奶，一問就出事啦！Send咗個表嚟，除咗魚同雞同海味之外乜都要齊！OMG...咪去立興買囉！慳得就慳嘛！！而女家嗰邊就唔攪啦，全部用利是代替！

過大禮清單
	傳統版	我的簡化版

禮餅：	嫁女餅八個 龍鳳禮餅兩對 其他唐餅及西餅以餅咭代替	龍鳳餅兩對＋唐餅咭及西餅咭
海味：	髮菜(不可缺)，其他可選的物品包括：鮑魚、蠔豉、元貝、冬菇、海蔘、魷魚、蝦米、魚翅及魚肚等。	髮菜，花菇，花膠，罐頭飽魚
三牲：	生雞兩對，兩雄兩雌（代表兩家父母） 豬肉三至五斤，起雙飛（即一片相連開二）（代表家肥屋潤）	包羅萬有利是代替 (雙封)
魚：	大魚或鯪魚兩條，取其有腥（聲）氣	包羅萬有利是代替 (雙封)
酒：	洋酒及米酒各兩支	4支VSOP
椰子：	兩對（代表有爺有子）	立興禮籃
四京果：	荔枝乾、龍眼乾、合桃乾及連殼花生	立興禮籃
生果：	一籃(每種生果要四個)，取其生生猛猛之意。	一籃，不要梨，芒果和瓜
茶葉：	茶葉兩罐	立興禮籃
帖盒(禮金盒)︰	檳榔兩對、紅頭繩、青縷、扁柏、利是、禮金、飾金、龍鳳燭兩對及男女家對聯各一對 蓮子、百合、紅棗、紅豆、綠豆、芝麻＋四京果	立興禮籃＋另買扁柏
上頭用品：	男女家各一份	立興
帖：	已入好的喜帖	女家部份
女家回禮
回禮	男家送來禮物的一半 其中必須包括茶葉、生果、扁柏及利是	OK
回禮金及檳榔：	回禮金、及檳榔三個（自留一個，意即一郎到尾）	OK
回禮籃：	蓮藕、煎堆、鬆榚、大發、芋頭、薑、石榴各一對	包羅萬有利是代替 (單封)
賀帷巾：	賀帷巾	包羅萬有利是代替 (單封)
女婿金：	長褲(長命富貴)、皮帶(腰纏萬貫)、銀包(內置利是)及鞋一對(同偕到老)	利是代替 (單封)
利是兩封：	「百年好合，永結同心」及「五代同堂、百子千孫」	OK

過大禮前一日同埋包包喺男家PACK定嘢，唔係佢一定會執漏／錯啦！信佢唔過呀！！冇諗過夾夾埋埋有咁多嘢囉！一張枱都放唔晒！！

立興個禮籃，對椰子好大個好靚呀！油咗金色面，自己貼埋張囍字，靚晒！

呢個係立興禮籃包埋嘅禮金盒，又係勁靚！要自己摺嘅，對我嚟講當然冇難度啦！摺起咗之後好紅好SHARP呀！！留返佢第時唔知可以用嚟放咩呢！？
入面放咗禮金，利是，餅咭同龍鳳鈪，對龍鳳鈪好大好靚呀！！要保持神秘感唔好影相住！！


喺奇華訂龍鳳餅時HOLD埋呢兩個禮盒，好大好重，不過好靚好有特色！！Highly recommend呀！！影相一流！
本身應該用嚟放唐餅，但我地冇拎唐餅用餅咭only，個盒就用嚟放海味， 一樣咁GOOD！！


仲有唔少得嘅生果籃，揀咗八款生果，有D兩個，有D四個，有D八個，總之就要雙數啦！唔要梨，芒果同瓜，三樣我都中意食，too bad!!

當日十點幾包包嘅家姐同舅母兩個人嚟，我就同嫲嫲媽咪三個人坐陣，爸爸一早閃走咗啦！怕唔知講乜尷尬喎！笑屎我！！半個鐘唔使攪掂走人！！

立興喜慶掃貨

星期日北上去咗筍崗立興掃貨，差唔多買齊埋結婚同過大禮D嘢啦！本來諗住淘寶，但揾咗好耐都揾唔到一間有齊晒所有嘢，同埋始終都係睇過摸過先買安心D！

而家除咗立興之外，鵬鵬同飛翔都開始出名，呢兩間價錢平少少，不過好似話選擇冇咁多，最重要係佢地冇賣過大禮籃！香港最平都要＄388，立興賣238人仔，計落都平成九十蚊，加埋其他林嬏嘢就差幾舊水啦！！所以上去行一轉，食埋飯，當係weekend嘅一個節目，幾GOOD吖！

我地慣例喺皇崗打的去（但其實羅湖會近少少），三十蚊，如果撘地鐵只係三個站，不過要行幾條街喎！咪攪！！
去到寶安北路，成條街都賣晒過年嘢，好有氣氛呀！！

我地本身去第一分店，即係文具批發市場最多人去嗰間，去到佢地話帶我地去新鋪，今年先開所以冇咩人知，好寬敞好舒服，唔使同人迫！D嘢又好齊整，店員一路帶住我地行逐樣執，揀啱佢就放入籃落單，基上係唔會買漏嘢！

好多喜字貼好靚呀！由幾蚊到十幾蚊都有！絨布嘅都有分唔同級數，！

開頭仲諗住冇咩買，五六百蚊都攪掂，點知最後都買咗RMB720，店員都唔肯減價，之前有bloggers話要逐樣講價嘛，佢直頭唔啋我囉，次次都話佢地已經係最平，到最後埋大數先平得七蚊雞！同埋送咗兩包利是封同mini喜字貼，孤寒到呢！！

下面就係佢地張新咭片，多咗第一行“總店”！

買餅咭 - 美心 & 奇華

上星期六專登去婚展買餅咭，大出血呀！奇華真係加咗價（1/3開始），一加仲加成10%，激死人！早知上個月去教協買咗先啦！蝕咗百幾蚊添！！本身都有諗過吓買少量Hazzan Daz for自己朋友，不過又貴少少，又唔知邊個中意邊個唔中意，算啦，都係費事煩買番美心算數！

美心 - 原價$48 x 20% off = $38.4/pc（買得多送得多）

奇華 - 原價$75 x 20% off = $60/pc（金雅喜，之前細妹結婚都係買呢隻）


美心 - 150pcs x $38.4 = $5760（多送10張，個姨姨比多咗30個封我，仲話唔夠可以隨時去門市攞）
奇華 - 52pcs x $60 = $3120（有2張係for龍鳯餅）
Total: 盛惠$8880（幾好意頭呀，夾都冇咁準！）

失驚無神去擇日

其實我唔知擇日同夾八字有咩分別，定係擇日會包埋夾八字呢？咁如果夾咗之後發現唔好唔通就唔結婚咩！我同包包都覺得唔需要做呢啲嘢，揀一日有紀念性或者易記就得啦（我記性唔好嘛）！最多唔好撞自己同雙方父母生日月份，我都有八掛吓喺iPhone個apps度睇過邊日宜／忌嫁娶咁囉！

我地一開始係想揀2/18，因為呢日係我地嘅拍拖紀念日，但2/18/2013係星期一，我地好多朋友同事都要返大陸做嘢，所以平日唔會嚟到。同埋又驚一到七八點收工時間，啲人就會係咁湧嚟，影相招呼唔切，唔知攪到幾點先可以入席，又怕夜咗D賓客第日要返工辛苦（幾體貼！）所以經過一輪討論後最終都係決定放棄，咁就順延至後面嗰D星期六啦！3/2宜嫁娶（iPhone個apps話），或者3/23 ﹠3/30都好易記吖！

殊不知同包包爸媽去睇場，睇到北京道一號帝廷，佢地好似鬼好中意咁，而個場booking又好full喎，我地想揀嘅日子都比人book了！改期又唔知改幾時好，1月凍，2月過年，4月包包又話遲得滯（佢想快D娶到我！），所以包包同佢爸媽都好擔心，於是乎就提議去夾吓八字，睇下邊日啱我地而又有期。第二日包包就佢媽咪去咗揾C父，一問C父就話3/16最夾我地，咁啱呢日又係帝廷喺3月份唯一一個冇人book嘅星期六，包包勁開心，覺得我地好夾好好彩，跟住仲即刻走去帝廷落訂添！