睇場記 - 北京道一號帝廷

之前睇過銅鑼灣嗰間帝廷，大就係大，但個場三尖八角咁，又長又古怪，地方唔見洗，仲好鬼舊添，見到佢張紅地毯都唔開胃！所以轉戰尖沙咀北京道一號，鄰近地鐵站，交通方便，而且新淨好多添！

個場四四方方都幾大，最多可以擺三十圍，廿五圍可以包場，裝修都幾靚吖，又係宫廷式設計，冇皇府嗰D咁浮誇！最衰有三條住，會遮住少少睇唔到個台，好彩有三部大電視補番數！

個backdrop上年新換嘅，都幾靚吖！（不過係我最憎嘅粉紅色囉！！）希望佢快D又轉新裝啦！同埋加返張白色地毯吖唔該！


又有無敵大海景呀，正！我中意！！

Ｄ擺設都幾靚幾新！香檳金色椅套我又中意！

新娘房大到呢。。。擺到成圍仲有張梳化呀！

Receiption table係我中意嘅絨布（唔要紗），不過唔係幾like深紫色，如果轉做銀白或米白色就GOOD晒！

睇場當日個經理比埋個schedule我地睇，2013年5／6月都有人訂喇！三月好日嘅weekend都比人book晒！我地係上年11月去睇，即係仲有1年零4個月，唔係咁誇呀嘛！

睇完呢個booking schedule，包包同佢爸爸媽媽都驚咗，好擔心冇期！於是就提議去夾吓八字，睇吓邊日夾我地而又有期。。。待續

睇場記 - 灣仔合和薈軒

薈軒喺灣仔合和中心，呢個場好似唔係好多人擺酒，可能唔係太就腳啦，地鐵要行成十分鐘，又好少巴士到，但話晒灣仔區都算方便嘛！

個場都幾大，可以擺到三十五圍，姐姐話我地廿圍度都可以包場，咁優惠！？？因為min charge少嘛，十四萬咋！仲有兩個停車場車位任泊添呀！裝修一般啦，都有少少宫廷式設計，但唔係金碧輝煌嗰隻，清清地以白色為主，係個天花板上面ｄ鏡樣衰少少囉！

因為下午茶時間有人飲緊茶，ｄ侍應又set緊場，所以好似好迫咁，實情好大好寬敞架！佢兩邊都有兩碌好粗嘅柱，不過如果廿幾圍都冇咩問題，一邊可能遮住少少，另一邊可以間開嚟做麻雀房。

個backdrop唔係好得，不過有地毯同其他deco OK la！


新娘房都幾細，有獨立洗手間，都有個電視仔，如果包場仲可以用晒兩個新娘房添！

呢度係隔涉咗少少，除咗揸車之外點都要行段路，但勝在個場夠大，價錢又優惠，包包都幾中意！

睇場記 - The One 迎

之前冇上網睇過佢D相，有日同包包行街街，咁啱行過咪去The One睇吓囉！頂！入咗門口部lift，原來上唔到去，又要落返樓下行過隔離撘電梯，上兩層先再轉lift上去！激死！我咁聰明都去咗兩次先識去，d老人家同小朋友咪随時盪失路！

上到去有個講唔正廣東話嘅姐姐招呼我地，雖然唔係好聽到佢講咩，不過佢又好鬼nice又落力喎（唔係hard sell嗰隻）！呢個場都好新好靚，個backdrop成個都係通花幾特別呀！佢有兩邊都係落地玻璃，後面仲可以開咗佢做証婚，有D半露天feel！LIKE！

佢本Catalog嘅相，影得幾靚！

睇真D，所有嘅椅套都係紅色唔係米白色，仲要係得一半，好似waiter哥哥幫你“凹”嗰D椅套咁！勁樣衰囉！姐姐話呢Ｄ係新換嘅，短期內都唔會再換喎！

個新娘房都好細吓，仲要冇電視添！


呢個場都真係幾靚（除咗ｄ椅套之外！），包包好中意呀！不過價錢唔優惠囉！最平嗰都耍七千，姐姐仲話2013會加大約10%，就算而家cfm都唔可以用現價要用新價！即係最低消費都要八千幾蚊一圍！好貴呀！！　

睇場記 - 德藝會

之前我地冇打算嚟呢度睇場，一來地點比較遠（雖然喺正地鐵站上蓋），二來睇相冇咩特別感覺，因為唔中意深色裝修，又覺得ClubONE好型好靚，所以都冇諗過會楝呢度，但ClubONE個姐姐叫我地嚟睇吓，佢話呢樹都好靚又大D喎，咁咪嚟八掛吓囉！一睇。。。嘩！OK喎！個場好寬敞，四四方方冇柱位，個台同樓底都勁高，成個feel都好正！我地去到嗰時已經四點幾, 有兄弟姐妹喺度準備緊所以唔方便入去，只係喺出面裝裝下咋咋。。。

隔咗一排我地心思思又去睇多次，今次睇得好清楚，連佢塊又殘又舊嘅木地板比d膠紙痴到甩晒油都睇得好清楚！我同包包講，個場好靚我都幾中意，不過我接受唔到佢塊爛地板囉！深色地板／毯本來已經麻麻地中意，但個場靚可以加番d分，而佢塊地板就又舊又甩到一達達，任何一個位都會見到喎！點攪！？個sales哥哥仲話啱啱裝修完冇換地塊，短期內都唔會換喎。。。灰咗！！

雖然我接受唔到佢塊地，但佢個台側邊條梯仔真係好鬼吸引！睇完之後我成日自己諗，喺條樓梯度行落嚟march In，又噴烟又spot light咁幾型呀！行落嘉賓席之後繞場一週再行返上台，嘩正到呢！！仲有，佢另外有間房可以做麻雀房，咁就唔使喺個場度開枱咁肉酸又阻地方啦！

睇吓佢樓底幾鬼高！仲有projector喺後面

佢個地板。。。冇影到甩咗油嗰D咋！

個台都好靚呀又夠高！新裝修轉咗通花勁like！

我條樓梯呀！！！


同一集團仲有大舞台，係古堡式設計，不過好似好舊咁包包唔中意。博藝會仲靚，不過太遠啦！新D嘅仲有ClubONE Kln Peak，仲未正式開，地點又非常之隔涉，所以呢幾個場我地都冇去睇。 

睇場記 - ClubONE

我地第一心水係ClubONE，雖然地點喺觀塘麻麻地，但包包睇完d相之後都話好靚！西式裝修，又有水晶橙，望落去仲grand過酒店！所以第一次出動睇場就首選呢度，點知結果係極度失望囉！！

地點已經唔太好，喺工廠區，仲要喺棟唔知咩building入面，要經過間中藥鋪再上電梯先到，感覺怪怪的！個場又細個台又細樓底又唔夠高，淨係得個新娘房夠大同埋新淨，感覺好似借咗人地間餐廳攪function咁！個sales姐姐話最多可以擺25圍，但當日所見只係擺咗20圍都覺得迫迫地，所以望咗兩眼已經冇咩心機再睇了。。。
睇佢條樓梯幾有氣勢！假嘅！！



樓梯上去就係reception area（實景冇咁大的！）


睇相好似好鬼grand咁！


仲有鋼琴添呀！！

(Photos copied from http://www.clubwedding.com.hk/ClubONE%20Kln%20East/p50/婚宴實景.html)

婚禮第一擊 - 揀場

兩個月前嘅今日就係包包澳門求婚之日！其實去澳門之前我地都有傾過睇過結婚嘅嘢，大家都有共識係2013年頭，但日子未定實，我又唔係好想攞酒，所以都只係係咁２睇下，佢爸媽又講到明一定要擺，咁冇計啦！冇得say NO！

到包包求婚之後我地先真真正正去睇場揀地方，我知佢想擺酒店，因為grand d睇面d嘛！但係我都唔係好想攞酒，更加唔想花咁多錢喺呢件事上面！所以一開始我就講明唔擺酒店，一來價錢貴，酒水都要加千幾蚊，又唔送紅酒，仲要加一，親戚朋友要做多Ｄ人情之餘，我地又cover唔到條數！最大問題係我媽咪有極大可能會收返女家嘅人情，咁就白白蝕咗七八圍錢啦！


所以我地會揀會所或酒樓，最好有少少裝修，以白色為主，簡簡單單已經ok，最好decoration都唔使整，慳錢之餘又唔使煩！不過酒樓又絕不能太酒樓feel，即係又金又紅平時飲茶嗰Ｄ就no way啦！地點最好係銅鑼灣或者灣仔，因為我地都係香港人嘛，尖沙咀都ＯＫ嘅，方便其他親朋戚友！我地預計都要擺over 20圍，所以選擇都唔係太多，最重要梗係包場唔好同人share啦！



因為包包平日唔喺香港，我地只有星期六日先可以去睇場，所以必需要爭取時間，事前上網做定功課，務求一擊即中唔使四圍騰！！