DIY Floor Planner

用咗兩日時間終於完成咗新屋個Floor Plan啦！係咪好靚呢！
因為我地7月尾先驗樓，所以唔可以約師父上去度尺睇位住，整咗呢個Floor Plan之後睇傢俬諗裝修都方便D！得閒又可以轉吓款，改吓擺位咁，雖然尺寸唔係100%準確，不過起碼都有九成啦！

首先要上網揾咗自己間屋個Floor Plan先，然後喺下面呢個website用e-mail登記就用得，照住個Floor Plan嘅尺寸嚟畫，初初都幾難攪，我畫咗三次先成功！

http://www.floorplanner.com/

除咗2D圖仲可以轉做3D添！不過我覺得3D唔夠細緻，好過冇啦！

全港新業主注意！免費贈送芝華仕宇航枕價值$499

多謝小妹通知，上星期日去咗九展E-Max免費換咗個芝華仕枕頭，拎張臨時合約同身份証去登記就得，除咗枕頭仲送咗本書仔，入面D資料都幾有用，除咗介紹MaxHome d商鋪之外，又有講吓新居入伙有乜要注意，最緊要係有張coupon可以無限次使用至2013年12月31日，買正價貨品全單八五折！我已經睇中咗張梳化啦！講起而家都有D心掛掛添！！

我張梳化呀！灰色L型三坐位，display嗰張係布面，好滑，佢都有絨面，仲滑！揀絨面或布面都得，總之就唔要皮啦！唔中意冬天凍冰冰，夏天痴笠笠！

私人珍藏古董旗袍

呢件紅底金線旗袍係媽咪上當年出嫁時著嘅，已經有超過30年歷史，好有紀念價值！當年佢專登揾師父造，款色好簡單，一針一線由人手縫製，30幾年前訂造都要二千幾蚊！媽咪一直保存得好好，到而家我結婚先問佢攞返出嚟研究，好新淨，係款式老土咗D金咗D囉！如果我結婚當日可以著返呢件咁有紀念價值嘅旗袍真係好有意思，不過包包覺得唔好睇！都係嘅，30幾年前嘅款同而家梗係差好遠啦！

我媽咪上當年成日比人話瘦，原來都仲肥我好多呢！除咗膊位同長度啱之外，全條裙都有鬆，著得我好鬼肥添！我覺得有D似酒樓知客。。。

呢件係我早幾年自己喺香港造嘅，細妹結婚時我都係著佢咋！係咪靚好多呢！！

仲未諗到BIG DAY係咪真係會著媽咪嗰件呀，雖然好有意思，不過個款又真係麻麻地（包包比我嘅反應係嚇人添！）約咗6月頭揀婚紗晚裝，到時睇吓揀成點先再決定啦！唔知有冇辦法可以改裝一吓呢！？

上咗車做業主啦！

上星期六12/5再去將軍澳睇樓，終於confirm買我地嘅Love House啦！揀嚟揀去都係將軍澳最抵買（山卡啦嗰D唔計啦！），喺咁嘅樓市底下三百幾萬可以買到六百幾尺，十分鐘唔使就行到去港鐵站，仲要一程車可以返到娘家，半個鐘可以返到公司，仲要係屋苑，仲要十幾年樓齡，仲要唔使樓望樓（啱晒我慣咗換衫唔關窗！），仲要係向西北（純綷個人喜好），真係去邊度揾！最緊要係我媽咪都好中意，佢話入面個廳夠大，外面環境舒服，佢中意我就安心晒啦！！

不過你話係咪中意到非買不可呢，一定唔係囉！包包就好中意，我只係覺得呢個時候有呢個需要又遇到呢個符合我地要求嘅單位，咁咪買囉！本身仲有一個同屋苑嘅超高層單位放盤，觀景開揚D，個窗對正門口，光猛好多，仲要全屋新裝修，我睇完之後勁中意！不過個業主都唔係有心賣！叫佢傾價錢都唔肯唔傾，又話仲有幾台客會睇，根本就係想抬高個價，之後我叫經紀打返比佢還價佢連電話都唔聽添！激死我！包包同媽咪都話佢唔會賣住，唔知要等到幾時，咁最後咪唯有退而求其次買另一個單位囉。。。

呢兩日攪按揭D嘢煩到爆！叫個數學白痴做D咁嘅嘢真係攞命！見到嗰幾份加埋幾十頁紙嘅FORM都想嘔！之後又要揾裝修，睇傢俬睇電器，有排忙呀！

買樓 - 煩爆！

買樓呢個topic嚟得好突然！因為我地一心諗住租樓結婚，等結完婚一兩年後睇吓樓價會唔會跌返D先買！點知包包突然轉軚，話覺得租樓等於同人供樓，租金分分鐘仲貴過供樓嘅錢（都唔係而家先知啦！），所以佢單方面堅決唔租！如果問我，我都覺得租樓係on居！租金貴地方細，住一輪又要搬，又要執嘢，我最怕煩嘛！不過你話而家買咩，又好似好唔抵咁，睇住個樓市由年頭到而家一路係咁升，真係買唔落手，家陣講緊幾百萬買層樓唔係幾百蚊買件衫呀，買咗就供一世！！但都係嗰句啦，“早買早享受” 嘛！唉。。。如果包包肯同佢屋企人住多一年半載，等結完婚先慢慢揀樓慢慢攪裝修，咁幾好呢！人地就話同屋企人關係唔好，或者屋企細，冇得痴屋企住啫，佢有得揀有得痴都唔痴！係要揾我嚟攪！同一時間要我攪晒兩個人生最大嘅project，真係跳樓都唔掂啦！

呢一個月嚟我地個個星期去睇樓，港島東（我地住開，但貴到冇朋友！），九龍灣（近我細妹有照應），將軍澳（樓價平DD又唔太遠）加加埋埋都睇咗三十幾個盤，本身上星期都睇到一個盤幾中意，但我地都未tune到自己嘅心態同計掂條數，諗咗兩日啫，轉個頭它已走了。。。而家盤少客多，再加上我地都係睇上車盤，所以真係供不應求，手快有手慢冇！！其實我地要求都唔係高（資金所限嘛！），三百幾萬要以下條件都唔係過份吖！但原來以而家個市價都好難揾囉！

1. 交通方便，有巴士小巴撘，行到去港鐵站唔使轉車，又唔好太遠我娘家！
2. 周邊環境企理舒服，唔好太近大街，街市之類
3. 觀景少少開揚，唔需要什麽背山面海（我地都買唔起！），總之唔好樓望樓或者對住條街，望出去舒舒服服就得啦！
4. 唔需要有裝修，因為我地都會大裝！除非廚房好新好乾淨可以唔整，因為我都唔會用！
5. 要屋苑唔要單揀樓
6. 唔需要太高層，中層十幾樓以上已OK！
7. 唔需要新樓，樓齡十幾年，最盡廿二三都OK！怕太舊第時有機會換樓好難賣！
8. 兩房五百幾尺都夠住，第時生埋B迫迫地都OK啦！

經紀又幫我地揾咗兩個盤，聽日去睇，如果OK就會即時confirm！費事諗兩諗轉頭又冇咗或者業主反價唔賣！上次買唔到我個心乸咗幾日呀！久違了的失戀滋味。。。

GOOD LUCK to me!!!