產前講座（美素佳兒）

2014-3-29 20WK1D（美素佳兒）

聽咗咁多個講座，美素佳兒呢個真係最PRO呀！VENUE已經正啦，喺HOLIDAY INN攪，方便過EATON HOTEL，大過LANGHAM！我地坐最中間位，前面側面都有PROJECTOR，都幾清楚！

第一PART講孕婦營養，之前已經聽咗好幾次呢個TOPIC，但今次個SPEAKER講得好清楚好DETAIL，超正呀！懷孕同哺乳嘅飲食要點都有講，一D都唔悶！佢仲專登提我地有咩大家都以為唔食得但原來係食得嘅，戒錯口就唔抵啦！哈哈！！

中場休息，大會安排媽媽們分批去拎贈品同試食薑汁燉奶，安排得好好，雖然好多人但唔使等好耐又有秩序， 一啲都唔混亂！個薑汁奶係用美素佳兒媽媽奶整嘅，唔甜幾好味！第一次聽講座有甜品食，好創新呀！值得一讚！！

第二PART係育嬰指導，呢個姑娘又係講得超清晣，上次去雀巢嗰個都有做DEMO教同BB沖涼，覺得好正好有用！但今次呢個講得仲正呀！佢講得仲詳細，好細心提咗好咗好MINOR但又重要嘅POINT，真係好有用！！呢D講座真係去多十次八次都唔怕，因為就算TOPIC一樣，但每個SPEAKER講嘅嘢都唔同，每次都會有所得著！

今次個講座真係有讚冇彈！內容豐富，安排得宜，贈品仲好實用添！見到個三角枕就開心啦！出面買要成舊水呀！！仲有兩本懷孕書，返去可以慢慢睇，媽媽奶粉同口水肩！

第六次產檢（政府結構）

2014-3-28 20WK（東區醫院照結構）

東區其實真係幾好，OSCAR，結構，糖尿，B鏈，所有基本檢查都包晒！今日啱啱20週就約咗返東區照結構，老公要返工所以叫咗媽咪陪我去，等佢見吓佢外孫女吖嘛！

我地十點半準時去到，第二個，等咗大約半個鐘，都OK快！一入去見到兩個唔同衫嘅醫生，幫我照嘅應該係實習生，另外一個高級D嘅醫生坐喺隔離睇／教。個實習生好似乜都唔識咁（淨係識笑），照唔啱位，攪咗好耐都照得唔清楚，淨係照個頭／腦都用咗十分鐘！到照心臟，佢發緊夢咁望住個MON唔知做乜，又唔郁又唔盛，咁又用咗十分鐘！照手同腳時其實我睇得唔清楚，唔知其他醫生照係咪咁！照個樣時又比個胎盤遮咗一大忽，連兔唇都冇睇！可能佢有睇不過冇話我知掛！！我都費事問咁多，淨係想佢快D攪掂算！>,<

中間佢地不停用英文對答，高級教佢點照個位會好D，但佢好似唔明咁！問佢嘢佢又唔係好識答，連照心臟最最最基本嘅係乜都唔知！個高級醫生叫佢返去温書，話佢咁去EXAM實肥佬！照到半路高級又問佢可唔可以convince到自己咁樣係OK，實習生擰頭，即係又衰咗啦！個高級醫生仲話佢再咁照落去一個鐘都未攪得掂！！唉。。。真係揾著我同小包包嚟攪呀！攪到咁上下我見個高級醫生開始唔耐煩，佢開始擔天望地，FOCUS唔係喺個MON度，跟住就埋嚟幫個實習醫生埋尾（只係照咗脊骨），咁就攪咗四十分鐘！足足一倍時間呀！！

聽D媽媽講，啱啱尋日嚟咗一班實習生，尋日上午都仲係正式醫生照，仲照得好詳細添！如果我早一日照都可能冇事，咁啱今日就撞正佢地，唯有話自己黑仔囉！好彩我有BOOK定私家咋，咁嘅情況真係唔照多次都唔安心啦！

媽媽話開頭照腦時見到小包包係咁吹泡泡，好攪笑呀！我掛住監視個實習生都冇留意到添！今次冇相比呀！失望！！之後見另一個醫生（好似又係實習生，佢對D流程唔係好熟囉！），乜都冇講淨係話我大致正常屬低危，叫我入助產士組，之後覆診由助產士跟進，唔使去健康院，是旦啦，佢叫我入咪入囉得！政府嘢都真係好睇彩數，覆診就冇咩所謂，希望到生嗰陣D助產士個個都係又好人又專業啦！！

好期待過兩星期去孫醫生度照呀！希望到時小包包健健康康，乖乖地聽醫生話照得清清楚楚啦！

產前講座（樂天）

2014-3-22 19WK1D

唔係個媽媽朋友講我都唔知原來韓國樂天都有出奶粉！今次係喺朗豪酒店攪，個HALL唔係好大亦唔係好多人，不過好多媽咪都帶埋BB去，好嘈啊！去咗咁多個講座，我覺得通常奶粉商嘅講座都會比較實用（除咗利安）！今次主題係胎教，胎教最簡單最有用就係聽音樂，因為BB最早發展同最靈敏嘅觸覺就係聽覺，所以我每日都會聽吓音樂，希望小包包會聰明D！

胎教音樂最好嘅梗係古典音樂啦，好彩我本身都有D文藝氣息都中意聽呢類音樂，流行曲唔係唔得，不過要揀D開心D正面D囉！平時我聽都係D/L咗一大堆求其播嚟聽，可能朝早會聽D輕快D開心D，夜晚會聽D柔和D，但佢地介紹嘅已經分好晒類，例如sleeping, playful, cheerful...都攪到我想即刻淘返SET返嚟聽添！

淘寶RMB63有10隻CD，勁抵！！

原來唔只有BB話，媽媽同BB講嘢都要用“媽媽話”！媽媽話係要講得好慢，清晰，音調高低起伏，抑揚頓挫，有少少似朗誦咁，BB先會聽得清楚！我平時同小包包講嘢好快，返去要練習吓媽媽話先得！！仲有，BB好中意聽媽媽把聲，平時要同佢傾多D計，講吓故事，唱吓歌仔，咁樣BB同媽媽會CLOSE D又會乖D聰明D！加油喔！！

去奶粉講座竟然冇奶粉送！SO STRANGE！！算啦，就算有都未必用得著，小包包要食人奶嘛！只係送咗兩大包濕紙巾，兩SET支裝嬰兒護膚品同奶粉COUPON，唔算好豐富，不過好用有喔！！

難得嚟到旺角，順道去GAP睇吓有咩靚靚童裝衫賣，大減價都好平吓，價錢同出面冇牌子嘅差唔多，但質料就好好多！可惜特價嘅冇乜初生嬰兒款，睇啱嘅係新貨冇減價，最後只係買咗頂彩紅帽比小包包，好可愛唷！！呢樣係我地買比小包包嘅第一樣嘢，好冇紀念價值啊！

產前講座（美國利安奶粉）

2014-3-15 18WK1D

又嚟產前講坐喇！都唔記得咗點解會報咗呢個講座，主辦機構係美國利安奶粉，聽都未過呢！第一PART講臍帶血庫，其實我個人覺得冇咩用，除非真係咁唔好彩BB一出世就有免疫及代謝方面嘅病啦！啲臍帶血只係會KEEP十幾廿年，touchwood真係有咩事需要用到都可能已經七老八十啦！而家又唔係間間醫院可以配合到留起D臍帶血，政府醫院就暫時都未得，私家亦唔係好多間有做，所以對我嚟講冇用囉！

第二PART係做孕婦按摩嘅DEMO，腳部MASSAGE可以去水腫，我個媽媽朋友自動請纓出去做MODEL，佢話好正喎，做完之後隻腳鬆晒！返去要叫老公幫我做吓先得！哈哈！一世冇抽奬運嘅我竟然抽到$1000 CASH COUPON！哼！慌唔係引我去出血咩！！

第三PART講返利安奶粉，都係SELL吓自己牌子咁啦，冇乜聽佢講乜！

最後一PART係介紹唔用嘅精油對孕婦同BB嘅作用，例如LAVENDER＋茶樹油＋椰子油＋水，加三滴落去濕紙巾度比BB抺PATPAT可以舒緩尿疹；橙精油可以幫助BB睡眠，有冇用就真係要試過至知！

就咁睇呢個講座內容好似好豐富咁，但實情佢似SELL嘢多D，真係有用嘅資訊唔太多！去咗咁多個講座呢個可以話係最冇用！佢地仲送咗一大袋贈品，看似好抵！但入面有一大包濕紙巾已經過咗期，有兩罐大奶粉七月過期，七月小包包都未生啦！即係冇用！我地仲拎住行咗幾個鐘頭街先發現，TOO BAD！！

其餘嘅贈品有尿片，嬰兒洗衣液，孕婦護膚品，葉酸，精油，綿花片，毛巾仔，都幾豐富嘅！！

後來佢地都有打返嚟話疏忽咗，冇留意D濕紙巾過咗期，話會寄返D嬰兒護膚品SAMPLE比我地，咁都算佢地有良心啦！！

Our 1st Wedding Anniversary

2014-3-16係我地嘅結婚一週年紀念，眨吓眼就一年啦，時間真係過得好快，特別係開心嘅時間！今年係第一年亦係最後一年嘅二人世界wedding anniversay，下年就會有小包包同我地一齊慶祝啦！本來我話想今年簡簡單單，唔要禮物唔食貴嘢，寧願留返D錢比小包包用，雖然都唔爭嗰幾千蚊，但個心係唔想亂花錢囉！所以都係簡簡單單食餐飯，但包包DADDY有準備心意咭同禮物，more than what I expected！下年就真係乜都唔要，只要小包包健健康康開開心心同我地一齊慶祝就夠啦！^^

姐姐 confirmed!!

走暈港島新界區十間僱傭公司之後，本身約咗兩間共四個本地印姐姐INTERVIEW，好可惜到最後有一個嚟唔到，兩個放咗飛機（嬲！）。。。

因為係星期日，“至尊” 爆晒棚好多客，亦坐滿姐姐，不過應該太部份都唔肯湊BB，所以AGENT只係介紹咗一個賓賓比我地，唔識中文，年紀稍大，FAILED！喺我地等緊嗰陣，見到另一PAIR又係揾湊new born BB嘅，預產期又係8月，個姐姐睇落好細個，樣子唔錯，但同佢講嘢冇咩反應，淨係識點頭，主要都係AGENT講，最後佢地都CFM咗請佢！因為人地BOOKING早過我地所以比佢地揀咗先，我地冇份LU！其他姐姐有啲睇落年紀好大，有啲化晒妝，有啲個樣好惡，總之就冇個睇得順眼啦！唔係話歧視佢地，不過最起碼要睇落順眼唔好嚇親BB至得吖嘛！

”佳譽” IN嗰個喺香港八年，廣東話好流利，唔講仲以為佢係香港人，化晒妝成個𡃁妹咁，唔得囉！老闆娘即場又揾多兩個比我地，兩個年紀都稍大，但其中一個中英文都好流利，又有湊BB經驗，喺新加坡同香港都做過，條件好似好好咁仲要肯湊BB！佢係斷約工人，因為照顧開個婆婆過咗身所以合約可以隨時完，講起婆婆時佢仲眼濕濕，好誠懇咁喎！最後，諗咗陣我地就決定請佢啦，好姐姐難求嘛，難得揾到個有經驗嘅就唔好心大心細喇！年紀大少少都好嘅，穩重交帶D吖嘛！佢仲比埋現任僱主電話我地傾完約時間，個僱主都話佢唔錯，咁就放心晒啦！

埋單AGENCY FEE ＄6980 + INSURANCE $1200 = $8180（未計單程機票，等佢7月喺印尼返嚟至比）

本來我地都諗住如果呢幾個本地都唔啱就揾海外算，起碼純品啲又多啲選擇，最多花多少少時間教佢，點知最後又咁好彩無端諯比我地遇到呢個姐姐，希望佢到時生生性性乖乖地啦！攪掂姐姐下個TASK就係裝修細房比小包包同工人啦！哈哈！

今日係我地結婚一週年，咁啱又完成咗個咁KICK手嘅TASK，真係值得慶祝吖！老公話我地由攪結婚開始，樣樣嘢都好順利冇乜煩穫麻煩嘢，話我地好夾好好彩喎，其實係我勤力做功課，樣樣都預先準備好咋！！^0^

大難題 ﹣ 請姐姐！！

之前都聽過人話而家請姐姐好難，一來有經驗嘅姐姐會揀工做，嫌湊new born baby辛苦，寧願照顧老人家！二來而家好多人請工人湊BB，供不應求！所以我都已經預早五個月開始揾，預返佢早一個月嚟到適應吓環境，咁都仲有四個月時間吖，點知。。。原來七月印尼過年，印尼嗰邊辦手續申請文件要三個半月，所以時間就變得好緊！請賓賓會快D，但又怕佢古惑，同埋唔識中文同婆婆溝通唔到，坐月同我返工之後都要靠婆婆幫手睇住吓嘛，如果溝通唔到就大穫啦！所以變咗只可以喺唔係好夠時間嘅情況底下請唔係太多經驗嘅印印喇！！

1. 我地先去大牌子“得成”，第一次請工人嘛，諗住去間大公司問吓先穏陣D，費事乜都唔識比人厄！得成個姨姨都幾NICE，佢話印印太蠢湊唔掂BB，所以叫我地揀海外嘅賓賓冇咁古惑！佢比咗成五本資料我地睇，揀晒D有湊BB經驗嘅出嚟，我地揀咗幾個OK嘅再睇VIDEO，D資料同程序都好有系統好清楚，話晒大公司嘛！最後揀咗三個外貎，經驗同英文都OK嘅，但其中兩個我又嫌太肥怕做嘢唔方便，淨返一個幾好樣，但點知原來佢已經比人CFM咗LU！即係冇行啦！！借勢走人！

2. 之後再去“薦人館”，見佢入面有兩台客生意唔錯，個SALES化濃妝大眼CON不太討好，不過都幾熱情介紹，佢話咁啱有個現成有多年經驗嘅印印，喺馬來西亞，台灣等地都做過，本來叫佢即時INTERVIEW，點知佢啱啱走咗，再傾多陣有個客打返嚟話CFM要佢LU！又冇咗！佢再介紹海外嘅印印比我地，但有經驗嘅都唔多，最後都係揀唔啱走人！

3. 薦人館隔離間“旭煇”，一入去問佢就話有經驗嘅唔會肯湊BB，冇再介紹其他就話留底資料，有啱嘅先再覆我，唔憂做咁款！BYEBYE！！（之後上網睇返有人話係黑店！）

4. 另一間“新星”，上網話係超黑店，又見佢鋪頭長期冇人，所以問都唔敢問！驚驚！！

5. “至尊”都有人話係黑店，但咁啱我見有客喺入面就入去問吓啦，個後生女好NICE好HELPFUL（可能因為未比錢！），介紹咗兩個有經驗嘅本地印印比我，仲約埋INTERVEIW添！面表睇呢間嘢好似唔錯，咁啱佢又有合適嘅姐姐比我地，但唔知會唔會好似網上面D人咁講，未比錢就乜都得，比錢後就。。。都真係博一博咋，到時見啱咗先算啦！！

6. “標緻”網上評價幾好，招呼我地個女仔好NICE，不過佢都話本地有經驗嘅印印好難揾，一有就即刻會比人要咗，暫時都未有合適，海外嘅佢都有介紹比我但唔係好啱，主要都係經驗少D，留咗資料等佢覆囉！

7. “景順”網上評價唔錯，個老闆話佢啱啱二月尾去完印尼揀姐姐返嚟，D姐姐佢全部都見過晒同佢地做過INTERVIEW，所以確保質量OK！我揀咗兩個有湊BB經驗，不過都喺未出過國嘅，睇埋VIDEO都唔錯，其實都係背書咁背啫！佢地就冇乜做本地姐姐，全部都係學校揀返嚟！如果怕本地嘅古惑都可以考慮吓呢間！

8. “尚亞”咁啱有客唔得閒招呼我，留咗電話佢地第二日就打返比我，問晒我嘅資料同要求，又係話本地難揾湊BB嘅，話會SEND EMAIL比我，不過一路都未有消息！

9. 睇完本區再轉戰對面海，“學趣”本地同海外都有做，佢地都幾多工人介紹，但唔知係咪間鋪太細太局促，攪到我冇乜心機睇PROFILE，個個都覺得唔OK！又係留咗資料等佢地再UPDATE，點知過兩日佢地真係有新人資料SEND返比我喎！

10. “佳譽”係我媽咪介紹嘅，因為啱啱揾佢地請咗個印印照顧公公，個唔知係SALES定老闆娘好似都係印尼人，佢地好多本地姐姐，揀咗兩個有經驗嘅約INTERVIEW！

就係咁，揾咗幾日前前後後都睇咗十間，選擇確實唔太多！賓好定印好？最後揀咗印，因為要識中文同埋冇咁古惑！本地好定海外好？有得揀就梗係想揀本地有經驗啦，但冇嘅都冇辦法，唔夠時間嘅話海外都要揀，海外有海外好，聽話D勤力D囉！！不過要揾個合心水嘅真係好頭痕吖！希望之後INTERVIEW順順利利啦！！

產前講座（安滿）

2014-3-8 17WK1D

兩個禮拜第三次去產前講座喇，好勤力呢！今次係Baby Kingdom同安滿攪嘅，主題係“新生嬰兒嘔奶常識及護理須知”，地點係喺逸東酒店金鑽廳，好HIGH呢！成個HALL包晒呀！！坐到爆晒棚仲要加位添！我地產檢完準時到，都坐到前座側邊，有三個大PROJECTOR所以睇得好清楚！一開始由一個懶風趣嘅醫生講關於初生嬰兒要打嘅針，好驚呀！由出世到一歲要打成12支針，諗起都覺得小包包好可憐啊！如果比錢喺私家打就可以打少幾支痛少幾次，不過呢D到時再諗啦！

第二PART由寶血醫院嘅助產士講產前注意事項，其實次次講座講嘅都差唔多，不過聽多幾次冇壞嘅！今次講得比較detail，連醫院入面生仔嗰張床都影埋出嚟，教埋我地點坐，仲DEMO一次成個生仔過程，好攪笑！好似真係生咗一樣！！

第三PART由姑娘講母乳餵哺嘅好處，技巧，注意重點，又係拎埋個公仔出嚟做DEMO，清楚又生動！佢真人做DEMO我唔好意思影佢相吖！嘻嘻！聽完之後仲增加咗我對餵母乳嘅信心添！為咗小包包我要加油吖！！

今次嘅禮物有一大罐安滿媽媽奶粉（我唔飲好“晒”喔！），BB奶粉，尿片，綿花棒，孕婦護膚品，紗巾，口水肩，攝影COUPON，一次比一次豐富呢！！

本雜誌係之前去BB展唔知邊間鋪送嘅COUPON，咁啱喺附近就去拎埋，雖然過咗期，不過冇所謂吖，對我地嚟講一樣啱睇！有部份紗巾同口水肩又係喺門口比D姨姨捉住填表送嘅，佢地真係好勁！任何一個講座都會見到佢地，仲勤力過D媽媽呀！！

第五次產檢（私家）

2014-3-8 17WK1D（黃建新醫生）

三八婦女節去做產檢，次次產檢之前都好緊張，今次仲特別興奮添！因為如無意外應該會知小包包係男定女啦！今次揀咗黃建新醫生，佢之前係廣華嘅高級醫生，好似出咗嚟唔係好耐所以唔算好多人識，唔使點等，價錢又實惠，網上comment話佢好細心好NICE，果然冇錯吖！佢仲有得照結構添，即係PRO啦！咁我諗睇男女會準D掛（我見好多媽媽照幾次都唔同結果）！我地早咗少少去到，登記之後量血壓，磅重，個姑娘話我個肚細吖！激屎！

POST返張大肚相先，其實個肚都唔係好細啫，都幾凸吖！^^

黃醫生同我地傾咗陣計，問吓病歷，我話咗佢知政府照OSCAR嘅RESULT，佢話唔使擔心冇問題，鬆一口氣！跟住就照聲波見小包包啦，嘩！佢今次自己反轉咗個背脊向天，哈哈！不過冇影响一樣照到嘅！黃醫生同我地逐PART睇，頭骨，肚，腳骨咁呀，我都唔記得睇咗D咩啦！淨係記得小包包有9.8CM，不過黃醫生話而家度長度唔可以作準喇，要睇頭圍同肚圍，小包包SIZE正常，而且胎水夠好健康，胎盤位置亦冇問題冇偏低，黃醫生都話我肚細唔緊要，最緊要BB健康正常！^^小包包而家實際係16WK6，同上次檢查時一樣都係爭咗兩日，應該係排卵遲咗啦！ 

跟住黃醫生問我地想唔想知係仔定女，梗係想知啦！！佢轉個角度照住小包包個PAT PAT同大脾，睇咗一輪都見唔到有JJ，呵呵！即係囡囡囉！！BINGO！一索得索女！開心晒！其實今胎我都有超強烈嘅預感係女，真係好開心呀！！

黃醫生真係唔錯，有問必答不特止，連我想問但未問到嘅嘢都講埋！而且佢收費唔貴，開刀同順產都係一樣收萬八咋，佢PREFER D媽媽喺法國生，因為地點方便佢，尤其係順產冇得預時間，太遠嘅話唔方便又危險，所以佢都講明港島區唔會接，又好啱喎！！但我地都仲未諗定政府定私家生吖，佢話24週前CFM都得，仲有時間諗吓！

產前講座（雀巢營養天地）

2014-3-4 16WK4D

第二次去產前講座，因為係平日，老公唔喺度我就約咗個8月媽媽一齊去，今次呢個講座係BB Care同雀巢合作攪嘅，個HALL都幾舒服，有兩層，我地早到就梗係坐正下層中間位啦！Speaker係一個助產士姨姨，好鬼PRO呀！講得好好，好清晣，快慢適中，一啲悶場都冇！好過上次香港醫護學會攪嗰個好多！！

內容大致係講順產同開刀嘅分別，餵母乳同沖奶粉嘅正確方法，掃風，沖涼程序，注意事項，好實用呀！助產士姨姨即場示範幫BB沖涼，最中意呢PART，因為我真係完全唔識吖！睇完之後明晒！不過到自己做又係另一回事囉！

聽完講座梗有禮物拎啦！今次D禮物好豐富呀！有尿片，學習杯，米糊，嬰兒指甲剪，果汁！手套係喺門口填入會表拎嘅！

走嗰陣同另外幾個8月媽媽相認咗，我地仲約埋一齊食飯添！好開心呀！吹咗成晚水唔願走！最衰唔記得影張相留念！！

產前講座（香港醫護學會）

2014-3-1 16WK1D

頭三個月成日都勁眼瞓勁攰，又反胃又胃脹，過咗三個月好少少就開始出動去揾講座聽啦！我地乜鬼都唔識，梗係聽多D冇蝕底啦！東區醫院都有5個唔同TOPIC嘅講座，每隔一兩個月就會重覆，所以都唔急住去，另外奶粉嘅媽媽會耐不耐都有，但BOOK唔BOOK到就要睇彩數啦！因為好多媽媽都會報，手快手手慢冇！

今次係第一次去聽產前講座，早前無意中發現“香港醫護學會”嘅網站，佢地成日都會舉辦唔同類型嘅講座，咁啱比我見到佢地有產前講座，連續三星期，我報呢個已經係最後一次，好好彩又比我報到！地點仲要喺觀塘勁FRIEND！

今次嘅主題係『準父母必懂的產前注意要點及把握嬰兒腦部發育關鍵時刻』，由一個醫生同一個營養師負責主講。個醫生伯伯講產前要注意及準備事項，順產同開刀嘅分別／過程，講得勁慢勁悶，不過瞌住眼瞓都要聽吓嘅！起碼了解多咗成個生仔嘅過程，不過真係越聽越驚囉。。。營養師就講孕婦要注意嘅飲食，但因為比阿醫生伯伯攪到勁眼瞓，所以真係冇咩心機聽。。。

聽完講座例牌有贈品送，又一大堆samples，BB沖涼洗頭水，孕婦護膚品，奶粉，紗巾，口水肩，濕紙巾，滿載而歸！

同場加映：啱啱收到惠氏媽媽會送嘅隔尿墊同奶粉，仲有專一送上門，好有誠意啊！！