澳門求婚記 - Part 2

好喇！入正題！
11/19/11星期六，我地睇完賽車四點幾，CC話要去唔知ＸＸ教堂幫佢家姐影相交功課，未去澳門之前佢已經講過，所以我都不以為意（加上嗰日我全日都未瞓醒，撘咗半個鐘的士過去仲瞓足全程（=.=），落車之後男主角喺外面講緊電話，我諗住佢傾緊公事就冇理佢自己行咗入去敎堂，嗰時我仲吽下吽下唔知發生咩事，CC叫我行去台前，我就好聽話咁行咗過去，但其實我都唔知要做d乜！

睇下個敎堂入面幾靚 ~

我一轉身，見到男主角突然出現咗喺我面前，手拎住一束好靚靚嘅黃色絲花圍住好多個阿JACK公仔頭，呢一刻嚟得太突然喇，我完全冇諗過佢會喺咁嘅環境下同我求婚（唔係！應該係冇諗過佢會求婚！），所以除咗笑同喊同笑之外，我都唔知比咩反應同講咩好！

我就話冇心理準備啫，原來男主角包包已經同我幾個好好好朋友籌備咗呢單嘢好耐，準備道具，計劃行程，諗定對白，但點知。。。佢一行埋嚟就震到講唔嘢，只係隠約聽到佢講咗幾句說話，最後講完“嫁比我！”，跟住就跪低拎咗隻介指出嚟！咁我梗係up頭應承啦！就係咁，簡單驚喜又感動嘅求婚任務完成了！

睇下我嘅戰利品 ~ 我最愛嘅阿Jack呀！！靚到呢！

事後好友們都投訴聽唔到內容，錄音嘅收唔到音！傻嘅！
我企正喺佢面前都聽唔到，其他人又邊有可能聽到呢！？？後來佢比番份稿我睇先知佢up過d乜！

多謝好友們嘅幫忙，同我分享人生中最大嘅喜悅！嚟返張大合照先！！

路環聖方濟各教堂 （華仔拍遊龍戲鳳咪喺呢樹求婚囉！）

澳門求婚記 - Part 1

寫呢個blog最主要原因係要記低我同包包嘅結婚過程，所以求婚呢part咁緊要又點可以唔記低呢！！

話說喺11/19/11，我同包包同兩個好朋友去咗澳門玩，呢個trip真係期待已久，未出發先興奮呀！ 一次過可以滿足晒三個願望：住靚酒店，睇賽車同水舞間，勁！我地早喺兩個幾月前已經做好晒準備，因為驚賽車期間會好多人，到時又full又貴，所以預早訂定酒店買定飛就實冇衰啦！

﹣十六蒲酒店＋船飛＋送buffet嘅package（每位$1578咋！淨係送個buffect都要成五舊水！勁優惠呀！！）

﹣格蘭披治賽車門票（經康泰訂，大看台A$450+＄30手續費）
﹣水舞間門票（東亞／Citibank信用咭九折）

酒店房由VIP房upgrade咗去Presidential Suite（另加$1350），靚到呢。。。最後仲玩到成間屋大反轉添！

無敵大海景~

睇個門口幾grand~

高級雲石大廳~

特大飯廳暗藏儲物柜同pantry～

豪華套房大到呢~


Jacuzzi呀!!!


全部Hermes嚟喎~

現場睇賽車感覺幾震憾，嗰種感覺有Ｄ似細個第一次去馬場睇賽馬！D engine聲勁到呢。。。聽唔到其他人講嘢同埋耳仔痛囉！雖然唔識Ｄ車隊車手，但係現場氣氛好好，大家都好興奮，一有車經過個個都企晒起身睇同影相，我地十二點幾入去，睇到四點幾，足足四個鐘都唔覺悶！

各車手準備就緒~

點少得百威BB呀!!

d人企晒响度幾緊張~

架電單車快到咩色都睇唔到呀~

水舞間個場比想象中細Ｄ，我地係坐第二行，都預咗會濕身，大會提供嗰條毛巾都幾大條，未去到沙灘巾咁誇張，但都勉強夠遮住前身，大腿同面。坐前面嘅好處就係同Ｄ演員好近，可以好清楚睇到佢地嘅表情，化妝同動作，而且有Ｄ高空表演喺下面望上去感覺震憾Ｄ！不過有部份飛車睇得唔清楚，會比個斜台遮住咗！如果再去就會坐上面，試下唔同感覺吖嘛！

好期待快Ｄ帶媽咪去多次呀！！