幫幫手！揀相做油畫／相簿封面

好難揀呀！究竟用邊兩張相做油畫好？邊張做相簿封面好呢？？有D景靚人唔靚，有D人靚但景又一般。。。油畫要一張婚紗一張晚裝，其中一張要係老英格蘭（我都係為咗“佢”先去台中影相咋！），相簿白色水晶面，應該要揾張淺色D嘅相先襯，大家幫幫手比D意見吖！唔該！

候選名單如下：（15張咁多！！！？）

1. 竹林我個人唔係太LIKE，不過最多人話GOOD喎。。。

2. 呢張大樹我覺得超型！但係大家會唔會問究竟係影樹定影人！？

3. 呢張似係正路嘅婚紗相，人又影得OK，不過景就好似普通咗D！

4. 我最愛嘅chapel，不過會唔會太清dry dry地呢！？

5. Chapel入面都好GOOD呀！好台灣FEEL！但做油畫好似冇咩睇，做相簿封面又如何？

6. 呢張油畫又OK，封面又OK吖！

7. 我覺得呢張幾自然又colorful，不過咁嘅post做油畫係咪唔係好適合呢！？

8. 定係揀張羊羊好呀？？好似好開心咁！

9. 呢張個景好靚，仲有JACK JACK求婚花球，不過個人係咪太細粒?？

10. 難得有張打横，仲要係老英格蘭喎！！（雖然只係影到一忽。。。）


11. 呢張老英格蘭背景清楚好多，只不過。。。企喺個水池上面會唔會怪怪地？？

12. 好中意呢個羅馬景同個FEEL，不過近睇兩個都影得唔靚！做相簿封面細細張又得唔得呢？

13. 呢張都唔錯吖！難得我咁主動喎！

14. 老英格蘭夜景會唔會特別D呢！？

15. 超愛呢個羅馬圓亭，日景著婚紗時唔記得咗影佢呀！諗起都傷心！激死人！！！

再睇番D相先發覺原來張張都係遠景，想揾張近少少嘅都冇。。。

板橋費加洛婚禮揀相

我地約咗十二點半揀相（其實佢地一點先開），足足揀咗四個鐘！全程都尚算自由冇壓力，鄭副總開咗D相比我地自己睇就行開喇，冇監視住我地！包包後尾先話 "早知冇人理，我地一早拎隻手指抄晒所有相走啦！" 睇到點幾兩點攝影師勝哥同助手阿智都返咗嚟，因為原定今日影相嗰對新人臨時改咗日期，所以佢地留喺公司冇嘢做，就陪我地睇相，勝哥又請我地飲啤酒，爽！其他同事話佢有兩樣嘢最叻，一樣係影相，另一樣訧係飲酒！哈哈！

個Samsung mon都幾大幾清，zoom近D都唔會好矇，好過Mona Lisa好多！

我地total影咗573張相（我覺得好誇張囉！），但PKG只包60張，大穫！仲有五百幾張點算！？有咗Mona Lisa嘅經驗，第一round我已經好兇狠咁delete淨百幾張，唔係D相唔靚，而係個PKG加埋租車，化妝等等已經好貴，真係唔捨得再比咁多錢買相！Extra買一張相NT＄1,000（已是優惠價），十張NT$10,000，真係好“金”呀！由於佢地冇push我地，任得我地自己揀，所以cut吓cut吓，最後只係要多咗10張相（我好叻吖！），R唔到送多幾張OR softcopy，可能加得太少啦！之後我腦海仲成日浮現返delete咗嗰D相，好唔捨得呀！

證婚律師 - 岑漢和律師 Confirmed

今個月頭已經confirm咗岑漢和律師做我地嘅證婚律師啦！雖然佢回覆唔係最快，態度唔係最友善，佢喺電話中講嘢仲非常之快，快到幾乎聽唔到添！但係一開始佢比我個人嘅感覺係最良好，網上超多好評，價錢又實惠！註冊嗰一刻咁重要咁緊張，證婚嘅律師當然要比到我地信心同令我地感覺舒服啦！

我比咗5個律師嘅資料包包睇，佢揀咗林志達同岑漢和，我話佢知電話中岑律師講嘢好快，佢聽到即話唔好，要揀林律師，但係林律師要六千幾蚊喎！比岑律師貴咗成二千五蚊！太誇張啦！於是我地上youtube睇岑律師嘅訪問片段，佢講嘢又真係令人覺得好舒服同好誠懇，同電話中完全唔同！包包睇完又睇，睇來睇去最後都係揀番佢！

第二日即刻過$1,000 deposit同填返張Application Form比佢，下年一月先約first meeting，攪掂！

Pre-wedding@費加洛 - 老英格蘭日景+日月潭 (Day 2)

同羊羊影相玩得好開心呀！返到老英格蘭即刻換最後一件婚紗轉妝，呢件魚尾see through lace vintage婚紗，大愛！

件婚紗係咪好SEXY呢！


秀琴老師幫我整咗個古典D嘅頭嚟襯件婚紗，其實後面都係梳個高髻，前面一PAT留海，可惜側邊嗰PAT整得唔自然，咁多個造型之中呢個算係最唔滿意！

真係好襯呀！唔係講個人，係個景同我件婚紗呀！！

呢個post超級有難度！勝哥叫我爬上個鋼琴度，我嘅反應係“吓！？“ 條裙勁窄喎，點爬呀老細！？佢比咗放鏡頭個箱我做腳踏，叫我喺個琴後面坐咗上去先，然後sir過去，又真係得喎！


完成老英格蘭嘅攝影便回程返台北，仲有時間可以影多一個景點，本來諗住去鐵道公園，但最後勝哥話去日月潭，都冇所謂啦！反正我地都未去過！點知。。。呢個咁出名日月潭只係一個乜都冇嘅湖，一D都唔靚又多大陸人去！仲衰過香港嘅西貢！早知唔去啦！蝕咗！

呢張係包包用電話影嘅，因為個景真係好唔得，所以一張相都冇揀到！

原本我想去嘅係呢度 ﹣ 勻淨湖，係咪靚好多呢！

影埋個爛鬼日月潭之後都四點幾喇，我地換番便服喺7-11食 "lunch"，無錯！係lunch！七點半食完早餐到四點幾先食lunch！餓到暈咁滯！返到板橋已經八點幾，成個攝影行程就完結啦！攰到爆不過都好好玩吖！返到去司機同造型師都話要收錢先，仲要比cash！嘩！租車，化妝加埋安瓶六千幾蚊HKD喎！邊度得嚟咁多cash呀！去之前完全唔知全部要比cash，唯有出去㩒機囉，好彩7-11都有得㩒，幾方便！而且唔收手續費，個rate仲好過喺機場唱！總之唔唱錢直接㩒機仲抵啦！！

Pre-wedding@費加洛 - 老英格蘭日景+清境農場 (Day 2)

晨早七點半去食早餐，因為八點就要開始化妝，好趕呀！餐廳外面有一排窗口位，我地最早到可以揀位先！哈哈！


自助早餐超豐富呀！烟三文魚都有！GOOD！


八點準時到達秀琴老師約我嘅地點 ﹣ 厠所！呢個厠所好靚好乾淨，冇人去所以唔會有味，有電又有塊大鏡，化妝SET頭勁方便，其他人要喺房度整，唔夠光又冇大鏡，會冇咁方便，都話秀琴老師勁啦！

化好妝等包包時出去影吓相先！呢個係門口，行入去就係reception

個Lobby唔算大，又係一個字 ﹣ 靚！

另一邊Lobby


認唔認得個羅馬水池呀？我地尋晚咪喺度影相囉！

拎住部電話亂咁影都咁鬼靚！不得了！

包包化完妝就正式開始影相喇！一邊睇風景一邊影相幾開心！

呢兩張唔知係影嗰時已經係咁，定後期tune色呢！？我覺得幾好FEEL吖！

包包勁低能，自己拎住阿JACK同我影！我地拖手仔呀！


影咗一輪我發覺唔對路！呢條裙係影羊羊喎！仲有一條婚紗先係影室內嘛！（我自己個PLAN）我就問勝哥點解唔係出去影咗羊羊先，原來佢諗住我係著婚紗影羊，後尾知道我嘅心意，就即刻改行程出發去農場影羊羊！YEAH！

呢個就係清境農場喇！都幾大幾多羊！入場費NT$160/ head，當然要比埋攝影師同助手嗰份啦！不過無所謂啦！

又要讚一句天公造美！好天到不得了呀！

睇吓D羊羊幾可愛！其實係假的！佢地係餓鬼羊！我手上D飼料冇晒，佢地咬我心口D珠珠呀！！


助手阿智好努力咁引D羊過嚟，一冇嘢食佢地就會調頭走，幾冇良心呀！！

影完羊羊又返去老英格蘭轉妝，影埋最後一件婚紗就大功告成啦！

Pre-wedding@費加洛 - 老英格蘭夜景 (Day 1)

我地影完一日相去到老英格蕳已經六點，影夜景時間啱啱好，再晏D就會太黑同好大霧影得唔靚喇！

都好大霧吓喎。。。

一去到check-in完就即刻開始影相，爭取時間嘛！呢個係音樂廰門口

好浪漫呢！

我中意嘅羅馬水池！


呢個三角形尖塔望落去係餐廰，我地影完相就係喺下面食晚餐喇！
唔知點解呢張相影得我咁矮呢！？因為冇著高踭鞋囉！


秀琴老師幫我拆咗D頭飾同假髮，換咗衫就去食飯啦！佢地話七點開始食，晏咗就冇得食！唔係掛！？

我地個PKG包埋晚餐，本身要NT$1,000/ set，包包要牛扒我要羊架，超好味！仲好食過HK嘅高級餐廰！就算要比錢都覺得好抵呀！

睇吓間餐廰幾靚！上面望上去就係我地先前影相嘅地方喇！

食飽飽梗係要夜遊一吓老英格蘭啦！呢度真係好靚！外面裏面任何一個地方都咁靚，難怪我對佢一見鍾情啦！

呢度係全台灣最貴嘅民宿，入面好多裝飾擺設都係歐洲訂返嚟！全部都係貴嘢！

呢個係音樂廰，每晚都會播一啲古典音樂，仲有職員講解添！最重要係有免費酒飲！Black Label or Baileys！GOOD！

聽完音樂就返房lu，聽日仲要晨早起身影相呀！Reception個哥哥帶我地入房，逐part介紹，連套音响點用都講埋，不知幾咁細心！我地比tips佢都唔要呀！

睇吓間房幾別緻！右邊嗰個係暖爐，而家咁熱梗係唔使開啦，可以開著燈當decoration懶浪漫囉，但冬天真係可以用！呢度係冇冷氣嘅，因為夏天有山風唔覺熱，係咪好神奇呢！

好有懷舊味道呀！


最中意佢盞燈！


張床超級大！Time to sleep la...