第十八次產前檢查（政府）

2014-08-08 39WK（東區醫院）

39週喇！都仲未有動靜。。。唯有約見醫生CHECK宮頸，睇吓係咪要催生，一提起催生就有D淆底。。。最怕係催生唔成功到最後要開刀。。。 

時間一日一日咁過去，小包包越遲出世，我照顧佢嘅時間就越少，所以越等就越心急，希望佢快D出嚟啦！

第十七次產前檢查（私家）

2014-8-2 38WK1D

小包包有6磅4啦！我重得少唔係問題，最緊要小包包足磅就得啦！^^

而家頭仔已經轉返向住我，個位靚晒！！Tisha BB, mommy is ready la!! 孫醫生話要順期自然咁順產就要等囉，如果想快D佢都有辦法，不過而家仲有兩星期，都仲可以等吓嘅！

題外話，孫醫生買多咗部機，整多間房兩邊一齊做產檢，所以輪候時間快咗好多，唔使兩個鐘就攪掂晒！超GOOD呀！！

第十五／十六次產前檢查（政府）

2014-7-25 37WK

37週足月喇！隨時生得！不過都仲係咩動靜都未有，助產士問我有冇陣痛，穿水，見紅，有嘅話我就入咗院啦。。。摸完肚話落咗少少盤咋，而家都冇嘢做到，唯有等囉！

2014-8-1 38WK

呢兩個星期我重得好少，所以助產士叫我去駁機CHECK心跳宮縮，CHECK咗成粒鐘眼瞓到我吖！本來以為可以瞓陣，點知原來要自己拎住個制，FEEL到胎動就要襟，即係冇得瞓囉！！CHECK完冇問題，可能呢排食得少行得多掛！聽日見孫醫生就知阿囡重咗幾多啦！

今個星期仲未有聲氣。。。如果下星期都未有動靜就會約見醫生睇吓使唔使安排催生，希望小包包乖乖地自己出嚟啦！

準爸媽工作坊＠東區醫院

2014-7-18 36WK

東區每星期都有兩次 "準爸媽工作坊" 比36週或以上嘅爸爸媽媽參加，好似話都係低危健康嘅準媽媽先可以參加，我好好彩可以參加到，呢個workshop好玩又好有用，總之就係正啦！！

每班只有兩對爸媽，由三個助產士教媽媽玩FIT BALL同教爸爸按摩為我地作產時舒緩，兩PART都好有用呀！希望到時仲記得啦！！

東區嘅助產士真係好鬼NICE，上完堂佢地仲邀請我地影張大合照留念添！

第十三／十四次產前檢查（政府／私家）

2014-7-11 35WK（東區醫院）

今日返東區覆診見助產士，無啦啦話啱週數幫我做埋B型鏈球菌檢查，明明約咗下個星期吖嘛！我完全冇心理準備囉！個助產士好好人好NICE，感覺佢已經好就住我，但唔知點解仲係好痛囉！死啦！我以前明明唔係好怕痛喎，乜而家少少痛都忍唔到，仲嗌咗出嚟添，到生嗰陣都唔知點算！！


2014-7-12 35WK1D（私家）

又等到去見孫醫生同小包包啦！^^
小包包好叻女呀！而家有5磅4（2.37KG）啦！孫醫生話再重多少少到2.5KG就隨時出世都冇問題喇，呵呵！好期待阿囡快D出嚟呀！！

阿囡好健康，標準身型，胎水夠，臍帶冇纏頸，不過佢而家面向出面，如果而家生嘅話個頭仔會頂住我子宮會好痛，最好係調返轉面對住我，希望過兩星期佢會自已轉身啦！

因為小包包已經開始落咗少少盤，所以D超聲波相影得個樣唔係好清，迫吖嘛！孫醫生整咗張大腳仔相比我地睇，哈哈！原來我地一家三口都係大腳八！！^0^

下次覆診唔知生未呢！？如果生咗就唔使覆啦！

第十二次產前檢查（政府）

2014-06-27 33WK（東區醫院）

恥骨痛咗兩個禮拜終於有好轉，期間有做吓瑜珈，又有做吓其他媽媽嘅物理治療師教做嘅產前運動，唔知係運動有用定係自己嘅HORMONE唔同咗，總之就無啦啦好返好多啦！

不過去開東區覆診，順口都同醫生講有恥骨痛問題（因為我地遲到所以今次變咗見醫生），佢就REFER咗我去職業治療部，整咗條唔知乜鬼嘢帶話包住個盤骨等佢合返埋喎！

因為唔係婦產科，所以要比一舊水當新症睇，嗰條爛鬼嘢又厚又硬勁唔舒服囉！同埋只可以企喺度OR行緊嗰時用，坐喺度會"銀"住個肚好痛！簡單啲講即係"廢"囉！！"晒"咗我一舊水同成個晏晝，激死！！

無啦啦好返咗，希望唔好無啦啦痛返就好啦！唔係到再後期又話要行多D做多D運動，咁痛點行喎！！

第十一次產前檢查（政府）

2014-06-13 31WK（東區醫院）

過咗30週開始就要每兩星期返醫院產檢一次喇，其實都幾無聊！政府又冇得照ＵＬＴＲＡＳＯＵＮＤ，只係同助產士傾吓計，模肚同聽心跳。

31週產檢都一齊正常，助產士又話我個肚細，不過佢模完度完就話SIZE好標準，我都知啦！小包包係MODEL身型吖嘛！！^0^　今次助產士講咗好多關於餵母乳嘅資料比我地知，又同我地BOOK咗7/18（36WK）上個　＂準爸媽工作坊＂，到時助產士會教用分娩球，作產時按摩舒緩，育嬰常識同母乳餵哺，好似好有用咁喎！做好D準備到生嗰陣就冇咁驚啦，唔知其他醫院有冇，不過東區咁嘅安排真係唔錯呀！！

第十次產前檢查（私家）

2014-5-31 29WK1D

等咗6個星期，終於可以見到小包包喇！真係等到頸到長呢！！上次係22週時照結構，第一次3D見到小包包個令令樣，而家29週，唔知佢會變咗咩樣呢！？

今次等成三個鐘，等到我同小包包都瞓著咗，哈哈！佢用手遮住個額頭，孫醫生搖極佢都唔醒，睇嚟佢真係好眼瞓！點知佢瞓瞓吓伸咗條脷仔出嚟，好可愛喔！咁啱比我地見到，孫醫生又CAPTURE到，咁就成為小包包其中一張好珍貴好特別嘅靚相啦！冇見一排小包包長肉咗好多，而家手仔都肥啫啫，29WK1D有2磅15安士，好叻女呢！不枉我一個月肥咗7磅！！醫生話佢好健康，標準SIZE，大腿骨長咗少少，似DADDY高大喎，係就好呀，長腿美眉！！^^

呢排除咗PATPAT痛，雙手仲痺到不得了，醫生話係水腫喎！即係要食返清淡D，少鹽少油囉！而家先29WK咋，仲有4份1路程呢！加油喔！！

下次又要等一個月先再見到小包包喇！掛屎人啦！！