先講態度問題，上網好多人話Gipsy態度差，寸！我覺得每個人嘅觀感都唔同，Gipsy個樣係比較COOL，講嘢係比較直，有嗰句講嗰句，好似試妝時佢好直接咁話我黑眼圈好勁，叫我返去要做多D eye mask，唔會話好婉轉咁講，冇修飾，呢個就係佢嘅表達方式！加上佢本身把聲沙沙地，講嘢又冇尾音，比人嘅感覺係幾寸嘅，如果接受唔到都幾難頂！
按佢嘅指示，我喺婚前兩個月問佢拎份新娘image report，之後send返我揾到啱心水嘅造型照比佢，仲襯埋我自己已經confirm咗嘅婚紗／晚裝，加埋喺佢website揾到嘅頭飾，仲有rundown等資料！基本上佢覆返嚟嗰份report入面啲資料係同我比佢嘅一樣，即係咩造型親衫襯咩頭飾都係我自己諗同決定，我原本以為佢會有啲唔同嘅idea，點知係零！定係我比佢嘅資料太充足，所以佢冇發揮嘅空間呢！？？
佢睇完我個rundown就打電話比我傾，因為佢嘅全日PKG只包12hrs，我中午要去教堂註冊所以要好早出門，MUA六點就要到！如果直踩到夜晚就要加好多個鐘OT錢，所以Gipsy建議佢中午幫我換完妝後就休息，唔跟去伯大尼，四點半先去酒樓會合，咁樣就唔使加OT錢，佢連早過七點鐘到佢都冇加我錢，我覺得都fair嘅！不過佢電話中話到時會預備定D急救用品如假眼睫毛，綿花等比我伴娘，最後都冇比！
到BIG DAY當日佢地好準時到，佢做起嘢上嚟都幾COOL唔出聲，有時都幾惡（對佢嘅助手），但對我或者我啲屋企人就冇咩嘢！因為上午一直好忙好趕，我同媽咪都唔記得比利是佢地到夜晚先補返比，我媽咪問佢連埋助手一共有幾多人，佢話5個！5個！？上午有佢＋助手＋幫我媽咪同伴娘化妝嘅MUA，夜晚又有佢＋助手，點解利是唔係按人頭計而係按人次計呢？？不過佢講得出我地都比得起，只係覺得奇怪啲啫！
講返化妝同hair do，可能我自己有化開妝（雖然唔係PRO），之前亦好努力咁研究啲造型，所以要求比較高，我覺得當日嘅妝同頭都比我預期差，亦冇試妝時咁好！
1. 褂LOOK（左），之前我同佢提過我想頭頂整得高D（塊面睇落修長D嘛），但最後都係爭咗少少唔夠高，個髻型又唔夠靚同圓，好明顯喺側面見到個髻係三角型嘅，不過個頭飾真係好靚，另一邊加咗D鮮花，敬茶時兩邊都有嘢睇！個妝都好清好貼（同試妝時一樣，都係碌完面先上妝）！
2. 教堂婚紗LOOK（右），鮮花做花環，上面加個亂亂地嘅高髻，大路嘢應該冇乜難度，我影PW都有整過類似嘅，個花環D花擺得好靚，可惜後尾枕唔夠貼，側邊睇到有泡嘢跌咗落嚟！我對眼本身係一隻雙，一隻多層眼皮，Gipsy用雙眼皮膠水唔係用膠紙幫我痴雙眼皮，而且個位痴得唔好，耐咗就HOLD唔到個型，對眼變咗冇乜神仲好似單眼皮咁添！
3. March in婚紗LOOK（中），諗都冇諗過自已可以襯到all back頭，因為我鰓骨大額頭唔夠濶，all back頭完全表露晒我嘅缺點，之前試妝都有試過真係好唔掂！但係喺最後moment Gipsy游說我整，佢話冇問題，結果出嚟效果好好，好新鮮，亦好多人讚添！！側邊用咗白色鮮花，後面加個閃石頭夾，好elegance！！
4. 迎賓LOOK（左），6個造型中最滿意呢個，spiral fringe本身係我嘅至愛，好多MUA會整到個sprial好幼好工整，我覺得咁樣大舊D亂亂地會型D好睇D，Gipsy整嘅style正合我心意！加上佢嘅頭飾又係超靚，襯晒我件灰＋粉紅晚裝！到時酒樓成個妝落晒敷完MASK重新化過，所以個妝又貼返！
5. 敬洒LOOK（中），個頭SET得有D求其，後面一PAT嘢咁冇乜層次，我之前喺Mona Lisa整嗰個仲靚仲自然！呢個頭飾又唔靚，但冇得揀呢個已經係最襯件衫！夜晚我個人已經開始攰，個樣謝謝地，佢仲加重咗啡色eye shadow，我自己覺得成個妝嘅感覺係差咗！
6. 送客LOOK（右），同我預期中嘅造型差好遠，呢個頭係喺佢嘅porfolio度揾到，佢原先嗰個D圈好大好有層次，幫我整呢個冇乜美感，頭頂做得唔夠鬆，側邊同髮尾更加唔知想點，得一束頭髮又散又亂，現場睇好似好D，睇返相就覺得唔掂！值得一讚係D花襯得好靚，紫色襯返條裙，加埋我最愛嘅黃色，好SHARP！同埋最後一個造型用鮮花有個好處，就係唔使去還頭飾！！
總括而言，佢化妝同hair do係靚嘅，整體感覺幾滿意，不過可以再好D囉，加上佢轉妝唔算快，我中午要去行禮，banquet圍數又多，都花咗唔少時間轉妝所以唔係好夠時間影相！我覺得比得咁嘅價錢其實可以有更好嘅選擇，不過佢而家都好似幫人影PW多，可能真係好似傳聞咁講，佢嫌BIG DAY辛苦唔願做啦！
最後仲有個問題，就係中午轉婚紗造型時，佢幫我上咗好多粉喺身，上粉喺身好正常，影相出嚟膚色均勻D靚D，但D粉"hi"晒落件婚紗度，好深色！婚紗公司話好少見MUA上粉上得咁多咁誇張，最後賠咗五百蚊清潔費，喺呢件事上我唔敢評論邊個唔啱，上粉係有需要，但係咪重手咗？定係婚紗公司誇大咗？無從考究，我只係想講返件事出嚟！
