產前講座（美素佳兒）

2014-4-29 24WK4D（美素佳兒）

其實每次去聽講座都會有唔同嘅得著，學到唔同嘅嘢，所以我地前前後後已經去咗超過十個講座啦！今次呢個美素佳兒係講座又係實習班，之前要上佢地WEBSITE睇完12條片先可以報名呀，真係得來全不易呀！

地點係灣仔Baby Planner一個好細嘅課室，坐得三四十人，人少少可以集中啲！姑娘講解完照顧初生嬰兒技巧，做完示範，跟住就到啲準爸爸媽媽分兩批輪住做啦！好有系統好順暢，一邊做一邊仲有姑娘同工作人員喺側邊教導／協助，唔會ON居居做錯咗都唔知！比起上次惠氏嗰個有用好多呀！！

第一輪教幫BB換衫換片，個姑娘講得好DETAIL，教我地D手指點放，要留意D乜etc.，好細心！

第二輪就幫BB洗頭沖涼，轉手洗背脊對新手爸媽嚟講好難，好彩姑娘從旁指點，總算學識咗！！

第三輪學包包被，因為初生BB好需要安全感，咁樣包住就好似佢地喺媽媽個子宮入面咁，又温暖又安全！！

完成！包得幾靚！！^^

上完呢堂之後照顧小包包嘅信心大咗！希望到時唔會手忙腳亂啦！老公話佢負責沖涼喎！最好啦，我諗起D初生BB咁細粒軟林林咁，真係驚驚。。。有媽咪同老公幫手就唔怕啦！嘿！！