第七次產檢（私家照結構）

2014-4-12 22 WK1D（孫錫鴻醫生）

期待已久嘅一日！今日係同小包包照結構嘅大日子，仲要BOOK到鼎鼎大名，出名又PRO又細心又有醫德，所以閒閒地都要等兩三個鐘嘅孫錫鴻醫生！等咗呢日好耐啦！！雖然早兩個禮拜已經喺東區照過，但真係好唔放心吖！有照等於冇照！激氣！！

孫醫生以前喺康翹度做，嗰陣已經係專幫人照結構，因為唔係個婦產科醫生都識照，確實係要好PRO至得！上年佢出咗嚟自己開業，好評如潮，客人越來越多，我地8月媽媽GROUP都有好多媽媽揾佢做產檢！佢間診所好舒服，仲有個梳打餅TOWER呀，幾細心！！

我地準時十一點半去到登記，量血壓，磅重，驗尿，姑娘十二點叫我地出去食啲嘢行吓先，兩個鐘頭後返嚟，我地梗係做足準備，未食早餐，諗定有乜街好行消磨時間！姑娘兩點半打嚟話就到我，我地即刻返上去，兩點八就有得睇啦，三點鐘攪掂！但等出報告，DVD，埋單都要成個鐘，前前後後四個鐘冇走雞！真係好time consuming吖！呢個咪就係我遲遲唔揾孫醫生嘅原因囉！！

講返照結構先，孫醫生真係超PRO，可以用快狠準嚟形容佢！基本上佢隻手一放落嚟就已經啱晒位，郁一下又到咗下一個位，超勁！我仲好stupid咁問佢係咪真係睇到心臟D血管有冇搭錯（因為電視都有講過好難睇，亦都真係有醫生話明未必睇到），但孫醫生話睇到吖，已經幫我睇咗添！一下又PAN返去個心度解釋比我聽！仲玩嘢咁PAN去小包包個鼻同個口度，快到我追唔切添呀！！老公話小包包鼻尖尖似我喎！^0^

我問孫醫生點解我成日都FEEL唔到小包包郁，佢話小包包係女仔比較斯文，好多時郁咗我都未必會FEEL到！小包包今日好可愛呀！係咁抹面抹咀仔腳撐撐，喺個MON度見到佢郁但我又真係FEEL唔到喎！可能女仔係細力D啦！仲有，孫醫生解答咗我心里面嘅困擾，就係點解我個肚睇落咁鬼細！！佢話因為我本身冇肚腩喎（O咗咀！），小包包嘅SIZE非常標準，好健康，無需要擔心！哈哈！原來小包包同我都係標準身型呀！！

第一次4D見到小包包郁來郁去，仲見到佢個樣，so amazing!! 下次覆診應該清楚好多，可能可以睇到似邊個添！孫醫生包埋DVD，CD同相，成個PROFILE好整齊，正呀！！如果一開始就揾佢睇，咁就可以由小包包幾WK開始儲齊一SET啦！！遲咗LU！