馬B Bingo!!

上年（2013年）最後一個月收到一份大禮物，好開心！但又好擔心！好驚會重覆上一次不愉快嘅經歷！！我都知唔擔心得咁多，呢個係上天送比我地嘅禮物，我一定要好好守護佢！終於，有驚無險，捱過咗頭三個月啦！而家終於可以大大聲聲講：“我有咗喇！！”

諗返起12月嗰陣，姨媽遲咗4日都未嚟，我用大衛綠D驗咗幾次都係白雪雪乜都冇，終於忍唔住去萬寧買咗支CLEARBLUE電子驗孕棒（＄89用一次好貴呀！），呢支嘢好神奇呢，連幾多WEEK都驗到呀！！

呢度顯示1﹣2WEEK，即係醫生所講嘅3﹣4WEEK，如果按照LMD（Last Menstruation Date)計，已經係4WK6D啦！

Confirm有咗之後，9個月嘅監獄生活正式開始啦！生蠔刺生海鮮辣嘢甜嘢凍嘢酒精全部都要戒，做任何事都要慢動作同小心，人多嘅地方不能去，臨近聖誕同新年，本來約好晒嘅節目都要取消，又要揾藉口唔可以比人發現，咁同坐監有咩分別呢！？？不過都係開心同值得嘅！母愛真偉大！！而最大嘅得益就係吸塵拖地浪衫煮飯洗碗洗廁所換床單所有家務都唔使我做，淨係負責食同瞓囉，呵呵！真係要多謝老公！！

我個人比較崇尚自然，而且諗住餵人奶，所以會揀自然分娩，少少苦楚算得係咩吖！開刀雖然唔使經歷陣痛之苦，但之後調理要花好長時間，如果餵人奶就會冇咁方便！所以我諗都冇諗就決定順產，順產就梗係喺政府生啦，慳得就慳嘛！十萬八萬唔係比唔起，但無謂囉，留返D錢嚟補身或者比小包包做書簿費好過啦！但係排政府嘅同時，我都會揾私家醫生做產檢，兩邊CHECK穩陣D吖嘛！

一般6-8WK會做第一次產檢照超聲波（私家），我就BOOK咗7WK做，6WK驚早咗少少，如果遲排卵照唔到心跳咪自己嚇自己！8WK又好似耐咗少少，等唔到咁耐呀！好心急呢！揾咗一輪，比較出名嘅婦產科醫生都好鬼FULL，新症起碼要排一兩個月先有期，有D又冇星期六（因為要就老公喺HK所以一定要揀星期六），有D如果你唔係揾佢開刀生佢直頭唔接新症添！最後揀咗翹康醫務中心，呢間嘢喺尖沙咀同沙田都有，係專睇婦產科嘅，裹面有好多個醫生而且個個口碑都唔錯！產檢報告下回分享！