第一次產檢（私家）

2013-12-8 7WK1D（翹康葉承楷醫生）

第一次產檢，好緊張呀！之前成個禮拜發惡夢，瞓得唔好，因為上次嘅陰影，所以好驚今胎又有事！去到尖沙咀美麗華翹康，登記，量血壓，磅重，好多人，不過唔使等好耐，可能佢地多醫生啦！

葉醫生都幾NICE，年紀稍大，上網睇D人話佢係教授級好高學歷，佢先問咗我D病歷傾吓計，原來老公有G6PD (蠶豆症) 會遺傳呀！係仔嘅話就麻煩D，咪即係同老公一樣囉！女就好D症狀會冇咁明顯，可能到老咗抵抗力差咗先會發出嚟！

傾咗陣就照ultrasound喇，開頭試照肚先，但我唔知原來照肚要忍尿先易照，臨入去前仲去咗次厠所，所以照唔到！我見照唔到嘢勁驚，差D想喊，葉醫生話試吓照陰超，會近D清楚D，好彩，照到有心跳！佢問我經期係咪好遲，係咪唔準，我話30日都幾準呀，佢又冇再講咩！咁我問返佢係咪個胎唔正常size細咗，佢又話唔係，算係範圍以內！我之後上網睇返，話7WK個胎正常應該有1CM，但我個得0.57CM，細咗差唔多一半喎！又好擔心！囉囉戀唔知有冇問題！於是BOOK咗三星期後睇第二個私家醫生，諗住攞多D唔同意見！