第四次產檢（政府）

2014-2-14 11WK（東區醫院）

今年嘅2月14日西方情人節，適逢係農曆十五元宵節，喺呢個咁特別嘅日子，我做咗一樣好特別嘅嘢，就係放半日假去醫院做產檢啦！其實今日都係去做基本檢查啫，政府除咗CHECK唐氏同結構之外，每次產檢都係冇得照超聲波嘅！

一去到先去護士工作室量血壓，磅重，驗小便，之後就等叫名見醫生，D姑娘好好呀，叫個清潔姨姨小心拖地同放好D用品，費事KICK親D大肚婆，又逐個人吱D消毒藥水比我地洗手，好好SERVICE！！等咗大半個鐘終於到我啦，個女醫生好NICE，問完病歷之後就講唐氏篩查嘅結果，上次度頸皮係2MM，驗血結果1/2900屬於低危！但我見其他媽媽嘅結果都係幾萬份之一，所以都有少少擔心。。。

傾完之後就檢查陰道，醫生手勢都OK，醫生同姑娘都好細心，係咁叫我小心D！跟住就用聽筒聽心跳，因為之前私家產檢冇聽過心跳（醫生話BB太細用咁高頻唔係幾好喎），所以今次係第一次聽心跳呀！好似火車聲咁好得意呀！！全程都唔使十分鐘就攪掂LU！約埋結構期就走得！^^