第二次產檢（私家）

2014-1-18 10WK1D（黃婉霞醫生）

上次喺翹康做產檢唔係唔好，不過葉醫生答嘢有少少無稜兩可，攪到我個心囉囉戀，同埋我都想睇多幾個醫生，睇吓唔同醫生會有咩講，所以今次揀咗另一個女醫生！黃醫生嘅診所喺雅蘭（我最怕去旺角！！），都方便嘅，去到要驗小便，驗到我D尿糖份比較高，因為我早餐飲咗杯熱檸蜜，即刻驗得出！醫生叫我唔好食咁多甜嘢，孕婦好易有妊娠糖尿嘛！

傾咗陣就照肚啦，佢個MON放喺旁邊唔係上面，睇得有少少唔方便，小包包好叻呀！大個咗好多！而家有2.7CM啦，實際週數係9WK4D，又係爭咗幾日，不過冇咩影響嘅，今次照完之後真係開心晒！成個人鬆晒！冇晒之前嗰D不安同擔心！不過之後仲要CHECK 唐氏同照結構，真係考試都冇咁緊張呀！希望小包包健健康康順利過關啦！！

產檢完之後見有個媽媽填FORM入奶粉媽媽會，咁我地當然唔蝕底一齊填啦！填完仲即時送埋奶粉添，正呀！放喺屋企以備不時之需，第時小包包唔食人奶可以比佢試吓邊隻啱食先買！診所人個姑娘話illuma好貴其實一般BB唔需要食，除非腸胃有問題先要食，雅培好臭一陣味唔係人人接受到，A+同惠氏就要同強國人爭，成日冇貨！淨返美素佳兒應該係最正常啦！！不過到時都要睇吓小包包中意食邊隻至得！