Day 21 裝冷氣 - 嬲到震!!（不幸事件五）

（不幸事件五）

早兩日優質倉派咗兩個人嚟裝冷氣，成六點先到，激死！好彩冇比人投訴夜晚開工咋！裝到十點幾先攪掂！佢地到咗現場打嚟問要唔要鑿牆穿條喉過去，咁樣就唔會見到條明喉好睇D，如果鑿牆就要加多＄600！（另一做法係叫裝修師父喺幅牆度做個木“朗”遮“住條喉，咁樣做會貴好多，同埋最好係裝修師父一次過裝埋冷氣，預位會方便D！）除咗鑿牆之外，又話原本窗口機個石屎台低得滯，所以要做多個鋁架放個散熱，又加＄300，兩樣夾埋要比多成千蚊！！我越諗越唔對路，我地買機時比咗千六蚊安裝費，咁究竟包D咩呢？？

上網揾吓，原來一般都係包雪種銅喉同去水喉（10-20尺不等），鑿牆窿（有D包有D唔包，4"-5"深，我地裝冷氣個位起碼8“深。。。），拆舊窗口機（分體另計），除呢幾樣基本嘢外其他都要加錢！我地買機時冇問清楚包D乜（其實係唔識！），裝機時先知仲有咁多嘢要整，唯有任人宰割！所以買機前一定要問清楚安裝包乜唔包乜，再唔係就比一舊水上門睇位再報價！以下係上網揾到嘅安裝收費表，嗰兩個冷氣師父食水都唔算好深，不過，仲有下文。。。

窗口式冷氣機安裝收費表
標準安裝：	每部計$
1/2匹至1匹(有石屎冷氣窗台)	180.-
1/2匹至1匹(無石屎窗台需做鋁架)	250.-
1匹半至2匹(有石屎冷氣窗台)	250.-
1匹半至2匹(無石屎窗台需做鋁架)	300.-
2匹半至3匹(有石屎冷氣窗台)	300.-
2半至3匹(無石屎窗台需做鋁架)	350.-
如需加吊或腳撐	80.-
如在同時施工下之特別安裝收費如下：
#拆舊冷氣機及鋁架	80.-
(有電梯到達樓層可免費代棄舊冷氣)
#拆舊鐵架	80.-
#在許可情況下加裝模準兩米去水喉	50.-
(1匹半以上已包括做標準去水喉)
#加裝鋅鐵水盆連兩米去水喉	300.-
#選用古銅鋁安裝(特別顏色另報價)	150.-
#配新玻璃(100平方吋以內)	100.-
#如鐵窗框位置不夠安裝，需要改大窗框每邊計	80.-
(在可以安裝情況下，鋁框不另收費)
#鋸防盜鐵窗花	150.-
#改/鋸鋁窗T骨及活動鋁窗一對	需睇位報價
#改/鋸鐵窗T骨及活動鋁窗一對	需睇位報價
#拆鐵氣窗(鋁氣窗則不另收費)	80.-
#拉電線由電錶至安裝位置(包有燈曲架掣)	450.-
#加設燕梳臣在機頂，須安裝前預約	100.-
#更換曲架掣	80.-

分體式冷氣機安裝收費表
標準安裝：	每部計$
3/4匹至1匹	1,400.-
1匹半	1,600.-
2匹	1,800.-
2匹半	2,500.-
3匹	3,500.-
3匹以上	需另報價
標準安裝包括20呎雪種銅喉，20呎去水喉，一個4吋內磚牆窿、玻璃或木窿。以上安裝收費需安裝於安全之石屎台面板或固定物上。
分體機安裝之電力，需由人客負責供應合格之電力裝置。
拉電線由電錶至安裝位置(包有燈曲架掣)	450.-
如在同時施工下之特別安裝收費如下：
#加長接駁雪種銅喉(外層加黑色隔熱膠)，每呎計	50.-
#加長接駁雪種銅喉(外層加白色隔熱膠)，每呎計	65.-
#加長接駁去水喉(外層加黑色隔熱膠)，每呎計	30.-
#加長接駁去水喉(外層加白色隔熱膠)，每呎計	45.-
#轉換白色雪種銅喉隔熱膠	200.-
#加裝白鋁架	200.-
#選用古銅鋁安裝(特別顏色另報價)	150.-
#配新玻璃(35吋 x 20吋以內)	100.-
#拆舊窗口式冷氣機及鋁架	80.-
(有電梯到達樓層可免費代棄舊冷氣)
#拆舊分體式冷氣(2匹以下及只適用於安全情況下)	800.-
(有電梯到達樓層可免費代棄舊冷氣)
#拆舊鐵架	80.-
#鋸防盜鐵窗花	150.-
#拆鐵氣窗(鋁氣窗則不另收費)	80.-
#拉電線由電錶至安裝位置(包有燈曲架掣)	450.-
#加裝PVC燈喉	350.-
#鑿牆窿超過4吋需加收每吋	200.-
#鑿牆藏雪種銅喉及去水喉	需睇位報價
#如需搭建棚架安裝	需睇位報價

抽油煙機
標準安裝：	每部計$
#包十呎6吋鋁喉及開玻璃窿	200.-
#拆舊機	50.-
#開木製廚柜窿，每個	50.-
#拉電線由電錶至安裝位置(包有燈曲架掣)	450.-
#鋁喉加長(每呎計)	25.-
#如需做鋁架吊機安裝	120.-

電熱水爐
標準安裝：	每部計$
高壓式(包10呎銅喉，連三個接駁配件及5呎電線)	350.-
低壓式(包5呎銅喉，連三個接駁配件及5呎電線))	250.-
#銅喉超長，每呎	15.-
#拉電線由電錶至安裝位置(包有燈曲架掣)FUSE掣另議	450.-
#接駁配件，每個另加	15.-
#如額外鑽過牆洞，每個計	30.-

Confirm比錢之後佢地就開工，嗰時六點幾我嘅裝修師父已經收工啦！唔通陪你OT咩！！冷氣師父自已裝完走人，第二朝裝修師父返到去話見到個廳成個戰場咁，一遍頹垣敗瓦，混亂不堪！佢話執咗成兩個鐘先開到工喎！！師父幫我試過部機都幾涼，新機梗涼啦，唔涼就慘喇！！我睇嚟睇去睇咗好耐，硬係覺得部機歪歪地，定係幅牆唔平行呢！？

喺石屎台上面加多咗個鋁架，我都唔明點解有個台都仲要加＄300整個架。。。

買機時叫佢包埋塊封窗玻璃，但原來包嘅size係27" x 16"，我呢個窗大咗，阿冷氣師父話已經做大咗2“玻璃比我，但下面仲有寸半位唔夠蓋，所以加咗條鋁條！

裝修師父幫我睇過，話佢地吱玻璃膠吱得唔好，左下角有幾寸位D膠吱唔到位，驚之後打風落雨有機會滲水，最好叫佢地返嚟再整過！


最嚴重嘅係，佢地鑿咗我幅牆又冇同我“忟”返好！師父話佢鑿到咁低“忟”唔到，因為D喉有彈性，“忟”D英泥上去食唔實唔知點攪，要叫佢地自已嚟攪返！！如果佢地一早嚟裝機，師父就可以幫我睇住佢地，有咩問題都可以即刻出聲啦！！而家攪到PAT屎咁都唔知點算！！

冇計啦！唯有打返去優質倉，叫佢地再約師父上嚟，順便問清楚佢地安裝係點計，點知揾咗成日都揾唔到之前serve我地個姨姨，又話忙緊，又話有客，講緊電話，做緊嘢，有冇咁好生意呀！！？總之就好似潛咗水咁！！留咗幾次電話都冇人覆過我！！到夜晚再打去忍唔住發火，而家算點！？買機嗰時就好招呼，而家錢就比咗，裝機裝到一PAT屎咁未攪掂就走咗去，打嚟揾人又揾唔到！次次話覆我又冇覆過！！終於佢地話幫我叫師父再返嚟攪，叫師父直接打比我！又等到第二朝，冇聲氣！！淨係前嗰晚收到whatsapp叫我入返九百蚊！冇嘢呀！都未攪掂就追我比錢！！係咪有病！！今朝再打去優質倉，話約咗師父聽日嚟整，約咗？我唔知喎！冇人通知我！！咁嘅售後服務真係等執笠！！唔當佢黑店都唔得啦！！！


希望聽日真係嚟攪返掂啦！唔係都唔知點算。。。