Day 15-17 繼續鋪磚, 裝洗手盆櫃, 傢俬度尺

上星期終於鋪好晒全屋嘅磚啦！上埋掃口粉，師父叫我地星期六唔好上去住，星期日先去睇，怕我地唔小心整到D磚就大件事啦！ 所以約埋傢俬鋪星期日一齊去度埋尺，由於而家係旺季，傢俬要兩至三星期先可以起貨，希望趕得切比我地入伙啦！！之前一路好順利，所有嘢都係喺計劃之內，點知。。。上星期日一日內發現咗三樣超出預料嘅事，真係灰晒！！

上到去成塊地都用膠同紙皮遮住晒冇嘢睇！

厠所洗手盆櫃裝好咗，真係變咗綠色！
唔知點解成套櫃裝好之後又覺得個鏡櫃大返D，都幾靚吖！！睇真啲。。。咦。。。

。。。咦。。。洗手盆上面凸咗條邊出嚟嘅！？？見到兩款唔同磚，點解個櫃唔裝高D呀師父！？咁大條邊唔係睇唔到吖嘛！！？即刻打比師父，佢話已經鑲咗上牆改唔到喎，之後加返玻璃膠就唔覺！雖然只係得半寸位，但對我嚟講都幾礙睇囉！！叫佢拆出嚟再裝過又驚整花整欄個櫃，好唔開心呀！！！

（不幸事件一）

傢俬度完尺，我地就醒起叫師父裝櫃頂燈，因為傢俬鋪唔包燈的（Design House嗰D貴嘢就會全包），點知原來個電工師父只係幫我地加咗個蘇位攞電，冇駁埋電源開關！！即係D燈要一年三百六十五日一日廿四小時長開，又或者係爬上櫃頂抆走個插蘇囉！！磚又鋪好晒，冇理由再鑿過幅牆整啫，再鑿過都幾大工程，到時整到D地台磚點算！！好彩醒起附近有間好大嘅燈鋪，即刻走去問，佢地話可以加個搖控駁落支光管同個插蘇度，用搖控開關，＄150一套，唔好煩即買兩套，一套for廳C字櫃一套for房衣櫃，問題算做解決咗。。。（後尾朋友仔話買＄90套，蝕咗！唯有同自己講貴D襟用D冇咁易壞！！）

（不幸事件二）

不幸事件三下篇先講。。。灰。。。