不幸事件三 - 漏水

（不幸事件三）

前篇講完不幸事件一同二，問題都唔算話好嚴重，最後呢單（希望真係最後）就大穫D，係浴室個水閘有問題，師父話較唔到大細，浴室D水好慢出唔到，好多樓齡有返八九年嘅都會有呢個問題（咁快！？）所以佢鑿咗浴室同廰幅牆換個閘制，水制已關，但我地去到見條喉仲滴緊水，仲越滴越多，打比師父佢話冇問題，只係水尾，佢星期一會過嚟整，水尾？？每秒三四滴喎！我地再叫管理處嚟開水錶房關過個水制，原來係未關實，但關實咗之後都仲係有滴水，由每秒三四滴減至每秒一滴。。。

D水流到大細房門口，D紙皮都濕晒。。。

個水制位喺浴室門口右邊，用咗塊舊窗簾嚟索水都係濕晒！！


門口位仲有一忽未鋪磚，底嘅石屎地都有水印。。。


因為真係濕得好嚴重，我地用條毛巾綁住條喉，引D水落個盤度等佢唔使再流到成屋都係，開頭個幾鐘已經裝滿咗大半盤，我地唔放心，食完飯再返上去倒水，諗都諗到，咁細個盤邊有可能捱到第二朝！！！

關實咗水制之後，三個鐘又有大半盤水！於是加多個盤分流，希望多個盤可以捱耐D。。。

真係唔敢想象第二朝嘅情況，間屋會濕成點？會唔會成間屋都係水？幅牆同塊地濕成咁會唔會有水漬？會唔會發霉？會唔會滲到落下面嗰層比人投訴？？整返之後會唔會又漏水？十萬個問號！十萬個擔心！！

今朝一早打比師父，佢話已經攪掂冇問題，乜都話冇問題，幅牆濕咗冇問題，等幾日佢乾返先㧥灰油油，D磚都冇問題，因為鋪磚時用泥水都係濕的，D英泥又有防水所以唔怕。。。師父究竟講真定耍我？？係咪氹我先乜都話得得得冇問題？佢有冇厄我有冇隠瞞呢！？真係好驚呀！