Day 6-8 拉線, 廁所防水, 泥水, 砌企缸

上星期師父好似hea hea地，一來佢有第二單工程做緊，二來我地訂咗磚未到，所以佢就拖慢嚟做！幾日都係話拉線，我地又唔係拉晒全屋D電線，淨係加幾個電制位，改咗個寬頻位之嘛，唔使攪幾日掛！

廳個C字櫃同房個衣櫃都會加頂燈，所以叫師父加多個蘇位喺櫃頂

飯廳原先個燈位勁貼牆，要改返開少少


電視會掛牆，喺TV wall入面做條糟藏電線，高度應該要就返梳化位，不過我地未買梳化又唔知點預，所以叫師父自己幫我地預！

廁所鏡櫃上下都要加燈，師父喺牆度鑿咗兩個孔拉線，之前要講明比佢知個洗手盆櫃幾高鏡櫃幾高，等佢預位！

仲有寬頻位由梳化個邊改去電視櫃個邊，咁router就可以放埋喺電視櫃！朋友仔仲教要預喇吧線位，不過我地唔追求呢D享受所以冇整！開工之前要諗清楚D傢俬擺位同電制位，唔係整好先發現唔啱就真係揾嚟攪！！

廁所個企缸砌好啦！比預期中細。。。無辦法啦！鬼叫個廁所窄，再整大D就唔夠位放屎塔喇！！

師父放咗個唔知乜東東喺木櫈上面，原來係紅外線水平尺，好PRO吖！！


之後師父做防水，倒咗D好似白膠漿咁嘅嘢落地下，好鬼嗅！！佢仲叫我快D走唔好聞咁多！

下篇講收磚！！好緊張呀！！