買大門, 冷氣, 梳化, 餐枱

大門

爭持咗好耐買唔買大門，舊嗰度門本身都幾新同實淨，但因為上手業主裝多咗個老虎鎖，拆咗就會有D樣衰，但係換大門連安裝要四五千蚊，我覺得好唔抵囉！！點知師父以為我地已經決定咗換，鋪磚時据爛咗個門腳，就係咁，唔使諗，唯有換啦！！

去返歐洲木業睇，我地喺佢度買咗房門同廁所門，服務唔錯，價錢都算平！顏色冇得揀，因為屋苑規定要用返呢隻紅櫸木，我地揀咗隻貴少少嘅款（隻色已經咁衰冇理由仲揀D老土款啫！），連埋門框門線門鉸，開埋門鉸，埋單＄3350，屈佢免費送貨（本來要加＄50），不過唔送上樓！普通D嘅款二千幾蚊都有，算啦！都唔爭在！！

冷氣洗衣機

買電器上price.com.hk check 價錢好方便，有晒唔同牌子型號，價錢，鋪頭名，聯絡方法，價錢比一般電器鋪平少少，由幾百至千幾不等！我要買嘅嘢唔多，只有一部3/4匹窗口式冷氣，一部2匹窗口式分體，同洗衣機，問過幾間電器鋪同連鎖店，冷氣安裝費間間都唔同，特別係窗口式分體，由千幾至二千蚊都有！有D仲要收$100睇位費（落單可以退返），窗口機平D二百五至三百，洗衣機就會包埋安裝！揾咗以下三間都幾平可以參考吓：

1. 新一代電器 - 價錢最平，送貨加$100，上網訂購，無門市，貨到付款，如果買洗衣機雪櫃電視嗰D可以考慮，但冷氣機要安裝就好似有間鋪有埋師父會穏陣D！

2. 百誠 - 門市喺太子，幾十年老字號，比較老實穏陣，以前細妹幫襯佢買晒全屋電氣，價錢比其他電器鋪較平，但我打去個女仔聽電話，問佢咩型號價錢都唔係好知，叫我留電話覆我又冇覆！咁冇誠信點叫百誠？？本來諗住直接去佢鋪頭問，但最後去咗優質倉冇去到lu！

3. 優質倉 - 淨機（未計送貨安裝）價錢最平，應該算係直銷嗰類，開頭無乜信心，只係見佢價錢平諗住睇吓冇蝕抵！旺角新填地街有成層showroom，serve我地個姨姨都幾pro，唔同牌子型號甚至屋苑都好熟！即場報價價錢可能爭少少（之前電話問百誠都係），但你話返佢知price.com個價佢會平返比你！

優質倉 旺角陳列室 - 旺角新填地街470號海島中心22樓全層
優質倉 屯門陳列室 - 屯門屯喜路2號栢麗廣場 2618室

廳會裝窗口式分體，因為比起窗口機靜D慳電D靚D（靚D係重點！），比普通分體機安裝維修都方便D，唔使撘棚，喺原本窗口機個位伸個散熱出去就得，再封返塊玻璃，攪掂！但窗分牌子選擇唔多，有飛哥，樂聲，開利，樂信，美的，珍寶，金章！大金同日立都冇，最後揀咗珍寶，專做冷氣好似穏陣D，電器鋪都多數推介佢！

General珍寶ASWX18FAT 2匹窗口式分體 - $6740+1600安裝=$8340（免費送貨，免$160做塊玻璃封返住個窗）


主人房嘅窗口機本來想揀日立，但日立濶咗半寸唔夠位裝，激死！所以揀埋珍寶！細房嗰部唔換住，慳返少少！
General珍寶AK712FNR 3/4匹窗口機 - $2130+250安裝=$2380（免費送貨）

買兩件貨品仲有嘢送添！送咗個電子測脂磅，哈哈！啱晒我！！

仲有洗衣機未買，因為我想買百朗1000轉 7KG嗰部已經唔出，新款貴D又冇delay timer，唔抵咗！姨姨介紹呢隻Bloomberg世邦歐洲牌子，聽都未過，要再做吓功課先！灰色好型呀！！

梳化

我地買咗樓之後第一樣睇中嘅嘢就係呢張灰色絨布L型梳化，一直對佢念念不忘，每次去襯E-MAX都會探吓佢，點知．．．新歡突然出現，我地仲毫不猶豫一致決定要變心迎接新歡！

新歡出場！喺DSC見到呢張灰色布藝梳化，坐落去感覺脹卜卜好舒服，背靠又高D睇電視唔使昂高條頸，重點：價錢平一半有多！又係唔買對唔住自己！！坐三兩年換過張都抵啦！

餐枱

我對餐枱嘅要求好簡單，款式簡單唔使雕花，唔要圓枱長方型枱，方方地方便打麻雀嘛！唔要玻璃唔好咁大張，因為我太輪盡，成日撞襯會好危險！呢張黑色磨沙唔怕手指模唔怕刮花，又可以開大好方便！重點：又係價錢平！！買埋張梳化九折再九折，折咗之後唔使二千蚊！抵！！姨姨仲送咗兩張＄100 cash coupon，遲D買吸塵機可以用！

而家D傢俬電器都買得七七八八，係爭D家品嘢可以入咗伙先慢慢加，希望裝修順順利利快D攪掂啦！！