第九次產檢（政府）

2014-5-23 28WK（東區院醫飲糖水）

今日終於都到28週即係7個月啦！感覺又跨出一大步，距離DUE DATE越來越近喇！雖然呢排懷孕中後期嘅徵狀越來越多，攰，抽筋，腰痛PAT痛大脾痛，不過仍然係開心，充滿期待嘅！

今朝晨早八點幾返東區飲糖水驗糖尿，都幾多媽媽一齊喎，坐滿晒！之前聽D媽媽講話杯嘢勁甜勁難飲又大杯，飲到反胃作嘔，真係好鬼驚吖！仲要我平時都唔飲甜嘅乜滯嘅。。。

姑娘講解完就輪住去抽血，抽完血各自開始飲，話最好十五分鐘內飲晒喎！飲咗兩啖，味道都唔錯吖！唔算好甜，係有少少“確”喉，但可以接受呀！唔便五分鐘KO咗啦！係因為空肚飲所以有D胃氣頂住要飲慢D同ER返D胃氣出嚟，不過完全冇想像中咁恐怖！加支飲管易飲好多添！！全日都冇收到電話即係過關啦！YEAH！又可以食甜品啦！！^0^

其實飲唔係難飲，反而係等嗰兩個鐘先最辛苦，空住個肚好唔舒服，有媽媽最後都係頂唔住嘔咗！SO SAD！！好彩我約咗助產士覆診，時間快過好多！覆診都係傾吓計同聽心跳，一切正常！反而好期待下星期去孫醫生度可以見到小包包呀！！

仲有原來東區都可以SKIN TO SKIN，喺產房已經可以試埋身餵奶啦，好興奮呀！希望到時成功啦！！