永安大減價

2014-5-16 27WK

開頭望住個BB SHOPPING LIST好似好多嘢要買咁，點知睇吓買吓又送吓，其實都淨返唔係好多嘢要買！起碼衫仔，車仔，床仔都唔使買，奶樽，沖涼，清潔用品之前都買咗，今次主要都係買張HIGH CHAIR同少少林嬸嘢，本來一心諗住等AEON BB展一次過買連送貨，點知佢今次得九折＋九折（冇咗會員折上折），又唔算好平，所以最後去咗永安買，起碼有八折！

今次嘅SHOPPING LIST得幾樣嘢，不過最後都買唔齊！

1. APRICA High chair ﹣ 爭扎咗好耐最後都係買咗藍色波點，＄2390八折後＄1912（買滿＄2000仲送＄100 COUPON可以即時扣埋！）

COMBI嗰張貴幾十蚊但送多個COVER，個COVER都成百二蚊！但係我唔LIKE COMBI個款，所以最後都係買返APRICA！

2. 0/3 BABY雨篷 ﹣ 夠平！諗住搭單搭夠＄2000咋！

3. MIDES竹炭紗巾 ﹣ 質地超滑，同小包包沖涼一定好舒服！！上次AEON有八折但冇買到，今次得九折，爭少少，算！

4. BABY GANICS奶樽洗潔液 ﹣ 之前已經買咗佢嘅萬用清潔劑同洗衣液，有機嘢又MADE IN USA，價錢唔貴用得過！

5. 010托腹帶﹠束腹帶 ﹣ 因為我好怕熱所以本來冇諗住買托腹帶，但呢幾日個PATPAT同大脾痛到差D行唔到，見永安有010就埋去試吓睇吓啱唔啱用啦！嘩！一試帶上身勁舒服，真係冇籍口叫自己唔買（唯一籍口咪冇discount囉！）跟手仲比個姐姐SELL埋條束腹帶（有八折），冇分SIZE所以而家買定都得！010價錢係貴少少，但質地真係超舒服，好過六甲村好多！

6. 100﹪純腰果粉 ﹣ 聽D媽媽講話日日飲腰果粉可以去到便便，點點綠呢隻係100﹪堅果造好健康！喺永安買滿千五蚊有得抽奬，我地抽到＄30 CASH COUPON，罐嘢原價＄135，特價＄110，用埋張COUPON即係＄80，抵到吖！哈哈！！

7. 消毒奶煲套裝 ﹣ 四百幾蚊連埋樽真係好抵！但我又爭扎咗耐都仲未決定到買唔買，反正我都係一心諗住餵人奶，咁等小包包出世後有需要先買啦！

8. DISNEY BABY寢具套裝 ﹣ 之前喺SOGO見過但冇買到，之後揾咗好多地方都揾唔到！今次永安都冇，失望！唯有寄望月尾一田啦！！