1st Gown Hunting@In Wedding, 紫水晶, Beauty Hera, Wedding Gallery

上年十一二月我地已經好勤力咁去睇／試婚紗晚裝，包包睇得不知幾開心，佢仲緊張興奮過我呀！第一站係尖沙咀區，因為個人嚟講對百利冇乜好感，覺得D鋪頭好細間，試衫唔方便，同埋主要做姊妹裙多，所以冇打算去睇，主力都係喺金巴利道，夠集中嘛，唔使四圍騰！

我之前都有上網做定功課，好多blogger寫嘅資料都好長盡，我揀咗D有得免費試嘅先去睇，冇得試我就唔會考慮，因為唔著上身根本唔知件衫啱唔啱自己，又試唔到個cutting，feel唔到D料同手工靚唔靚！

In Wedding 童話婚紗
尖沙咀金巴利道42A地下
Tel: 27231498
由於佢喺街頭，所以我地第一間就入咗去睇，嗰日係平日晏晝冇乜客，個sales姐姐好熱情招呼我地，有個貌似老闆娘嘅嬸嬸仲係咁介紹D婚紗（好長氣呢！），最後試咗一件婚紗兩件晚裝，唔知係咪因為第一次著婚紗，所以一試上身就好中意，上身嘅剪裁著得個人好slim，裙身係剪碎紗，好有層次同立體感，拖尾超大超長！My cup of tea！！晚裝就一般啦，冇我中意嘅開心黄，D款都麻麻地，好多都好似熟口熟面咁！仲有佢地D衫感覺好似唔係好新淨，可能舊款嗰D冇清走啦！個sales姐姐聲稱自己係成條街最多款嘅，有四百幾件婚紗晚裝喎！

紫水晶
尖沙咀金巴利道48號東匯大廈1樓A室
Tel: 26012880
佢地有好多本相簿，但我未睇完已經唔想睇，因為完全冇feel，全部都係大路款，勁普通，可以免費試但冇興趣試囉！

Beauty Hera 希臘女神尖沙咀金巴利道52號
Tel: 27231888
路過見個門口幾靚幾新就入去望下，個sales姐姐齋比相簿我地睇，完全冇介紹，又冇比紙筆我地mark心水，淨係話如果有興趣可以上去睇下D衫，不過冇得試，係比錢都冇得試！佢話因為要確保D衫新淨，所以一定要cfm咗喺佢度租衫先可以試！佢D衫都比較清簡，A-line為主，啱D中意清雅嘅B2B。見佢價錢都唔平，D衫又唔啱心水，仲要冇得試，拎咗leftlet就走lu！

Wedding Gallery
天文台道16號1樓
Tel: 23663930
婚紗晚裝都係普通款，勁大路，婚紗以絹面為主，試都冇興趣試就走了！

因為大部份都要預約咗先可以試，所以我地睇咗幾間覺得啱心水嘅，就約咗過幾日試，下篇再update!