11/19/11星期六，我地睇完賽車四點幾，CC話要去唔知ＸＸ教堂幫佢家姐影相交功課，未去澳門之前佢已經講過，所以我都不以為意（加上嗰日我全日都未瞓醒，撘咗半個鐘的士過去仲瞓足全程（=.=），落車之後男主角喺外面講緊電話，我諗住佢傾緊公事就冇理佢自己行咗入去敎堂，嗰時我仲吽下吽下唔知發生咩事，CC叫我行去台前，我就好聽話咁行咗過去，但其實我都唔知要做d乜！
睇下個敎堂入面幾靚 ~
我一轉身，見到男主角突然出現咗喺我面前，手拎住一束好靚靚嘅黃色絲花圍住好多個阿JACK公仔頭，呢一刻嚟得太突然喇，我完全冇諗過佢會喺咁嘅環境下同我求婚（唔係！應該係冇諗過佢會求婚！），所以除咗笑同喊同笑之外，我都唔知比咩反應同講咩好！
我就話冇心理準備啫，原來男主角包包已經同我幾個好好好朋友籌備咗呢單嘢好耐，準備道具，計劃行程，諗定對白，但點知。。。佢一行埋嚟就震到講唔嘢，只係隠約聽到佢講咗幾句說話，最後講完“嫁比我！”，跟住就跪低拎咗隻介指出嚟！咁我梗係up頭應承啦！就係咁，簡單驚喜又感動嘅求婚任務完成了！
睇下我嘅戰利品 ~ 我最愛嘅阿Jack呀！！靚到呢！
事後好友們都投訴聽唔到內容，錄音嘅收唔到音！傻嘅！
我企正喺佢面前都聽唔到，其他人又邊有可能聽到呢！？？後來佢比番份稿我睇先知佢up過d乜！
多謝好友們嘅幫忙，同我分享人生中最大嘅喜悅！嚟返張大合照先！！
路環聖方濟各教堂 （華仔拍遊龍戲鳳咪喺呢樹求婚囉！）
哩個求婚一d都唔簡單呢~
回覆刪除包包用左好耐時間同心雞架
最成功既就係你真係乜都唔知 ^0^
但我真係好想知求婚內容係乜囉 @@
[版主回覆01/17/2012 19:45:24]全靠你地幫手先有咁成功啫！內容係絕密不會公開的！
我都有份揀呢個jack jack花球架！講少少求婚對白黎聽下啦！
回覆刪除[版主回覆01/18/2012 15:25:57]阿Jack花球真係好鬼靚呀！要帶佢去影Pre-wedding, big day當日佢都要亮吓相！對白呢D都係行嘢啫！最緊要有誠意同心意嘛！^^