產前講座（NUTRICIA）

2014-06-22 32WK2D（NUTRICIA）

登記咗幾個月都抽唔中去NUTRICIA嘅MBA雙職媽媽課程，聽D媽媽講唔中都會收到EMAIL通知，但我一直乜都冇收過囉！於是忍唔住打去問咗幾次，最後WAITING LIST得咗！

地點係CWB TOWN GAS，好方便吖！！每班得十二對COUPLES，唔會太多人太迫，分三PART，第一PART係教煮嘢食，第二PART係講情緒管理（之前要做份九型人格問卷，我當然冇做啦！），最後一PART係講產前運動，內容好豐富呀！！

 

整嘢食嗰PART應該係最好玩嘅，雖然我唔中意煮嘢食，不過甜品OK啦！個製成品都似模似樣呀！！

條圍裙寫咗小包包個英文名"TISHA"，送咗比我地拎返去留念，等小包包大個D我地就可以親子活動一齊玩煮飯仔啦！！^^

恥骨痛

2014-06-20 32WK

上星期返東區覆完診之後就開始恥骨痛，真係痛到叫救命！行又痛企又痛瞓覺轉身起身坐低都痛，總之一郁就痛啦！返到公司D同事問我做乜突然行得咁慢，上星期都仲健步如飛，我都唔想吖，差啲痛到行唔到添呀。。。

問過啲生咗嘅同事／朋友，又唔係好多人有呢個情況喎，但其中有一個就話痛到喊，痛到返唔到工要SICK LEAVE留喺屋企，唔係咁嚴重吖嘛！我仲有兩個月要捱喎！！

懷孕後期，肚子日益擴大，為了讓身體適應胎兒的存在以及準備未來的生產機制，體內也會出現許多變化，像是鬆弛激素和黃體素的增加，就是讓骨盆漸漸鬆弛，除了能裝下胎兒之外，日後懷孕機制啟動時，也才能讓胎兒順利過產道。而這兩種荷爾蒙卻也成了懷孕後期恥骨疼痛的主要因素。

大肚婆遊馬鞍山公園

2014-06-13 31WK

我一向都係"冷"街精，就算大住個肚都要四圍去，要影多D靚相留念嘛！就算大熱天時三十幾度都係咁話，難得老公又肯陪我癲！嘻嘻！^0^

今日我地去咗馬鞍山公園，好遠呢！不過搭港鐵其實好方便！個公園好大好靚呀！影相一流！老公揀嘅，叻仔！！

下午好多小朋友放咗學都嚟呢個公園玩，呢個迷宮好大好迷o架！

雖然我地兩個都係影相白痴，不過都要帶埋腳架去自拍！

長樓梯，必影之選！

白色地中海FEEL嘅廣場，好SWEET呀！！

 

 

中華白海豚雕塑好可愛喔！！

影完一輪相之後行咗去烏溪沙石灘，傳說中嘅心型石，側邊寫住"祝福你"，但係唔知點解硬係冇人地影得咁清楚咁靚呢！！

一個傻嘅大肚婆同一個能B嘅老公！！^0^

雖然有少少天陰陰，不過唔曬唔太熱，好舒服啊！

 

我覺得大肚婆一定要影張經典"娘"爆嘅大肚相，就係呢張啦！！

遲D再熱D個肚再大D可能就唔會再咁週圍去啦！襯而家行得走得食得就要玩多D食多D啦！^^

第十一次產前檢查（政府）

2014-06-13 31WK（東區醫院）

過咗30週開始就要每兩星期返醫院產檢一次喇，其實都幾無聊！政府又冇得照ＵＬＴＲＡＳＯＵＮＤ，只係同助產士傾吓計，模肚同聽心跳。

31週產檢都一齊正常，助產士又話我個肚細，不過佢模完度完就話SIZE好標準，我都知啦！小包包係MODEL身型吖嘛！！^0^　今次助產士講咗好多關於餵母乳嘅資料比我地知，又同我地BOOK咗7/18（36WK）上個　＂準爸媽工作坊＂，到時助產士會教用分娩球，作產時按摩舒緩，育嬰常識同母乳餵哺，好似好有用咁喎！做好D準備到生嗰陣就冇咁驚啦，唔知其他醫院有冇，不過東區咁嘅安排真係唔錯呀！！

8月港島媽媽gathering

2014-06-08 30WK2D

上星期去完8月媽媽會嘅GATHERING，今個星期到港島媽媽啦！媽媽們都好期待今次嘅GATHERING喔，始終小班GATHERING先方便傾計交流嘛！

今次一共有16個港島媽媽出席，約咗喺太古城飲茶，咁多人要分兩張枱呀！大家傾到人地熄燈清場都唔願走，好開心呢！

埋單出咗商場影大合照，影完相又傾一大輪，最後唯有依依不捨咁離開啦！哈哈！！大家都希望喺大家生之前可以攪多次GATHERING！

因為分咗兩張枱，怕大肚婆冇記性未必記得晒咁多人，有媽媽好細心咁加晒我地啲名上張相度，SO SWEET呀！！

8月精靈馬BB會媽媽gathering

2014-06-01 29WK2D

今日上午去完講座，下午就去TST Wonderland Too Oyster and Steak出席2014年8月媽媽會第一次嘅GATHERING, TOTAL有成70個媽媽出席呀！好利害呢！！其中一個媽媽仲幫我地設計埋GROUP LOGO添！

我地咁多人就梗係包場啦，間嘢環境同SERVICE都唔錯，地方幾寬敞唔會迫，又有落地玻璃同OUTDOOR位，不過我地班媽媽咁怕熱就梗係唔會坐OUTDOOR啦！

嘢食就只係包咗幾款小食同兩杯DRINKS，下午茶啫，我地都係至在傾吓計交流吓，唔會掛住食啦！不過佢D SNACK都幾好味！

原來諗住只係簡單GATHERING，因為之前NUK話SPONSOR我地攪到好麻煩，所以媽媽們都覺得唔需要SPONSOR，只係純粹GATHERING傾吓計就OK啦！點知一班熱心嘅幹事們都幫我地準備咗好節目，抽獎同禮物，內容好豐富呀！！

 

最後梗係要嚟返張大合照啦！好壯觀呢！！期待下一次嘅GATHERING喔！！

產前講座（智多健）

2014-6-1 29WK2D（智多健）

今次呢個講座真係好奇怪，奇在好似唔係好多人知，係個智多健嘅人自己打電話嚟叫我參加，仲話包埋LUNCH，有嘢食有禮物！佢話內容係講30週後清胎毒，坐月湯水同嬰兒按摩，好似好有用咁，我見TOPIC咁吸引又有時間咪去吓囉！

地點喺長沙灣廣場一間酒樓，包咗間房有7圍枱，成個講座（似茶會多啲）安排認真麻麻，我地去到揾唔到自己個名，負責人話前一日打電話比好多人都揾唔到冇CONFIRM到，但我地都冇收過電話！好彩最後都安排到坐位比我地，算啦！間酒樓又唔算好UP DUP嘅，係舊D囉，間房細有D迫，音響差，我地坐個位完全聽唔到！連第一PART有人開始咗講嘢都唔知！

第一PART係勁SELL智多健，所以聽唔聽都擺啦！講完好快就有嘢食，佢地事先已經安排好晒點心飯麵，不過好奇怪，大多都係熱氣嘢大肚婆唔啱食，不過大家都冇理乜都照食啦！話咁快就清晒！

第二PART係陪月協會主席（好似好巴閉咁喎！）講關於坐月嘅飲食同湯水，好實用呀！D媽媽掛住食，老公就個個拎住電話係咁影個PROJECTOR，幾勤力呀！

第三PART講嬰兒按摩，仲有幾個陪月姨姨即場做埋示範添！又係老公拍片嘅時候，哈哈！！其實呢兩PART真係幾有用，D姨姨又講得清楚，係大會安排差D啫！

食飽飽上完堂仲有抽奬添呀！唔知以為自己去咗街坊福利會嘅春茗！XD

開頭諗住都係抽D無謂嘢，但原來係抽平時講座嘅贈品，都幾豐富呀！有奶粉，濕紙巾，嬰兒潤膚露，HAND CREAM（屈臣牌，比工人用！），智多健傘（都係比工人用！），口水肩，同埋有封利是入面係WATSON‘S COUPON，但只限即日用（沙田同旺角ONLY）！大會有安排車去沙田WATSON’S，局人去買奶粉！？？唔係做到咁CHEAP呀化。。。睇真D原來係CASH COUPON買乜都得！我地有兩張，即係一舊水，好抵啊！！完咗即刻飛去旺角買嘢啦，唔知買乜好，最後買咗包S碼62片裝白P尿片，承惠＄5.9，哈哈！！

勁開心呀！今次呢個講座可以講係意外收穫，冇諗住報，冇諗住去，但點知原咁好玩！^0^

第十次產前檢查（私家）

2014-5-31 29WK1D

等咗6個星期，終於可以見到小包包喇！真係等到頸到長呢！！上次係22週時照結構，第一次3D見到小包包個令令樣，而家29週，唔知佢會變咗咩樣呢！？

今次等成三個鐘，等到我同小包包都瞓著咗，哈哈！佢用手遮住個額頭，孫醫生搖極佢都唔醒，睇嚟佢真係好眼瞓！點知佢瞓瞓吓伸咗條脷仔出嚟，好可愛喔！咁啱比我地見到，孫醫生又CAPTURE到，咁就成為小包包其中一張好珍貴好特別嘅靚相啦！冇見一排小包包長肉咗好多，而家手仔都肥啫啫，29WK1D有2磅15安士，好叻女呢！不枉我一個月肥咗7磅！！醫生話佢好健康，標準SIZE，大腿骨長咗少少，似DADDY高大喎，係就好呀，長腿美眉！！^^

呢排除咗PATPAT痛，雙手仲痺到不得了，醫生話係水腫喎！即係要食返清淡D，少鹽少油囉！而家先29WK咋，仲有4份1路程呢！加油喔！！

下次又要等一個月先再見到小包包喇！掛屎人啦！！