Day 8 梵爾賽宮，巴黎鐵塔，蒙柏納斯56層觀景廊，塞納河 (PART 2)

食飽飽就去梵爾賽宮啦！好多人呀！！梗係啦，呢度靚過中國古宮同英國白金漢宮咁多，梗係個個爭住嚟！！

門口好大條長龍！好彩我地跟團唔使排隊咋！如果唔係起碼要排一兩個鐘先買到飛入去呀！！（呢個就係跟團嘅好處！）

睇睇個地圖先，好似好大咁喎！都係入去先慢慢睇啦！！

呢個廳好靚呀！不過唔比人入去，只可以喺門口影相！但入面有兩個人喎，唔知係乜人呢？唔通拍嘢做訪問！？？


皇宮就梗係大啦，分開好多間房，每間房都唔同style添！都係朝早個導覽伯伯帶我地行同講解，真係辛苦晒！！

皇帝嘅臥室，盞水晶燈好浮誇呢！！

無聊自拍天花板！！


個油畫框咁金咁浮誇，呢個梗係皇后嚟啦！！


個座地鐘仲識行喎！


皇帝張床，真係高床暖枕！不過唔係好大張咋！


呢個係鏡廳，好多鏡同水晶燈，又大又grand！係開舞會用嘅！

呢D擺設以前係用真金造嘅，係咪9999就唔知啦！不過後來冇錢賣晒啦！而家嗰D全部都係假嘢！


呢間房係咪好feminine呢！？知唔係皇后嘅臥室囉！


個圍欄都唔知係本身已經有，定係因為改咗做博物館之後要比人參觀，怕人破壞先加建呢？如果本身已經有，咁皇后瞓覺嗰陣咪要爬入去先上到床！？？

呢間係Dinner Room，係咪餐餐都食九大簋呢！？？

真係想拎返個爉燭台同兩隻碟返去！！


天花板上面有多細細粒格仔好似白色膠紙咁嘅嘢，原來係維修緊用嚟保護D顏色嘅！

皇宮即係皇宮，望出去個VIEW幾開揚呀！


梵爾賽宮側邊嘅外牆～


內庭～


呢座兩層嘅紅磚樓房，係狩獵嘅行宮～

梵爾賽宮嘅後園望出去又係咁開揚擴濶，個個國家嘅皇宮都係咁，都唔知行幾耐先行到出去！


後園有兩個大水池，唔知夏天游唔游水呢！？不過如果係夏天應該種滿晒花！

坐喺池邊睇吓書吹吓風都幾爽吖！不過係夏天先囉！！

睇我變咗印度西施就知有幾凍，我地去嗰日日好大風，吹都我頭都甩！唔知會去埋後園咁凍咁大風囉！早知我帶埋冷帽著雪褸添啦！！

幾大個冇花嘅後花園！！

實在凍到頂唔順！要徹退啦！！臨走前喺門口影多張相先！度閘金到吖！！



我唔記得咗發生咩事，領隊無啦啦送多個行程比我地！尋日已經睇咗巴黎鐵塔啦，今日佢帶我地去第二度睇多次喎！


哈！呢個廣場好正呀！喺高處直影過去效果靚D，附近風景都唔錯，唔怪得咁多人啦！！

我地仲坐埋上個博度影相添，本來有D鐵馬欄住，我地好曳咁爬咗入去，嘻嘻！

坐車途經拿破崙墓，個頂幾靚吖，落車喺門口影張相先！




再嚟下一個景點就係蒙柏納斯56層觀景廊（M56），就好似香港嘅Sky100咁，不過呢度矮好多細好多，冇嘢睇囉！


以前D人多數係上去巴黎鐵塔睇景嘅，不過上咗去巴黎鐵塔就睇唔到巴黎鐵塔啦！再加上巴黎鐵塔加價加得咁勁，所以而家跟團多數都唔包上去喇！反而喺M56望返過去，就可以見到巴黎鐵塔同巴黎嘅全景啦！！


其實巴黎嘅全景唔係幾靚，灰曚曚咁乜都睇唔清楚，香港靚好多啦！嘿！領隊仲話咁樣已經算唔錯，如果睇夜景仲冇嘢睇喎。。。



時候都唔早喇，又到晚飯時間，呢餐豐富囉！！今晚係唯一一晚食完飯仲有行程嘅，好興奮呀！！

先嚟個鵝肝沙律，正到呢！！


Main course係牛扒，我唔食，轉咗食羊！唔錯！


今餐仲有紅酒送添，有幾個uncle都飲到醉醉地咁好攪笑！我地都唔執輸飲咗一支呀！呵呵！！


另外order咗個煎鵝肝，兩塊都幾大塊，煎得啱啱好又香又滑，EUR30，香港食唔到啦！！

Apple Pie...too bad...
.


飲飽食醉就上船吹吹風啦！其實都已經吹咗成日。。。


夜晚嘅巴黎鐵塔真係醉人，同日頭灰曚曚嗰個差好遠呢！

坐遊船遊塞納河可以近距離欣賞整個巴黎大部分嘅景點，highly recommend!!



終於睇到聖母院！好靚呀！！我下次要入埋去影相添呀！！

夜遊塞納河真係好浪漫呢！雖然好好好凍，不過我地都唔願返入室內有暖氣嘅地方！

上層有班荷蘭嚟嘅學生，HIGH到爆，每次經過橋底佢地都會全部企晒起身，大聲叫口號同舉手喪跳，好有氣氛！！



遊咗一個鐘就落船啦，又去睇睇夜晚嘅凱旋門先！


法國都有人力車坐，仲要係靚仔車伕添！不過我唔敢問佢幾錢，嘻嘻！！

巴黎嘅兩日行程完咗喇，真係好唔捨得呢！Stay得兩日梗係唔夠啦！我想去多次羅浮宮同凡爾賽宮，呢兩個地方行幾日都行唔晒呀！又想坐多次夜船遊塞納河，真係好靚好浪漫！仲想去聖母院，仲要喺街邊勁食生蠔海膽同seafood platter，仲有坐喺路邊嘅露天CAFE嘆coffee，梗係唔少得去香謝麗舍大道shopping啦！最起碼要玩返四五日先夠！！

Paris, I'll be back!!!