BIG DAY之教堂註冊篇

冇早冇遲，時間啱啱好！中午到咗伯大尼，兄弟姊妹幫手整decoration，我地就有時間影相啦！嘻嘻！！




岑律師都好準時到，一嚟到就捉住我地同雙方爸爸briefing，講解完好快就正式開始行禮啦！！包包好緊張呢！


出場啦！！

包包緊張到流晒汗呀！！


我地行教堂當然係用“教堂模式”啦！岑律師首先會問：”XXX，你是否願意娶／嫁XXX為你合法妻子／丈夫。。。？”
我地就梗係答：”我願意“ 啦！！


跟住就手拖手望住對方，好深情咁宣讀誓詞，岑律師講一句，我地跟住講一句，唔使拎貓紙，好sweet呢！！"我請在場各位見證, 我XXX願以你XXX為我合法丈夫／妻子，無論環境順逆， 富裕貧窮。。。至死不渝！“
 

我地兩個都講得好順喎，之前冇睇過份誓詞又冇彩排，但都冇講錯冇食螺絲，跟住佢講好過睇住嚟讀好多！！


交換戒指，包包又問邊戴隻邊手，岑律師喺後面提水，笑屎我！！


揭頭紗啦！包包應該自己有練習過，岑律師之前都有教過佢要點揭先靚同唔會整親我，做得好好吖！叻仔！！

情深一吻～


最後嘅儀式就係簽紙啦！包包又攪錯咗佢DADDY個名，冇加到英文名喺張証書上面，所以我地當日簽嗰張係錯嘅！激死！Honeymoon返嚟先去律師樓拎返張啱嘅！！

我地March out之後又再march in，跑住入去裙甩褲甩咁好好笑！！


註冊儀式好順利咁完成咗啦！（雖然簽咗張假証書！！）喺禮堂入面影完相再出去大合照！

仲有少少時間淨，兄弟姊妹執嘢，又係我地嘅影相時間，呵呵！！超級中意呢幾張相！！