裝修完工, 入傢俬

尋日請咗假攪清潔，收傢俬，攪足一日攰到爆！不過好開心呢，終於都有八九成喇！

原本我揾咗人去做裝修後清潔，點知裝修師父已經幫我安排咗，佢都係請人返嚟做，唔怪得佢清潔費貴過人啦！我同媽咪十二點去到，有個嬸嬸同叔叔(老闆)喺度，佢地都係自己帶齊工具，所有窗，窗框，廁所同廚房已經抺乾淨晒，仲差未拖地，眼見都抺得幾乾淨，比預期中好好多，因為預咗師父揾嗰D係求其抺吓就交貨，應該冇家務助理嗰D咁專業掛！雖然執乾淨晒，不過嵌完傢俬之後又污糟返晒，抹咗成晚都未抺完！！

嚟返張變身前後大比拼先！！
其實主要都係變白咗，上手業主係一個非常NICE嘅外籍人仕（我媽咪喺隔離屋八返嚟，師奶即係師奶！），佢中意成屋都係啡色（特別係幅牆），我就中意白雪雪（灰色馬毛牆紙放棄咗。。。），所以有好大對比！

鋪完磚之後都未正式見過塊地呀！驟眼睇個流沙紋好靚吖！梗係，我揀嘛！！

睇真D，有D“喇”位做得麻麻地，好似填唔平翹起咗咁，應該係掃口粉問題，大門口嗰邊特別嚴重，唔知關唔關上次水浸事！叫咗師父聽日返嚟睇吓有冇得攪！

電視都裝埋，幅牆真係好好好鬼細！46“都係啱啱好咋，大D都裝唔落！！其實應該遲D入埋傢俬先裝電視，搬傢俬時幾驚整襯佢呀！好彩D師父都好小心，平安無事！！

執乾淨晒D傢俬就嚟喇，餐枱餐椅喺DSC買，代理自己送貨，紋身哥哥好快手就嵌好四隻枱腳同椅墊啦！

佢知我地要裝傢俬所以專登幫張枱加返頂帽，唔怕HI花嘛！


搬呀搬呀，話咁快就搬晒入嚟，打爆咗間屋啦！唔使放埋出走廊即係証明我地間屋都唔算好細啫！！

都包裝得好安全，紙皮夠厚，有晒保護條，木塞保護！

兩個師父嚟裝，都幾快手同小心，唔使三個鐘就攪掂，仲冇HI花我D牆！叻！！櫃嘅內籠都好白淨，唔似大陸做嘅櫃，得個殼靚入面又黃又黑！

個C字櫃清清地好靚吖！D門裝得好對稱，鉸位都好實淨好順（都係大陸嘢）！咁大個櫃表面得兩點超細嘅花痕（幾乎睇唔到），紅酒架上面有D焗漆做得唔好有激痕，不過放咗酒都睇唔到啦，我覺得可以接受吖！

不過有地方怪怪地，就係兩塊灰鏡唔平行，枱面嗰塊條白邊勁粗！！不過遠睇又唔係太覺眼可以接受嘅。。。我個人都幾隨和幾冇所謂吖！！

個地台成個棺材咁，wakakaa....大吉利是！！木皮隻色比預期啡咗D，算啦！都冇辦法，當自己色盲！木皮面都有D花，但因為有木紋所以唔係太礙眼，不過感覺麻麻，唔係係咪全部木皮都係咁呢？？定係呢隻係渣嘢！？？

逐件砌吓砌吓，好快就砌好啦！D位都好FIT喎！開頭以為D邊位實會漏“喇”，點知加埋條咩咩條（貼住牆最邊邊好幼嗰條）之後就FIT晒！

不過有個問題，之前明明話床褥個位（本身做油壓床架）做兩格，點知而家變咗六格！成間房個地台都係咁細格就放唔到喼啦！！不過我諗住細格D易揭起攞嘢，咁算啦由得佢！但朋友仔又話細格先難拎嘢，都唔知點算。。。

呢條樓梯真係又愛又恨！視覺上係超級靚同特別，但一定會令我成日PK囉！！

衣櫃個面嘅灰鏡其實有含意，聰明人先睇到，係兩個英文字母，你睇唔睇到呢？？答案係Y同K！哈哈，呢D咁低能嘅嘢梗係唔係我諗出嚟啦！！

衣櫃門嗰兩條“喇”好濶呀！！之前designer已經提咗我地，建議我地改喺下面開門條“喇”就會細D，因為做暗抽要預返D位ZIP隻手指入去，但我又冇諗過條“喇”真係濶成咁嘛！！

我個梳妝枱。。。本身好靚，現場睇真係好靚！不過左右兩個櫃桶樣衰晒囉！！加咗鎖多咗粒嘢，成個design cheap晒！！侵佔我個梳妝枱都算啦，豪比你！仲要加埋鎖，都唔知有乜咁秘密！咁驚人知就鎖入銀行保險箱啦！！

度尺時都冇留意，佢地將梳妝枱跟返幅牆嘅尺寸平排，但窗台嘅雲石面係長D凸咗出嚟，所以應該造返深D張梳妝枱遮住塊雲石嘛！而家夾硬盡量拉出DD張枱，但都係遮唔晒塊雲石同埋窗邊又會漏咗少少“喇”囉。。。

嵌好晒之後又剩低一片頽垣敗瓦，不過師父好好手尾執清晒仲掃埋地！！

總括嚟講D傢俬都幾滿意，可能我冇咩要求啦，總知唔好比我見到表面有花有凹就得！其餘嘅問題都可以接受嘅！！我地D design又簡單冇咩花臣嘢，所以出錯機會自然細啦！係個地台全部變晒細格放唔到大件嘢，唔係唔好，不過有D無奈。。。