Pre-wedding＠板橋費加洛之後記

5日嘅台灣婚紗攝影之旅終於圓滿結束，真係好好玩好唔捨得呀！因為機綠巧合，我地由四季水晶變咗做板橋費加洛，去之前仲好擔心，又怕影得唔靚，又怕招呼唔好，又怕比人厄。。。好彩最後成個過程都非常順利同愉快，雖然價錢係貴咗少少，不過最緊要開心同中意啫！

板橋費加洛個門市好大好舒服，地下嗰層右邊係reception counter，左邊係化妝間，中間有幾張圓枱FOR招呼客人同揀相，二樓全層都係FOR揀衫試衫，三樓應該係studio。

佢地嘅攝影團隊真係好PRO，個個都好nice，我相信呢個都係台灣人嘅特色！

婚禮顧問鄭副總：醒目細心！之前由四季水晶轉到去板橋費加洛，鄭副總打過好幾次電話同send e-mail比我地confirm行程時間，臨出發前一日仲提我地搭咩車去佢地公司，去到見到佢真人，感覺非常熱情，又唔會有太多客套說話（即廢話），話頭醒尾，副總即係副總！讚！

婚禮顧問蘇主任：做事認真！我揀好衫之後，個妹妹幫我度身改衫，佢埋嚟話要幫我再度一次，要度清楚準確D，因為造型師交帶落所有衫都要束緊D先好睇！佢幫我度完之後即時安排改衫，果然4件都完全GOOD FIT，只有一件略為緊咗少少，我話其實都OK嘅，但佢反而話唔好，因為我會著得唔舒服，轉頭即刻幫我再改過！讚！

造型師秀琴老師：最初我自己棄用佢地最出名嘅造型師阿邦，一直都好擔心好後悔，直至見到秀琴老師，佢都未開始化妝我已經感覺佢好PRO，個心先定番D！佢睇晒我揀嘅5套衫，預先幫我諗定咗5個不同造型，問咗我自己咩要求／IDEA之後再作修改，5個造形都好啱我心水好滿意！佢化妝整頭好快手，唔洗兩個鐘已經幫我同包包兩個化好妝SET好頭，真係超有經驗，抵我同佢買咗8支安瓶！佢話佢之前喺台北一間超大嘅婚紗店做主管，係費加洛高薪請佢過嚟幫手，以前阿邦都係佢下屬添呀！讚！

攝影師勝哥：之前上網睇過佢同其他攝影師嘅job reference，其實自己中意另一個攝影師嘅style多D，不過已經要求換咗造形師，費事咁麻煩咁多要求啦，所以冇要求再換，好彩冇換咋！唔係全靠勝哥D相邊有影得咁靚呀！（遲D睇相啦！）佢仲請我地飲啤酒添！哈哈！讚！

助手阿智：阿智真係好鬼賣力，做嘢又快手冇甩漏！佢對我地照顧週到，臨出發前又話我地知影相時要注意D咩，教我地點同攝影師溝通，可能呢D係佢嘅份內事，但佢比我地感覺到佢嘅真心同熱誠，而唔係為工作而工作嗰種！每次我企埋位，佢就即刻衝埋嚟幫我整裙尾，之後9秒9走跑返去拎反光板／打燈，當攝影師叫我地望去佢個方向（就角度影相），佢會好開心地望住我地笑！讚！


全靠板橋費加洛嘅攝影團隊我地先可以有個咁順利同愉快嘅旅程，即使出嚟嘅效果未必係最好最滿意，但佢地嘅表現已經非常好！真係值得一讚！！