Vendor Review: 秋子花藝

相信JM們對秋子花藝都唔會陌生，因為佢真係好出名好好生意！！老闆湯生好鬼NICE，揀花球款式時會比好多意見，所以當你心大心細揸唔定主意，或者同我一樣對花嘅知識係零嘅時候就非常有用！

我最初喺blogger度睇到呢個款覺得幾特別，因為佢唔係一般圓碌碌嘅花球，加上係我中意嘅黃色做主花！咩花材冇所謂，最緊要顏色靚嘛！！
原先呢款係黃色馬蹄蘭加大牡丹，但湯生話大牡丹貴D要加錢，如果我唔係特別中意大牡丹，可以用白玫瑰代替，幫我慳錢！

又因為我唔中意綠色嘅襯花，見到下面呢款黃色襯橙色好SHARP喎！我就問湯生綠色部份嘅花可唔可以改做橙色（但其實我唔知橙色花有乜選擇），湯生就建議用橙色胡姬（我唔知胡姬係乜！聽都未過！！），um...自己唔識就唯有信佢啦！


最後出嚟嘅效果同我想像中差好遠，不過D花好新鮮，夾夾埋埋又幾靚幾特別喎！！

湯生將個花球㩒扁咗，佢話咁高唔好睇，花球要圓圓地先靚（之前我細妹都話成支咪咁唔靚！）除咗白玫瑰之外，佢仲幫我加咗橙色小牡丹，效果好出好SHARP呀！可惜D白玫瑰細朵咗少少唔係好起眼！
新郎襟花都係用橙色小牡丹襯白玫瑰，同樣係白玫瑰唔夠大！

個花球影相真係好鬼SHARP！

第二個新郎襟花係跟返個主花球用黃色馬蹄蘭，好大朵好新鮮，都係襯返D橙白色花花！仲有我個頭上面D花全部都係送嘅，呢個頭用咗好多花，夜晚送客個頭都係用佢D鮮花，放到夜晚都仲好新鮮，不過如果再多個頭就唔夠用啦！


兄弟姊妹嘅襟花手花都係用絲花，方便做嘢吖嘛！湯生話呢隻馬蹄蘭係新嘅，比之前用開嗰隻真D大D靚D，佢以後都會改用呢隻喎！D襯花就一般般啦！

新郎同家人嘅襟花都係用鮮花，好新鮮，用到夜晚都冇謝到，不過D玫瑰有D開得好少！包裝唔錯，用紙箱同膠片／紙封好晒！


拎花嘅時候湯生都有教我地點保養D花，同埋例牌會剪一大堆花仔嚟做頭花，我叫佢比多D白色同紅色，不過佢冇採我！