新居全面睇

嘩！原來成三個禮拜都冇寫BLOG啦！好懶好忙好攰。。。公司呢排多嘢做，weekend又忙住house warming招呼朋友同執屋，仲忙過之前攪裝修呢！！

尋日係我地入伙一個月，終於所有傢俬電器家品嘢都齊晒喇！（只係爭個掛鐘未揀到）好圓滿呀！！包包仲話感覺好得意，砌吓砌吓就砌咗間屋出嚟！好！就同大家分享吓我地努力嘅成果啦！（有部份相之前已經暴過光）

好唔抵嘅大門同好抵嘅Samgsung指紋電子鎖！個鎖真係好正！超LIKE！！大門。。。OK啦，比預期中靚嘅（唔係啡色就更好啦！）

一入門口就係廚房，原裝冇執過，係咪都好新淨呢！？因為我係”無飯老婆“唔中意入廚房，所以無謂“晒”錢喺D我唔LIKE嘅嘢度吖！雪櫃同個廢廢地嘅抽油烟機都係原裝有嘅，我地唔煎炸冇問題！洗衣機係新買的，買樓時業主已講明舊嗰部壞咗（其實就算冇壞我都唔會用啦！），金章1000轉7KG，貴嘢！！（未來99送的入伙禮物）


仲有三頭煮食爐，唔係比我用的，我只會用光波爐！

廚房隔離係廁所，原裝一面牆係全幅鏡，大愛！！望落個廁所好大！除咗保留呢幅鏡牆，其餘所有嘢都換過晒！

DDShoser無框浴屏 + Roca坐廁


42“洗手盆櫃 + 鏡櫃，又係超中意！！個個都讚靚！！我阿媽仲話咁大個，第時可以幫BB沖涼添！！


浴屏入面幅特色牆襯返洗手盆櫃，好有型吖！GROHE水龍頭 + 花洒，又靚又好用！即熱式熱水爐又係原裝的，超薄！！


睇完廚房廁所就睇大廳啦！長方型廳地方都幾見洗，裝修完之後感覺比睇樓時大，十幾人都容納到！啱晒我地中意熱鬧！哈哈！

個珍寶窗口式冷氣凍到我甩肺！真係貴得有道理！！早知唔使買兩匹啦。。。

因為全屋都係黑白灰為主（簡約型格吖嘛！）所以客廳嘅地毯（入伙禮物）同直立式風扇（HSBC贈品）都揀鮮紅色，夠SHARP嘛！OSIM按摩墊都係紅色，又係好朋友送的入伙禮物！


呢張梳化真係正到不得了！超舒服勁好坐！個個嚟坐過都話正！L位仲可以揭起放麻雀板，摺櫈等等，好實用！價錢仲。。。嘿嘿！！

46“ SONY 3D電視（未來老爺送的入伙禮物） + 迷你TV櫃，個櫃揾咗好耐先揾到，因為SIZE太細！！有冇留意到D房門同門鎖都好靚呢！都係我精心挑選的！！

梳化後面係窗台，唔係好濶不過都幾深！可以坐到兩個人對住個窗吹水都幾正！加埋毛毛毯一流！！


呢邊影返過去就係飯廳，盞燈實物靚好多呀！！有冇見到個Philips空氣清新機！？開咗之後感覺好似少D塵（唔知係咪心理作用！）呢部仲可以去埋鉀銓添！（唔知真定假！）

ZOOM近D睇吓，張飯枱太細啦！初時驚間屋細唔敢買咁大，點知送咗嚟又覺得太細唔夠用，開大咗都唔多夠！不過張枱都幾GOOD，唔易花又襟污糟！個C字櫃直頭係無得彈啦！！


個酒架好正呀！一個字 - 型！！（要保持常滿）


到主人房喇，重點介紹：地台床 + 孤型樓梯（暫時我都仲未PK！）

灰色絨布床頭板好鬼滑！我係唔會用紫色粉紅色嗰D。。。


YK衣櫃5“都OK夠用，櫃頂加咗搖控橙，夜晚臨瞓前查完面唔使起身熄燈嘛，懶到呢。。。

冇鏡嘅梳妝枱，對住個窗用自然光化妝，正！


仲有細房唔介紹啦！因為而家仲係做緊雜物房，遲D先執清佢留返嚟做BB房！（不過唔知拖到幾時先會執清呢。。。）