深圳傢俱建材之旅2 - 寶安北路

繼上個月去完田貝四路嘅家合居之後，上星期又再北上尋寶，真係越睇越興奮！今次去咗寶安北路一帶嘅家俱建材店，嗰度數數埋埋有十個八個商場全部都係賣傢俬建材嘢，當然唔係全部都啱行，如果認真咁行真係三日三夜都行唔完呀！原來隔離就係筍崗文具批發市場，可惜時間尚早吖，唔係就可以一次過買埋過大禮D嘢！

去寶安北路可以到"火車站西廣場"坐61號大巴或18號大巴
61號就在寶安北路口站下車，就正正是B&Q對面，過一條橋就到B&Q
18號大巴就在人才廣場站下車，過一條馬路就係好百年了


我地嘅行程係去咗梅園路嘅「藝茂中心」先（前名「超凡家居」），喺「藝展中心」隔離，皇崗打的去三十幾蚊，遠過田貝四路少少！呢度有七層咁多，不過得頭幾層有嘢睇，因為上面嗰幾層好似show room咁，又大又豪又冷清，好多大件高檔嘢賣，有時間嘆住冷氣欣賞吓都唔錯，不過唔係好啱香港嘅蝸居！呢度都有好多燈飾，以水晶燈為主，唔啱我STYLE！仲有歐式田園家品嘢，杯杯碟碟，cushion，擺設嗰D，不過又係唔啱我STYLE，我係簡約型格嗰批嘛！

呢塊魔鏡喺香港揾唔到，唔知邊樹有得賣！「藝茂中心」有兩間專賣鏡嘅鋪頭，好多款好特別，但價錢都幾貴，呢塊23" x 40" 開價RMB780，真係好想枱佢走呀！！下星期度尺度真D先，如果夠位擺下次就帶佢返屋企！

PU料廁紙筒＋搖控座，喺淘寶見到已經勁中意，實物嘅料同手工都好好！呢度開價RMB55＠，講完價RMB100兩件（我係低級組講極都有個譜！），計返都平過淘寶吖，慳返運費又可以揀個手工靚D嘅！OK啦！

行咗一陣就轉戰戲肉“寶安北路”啦！我地skip咗「藝展中心」一二三期，因為佢地賣嘅嘢應該同「藝茂中心」大同小異但價錢會貴D，所以慳返唔使睇啦！「藝茂中心」出正門向左邊直行出去就係寶安北路，到咗寶安北路，轉向左邊就會見到「好百年」（HOBA），「好百年」都係賣高檔大件傢俬，我地唔係住半山豪它所以可以BYE BYE，我地主力係去「家之福」同「家樂居」，價錢平D又多嘢睇！

「家之福」分為三部份，新嘅「家之福家居旗艦店」都係賣大型傢俬冇咩特別，D床架好靚亦好大個，如果屋企有成千尺可以考慮！「家之福家居中心店」分為「傢俱中心」同「原材料市場」，都係單層式商場，乜鬼傢俬家品建材都有，但大得嚟有D亂，行行吓都唔知行咗去邊！呢度冇「家合居」咁好行，不過多D嘢睇同埋價錢平少少！

「家樂居」喺家之福後面，我地都係無意中見到個手寫嘅牌先揾到咋！格局同「家之福」差唔多，我覺得行晒呢兩個商場已經夠買晒全屋裝修嘅建材同傢俬！不過買燈就最好去返「家合居」或者「又一居」，因為呢度冇咩款！

喺「家之福」睇中咗兩個TV櫃，因為我地個TV wall好窄，得58"，香港一般嘅TV櫃standard size係60“，所以揾咗好耐都未揾到個啱心水！呢個size啱啱好55" ， 仲有幾寸位剩！ 

歐尚家具（家之福中心店C098 ）- RMB880

之後喺另一間見到呢款仲靚，有全黑或黑白色 ，櫃桶位做咗茶色鏡面， 仲要平D添呀！  

康迪斯（家之福中心店B105 ）- RMB680（唔包安裝，唔知裝修師父肯唔肯同我裝呢！？） 


呢間D枱枱櫈櫈都幾平，可以喺catalog度揀款，D櫈仲可以配唔同款唔同色！我喺DSC睇最CHEAP最普通嗰D都要二千幾蚊SET，靚少少要三四千！呢張櫈PU面料勁軟熟舒服，鋼水又好（佢話），已經算係貴嘢，成套都係千五蚊！不過都有少少擔心運輸問題，櫃嗰D就話四四方方易包裝啫，D枱腳櫈腳叉晒出嚟唔知會唔會好易撞花呢！？

康迪斯（家之福中心店B105 ）- RMB1550（一枱連四椅）

仲睇中咗張圓型絨面梳妝櫈，可以任揀布料任揀色，都係RMB58咋！抵到吖！！！

「家樂居」有好多間名牌磚鋪，東鵬，蒙娜麗莎，宏宇等等，我地上次睇磚只著重揀款揀色（其實揀嚟揀去都係D普通襟興款），今次就睇埋牌子，始終有牌子好似穩陣D嘛！我地去咗“加西亞”（家樂居A48-49），見佢門面好太，兩個鋪位打通咗，成個商場都係佢D banner仔好似好勁咁！

諗諗吓廳地磚都係用返灰色，白色太易污糟啦，我地都係鐘情呢類仿古磚，簡單襟興嘛！24" x 24" RMB30


廁所可能由灰色TONE轉為啡色，都係會用返下面呢款令令方型粒粒磚做特色牆，12" x 12" RMB8（平過「家合居」RMB12），再配襯中間嗰隻淺啡色磚牆，地下用最上面嗰隻深啡色，兩款啡色磚都係“考古磚家” 24“ x 24" RMB38，因為牌子嘢所以貴少少！

我喺香港睇中嗰個層層洗手盆呀！
永鋒衛浴（家樂居B22B）造三尺實木洗手盆櫃連鏡櫃都係RMB1850，鏡面加RMB50，平到笑！「家合居」都要二千幾啦！！

呢度竟然又揾到我一見鐘情嘅馬毛牆紙！喺香港都係得兩間有咋！！香港嗰隻係法國貨，係一張張計唔係一卷卷計，如果痴晒我個廳230“ x 102"要七千幾蚊，另外有隻唔知韓國定馬來西亞貨一千蚊樓下攪掂，不過無論手感同顏色都差好遠！呢度嗰隻係上海嘢，計埋都要三千幾蚊，但無論質地同顏色都同法國嗰隻好似！天呀！！差三千幾蚊呀！究竟買法國定上海好呀！？？

「家之福」同「家樂居」真係尋寶嘅好地方，雖然地方冇田貝四路嘅「家合居」咁舒適，不過呢度價錢平又多選擇，會揾到D嗰邊冇嘢嘅！買燈就最好去返「家合居」或者八卦路嘅「又一居」會多款D同靚D！好！等七月尾收咗樓，八月頭再上嚟放血！！！

燈燈燈燈＠深圳

去深圳走咗兩轉睇燈，仲未揀到呀！因為好多都好靚呢！我地只需要買飯廳燈同兩盞房燈，就係因為少所以仲難揀！第一轉係「家合居」，三樓全層都係賣燈，真係好多款！第二轉係喺八卦岭八卦路嘅「又一居燈飾城」，三層都係賣燈，有幾間D款好特別，第二度同香港都冇，不過價錢貴D！始終深圳買燈都平香港好多，香港賣幾千蚊，深圳只需幾百蚊，加幾十蚊仲可以有埋搖控！重點係﹣香港買嘅貨好大機會係同大陸一樣！

米奇燈for細房，預定第時做BB房！
明哲現代傢俬燈飾（家合居D1021）﹣ RMB370（就係下面呢款，唔知點解佢要整個牌子名“Chuang Yi" 喺度勁樣衰！）
宏明（家合居D1017）﹣ RMB320（呢間揾到同佢差唔多款，不過D圈圈係通lone，冇個牌子名，仲要平D喎！GOOD！）

因為主人房會整地台（可能仲要加埋油壓床），所以唔想用吊燈咁有壓迫感

鳥巢（慳電蛋 x 7）＠明哲現代傢俬燈飾（家合居D1021）﹣ RMB640


呢個都係鳥巢款，不過係慳電膽＋LED兩組光，喺房齋開LED好浪漫吖！
LED鳥巢（慳電蛋 x 5）＠明哲現代傢俬燈飾（家合居D1021）﹣ RMB390
LED鳥巢（慳電蛋 x 9）＠宏明（家合居D1017）﹣ RMB480
LED鳥巢（慳電蛋 x 8）＠晶豐燈飾（家合居C1038）﹣ RMB450


水晶柱吊燈for飯廳（唔係我揀！）
6支圓型水柱吊燈（LED）＠明哲現代傢俬燈飾（家合居D1021）﹣ RMB950
6支方型水柱吊燈（慳電膽）＠明哲現代傢俬燈飾（家合居D1021）﹣ RMB680
6支圓型水柱吊燈（慳電膽）＠晶豐燈飾（家合居C1038）﹣ RMB650

貝瞉燈for飯廳
喺九展見到已經覺得好靚，HKD1200唔值呢！「家合居」都有，只賣RMB420，睇睇吓又好似冇咩特別咁！

葉葉燈for飯廳（吊燈款）
香港最平嗰間賣HKD3000，超優惠價喎！「家合居」應該唔使一千！我覺得好型，不過驚唔夠光！

LED圈圈／框框燈for飯廳
中間嗰兩舊圓碌碌嘢右邊有兩個方形框框LED吊燈（喺樓下影上二樓所以好矇），可自由調較高度，平排或不規則都得！有圈圈同框框兩款，可獨立買一個，兩個或三個，三個香港賣七千幾，圖中為兩個賣五千幾，名師design喎！「家合居」見到有圓型兩個開價RMB2400，雖然平咗一半，但喺深圳買二千幾蚊盞燈好on居呢！！

座地花花燈＠凱悅燈飾（家合居C1037）﹣ RMB480（其實有D無聊。。。）

喺「家合居」出門口左邊個商場有間兩層好大嘅燈飾鋪，見到呢兩款燈都幾靚，簡約時尚FEEL，啱我！不過開價偏貴（仲話實價喎！）RMB1200

上個禮拜去完寶安北路之後打的去「又一居燈飾城」，十幾蚊就到，皇崗或羅湖去都係三十幾蚊，經過個停車場行入去就會見到！

喺二樓見到呢間嘢 ﹣ 「多姆斯」，佢D款好靚好特別，不過開價奇高！！Sales仲有D串添！！

呢盞太空燈超型超cyber！折咗都要RMB3800，唔係呀化！！？直徑70CM但得一個頭，即係得個樣囉，for decoration only！之後我喺淘寶揾到一間賣RMB985，即係話呢間嘢嘅議價空間非常大！

呢盞UFO燈又係超超超型！折咗又要RMB3900，又係得一個頭！！我北上之前已經喺淘寶見過仲念念不忘添，淘寶賣RMB1750！

另一傑作，承惠RMB3800！

TWINS燈for主人房＠金達萊照明（又一居燈飾城2010）﹣ RMB580
呢盞燈好似冇咩特別，不過唔知點解我覺得望落去好舒服，好柔和！

不規則7頭LED燈for飯廳＠金達萊照明（又一居燈飾城2010）﹣ RMB830
呢個款第二度冇見過，香港同大陸都冇，夠特別吖！仲要跟嚟全部都係LED膽，抵！


同場加映呢盞藍天白雲星星月亮燈，淘寶見到RMB216，可惜深圳揾唔到吖！唔係我一定會即刻抬佢走！！

揀咗咁多都未決定到買邊盞，下次上去又再揀過！

深圳傢俱建材之旅1 - 田貝四路「家合居」

原來幾個禮拜都冇寫BLOG喇！因為忙於攪裝修嘢，個個weekend唔係旺角就係北上尋寶，攰到爆呢！不過好充實呀！

由買樓到收樓呢兩個半月，時間真係過得好慢好慢。。。喺呢段咁漫長嘅日子入面，我地梗係襯有時間做定功課周圍揾吓裝修資料啦！又要平又要好，唔花多D心機時間邊得！北角，灣仔，旺角，九展嘅Design House，傢俬鋪都睇過吓，上個月專登走上深圳睇裝修料，好彩有細妹早兩年探過路，仲記低晒D資料，咁我地先唔使盲耍耍咋！今次由於時間有限，所以只係去咗田貝四路嘅「家合居」，下次先update其他地方嘅資料啦！

羅湖路線

去田貝四路，在火車站巴士站坐１號大巴，在田貝四路站下車，就是在家合居門口，車費RMB2.00。認住自己向邊度落車，回程向對面搭返 1號車，如果冇記錯，應該係中國銀行門口。

皇崗口岸路線

坐大巴去皇崗方便啲，都有巴士去田貝四路，357 號大巴，上左車會有個人問你去邊落車再比錢買車票，同佢講要去田貝，車費RMB2.00，佢會話你知邊到落車近，要搭十幾個站，車程約半小時。落車後繼續向前行，到路口轉右再向前行就見到家合居。架巴士中途經過寶安北路都有站可以落，不過我唔記得咗咩站！

我地當然選擇最方便嘅交通公具 ﹣ 的士啦！皇崗打的去都係廿幾蚊，喺正門口落，快靚正！

牛乸咁大個招牌實揾到啦！呢度就係田貝四路嘅「家合居」，一棟有三層，夠集中，又夠寛敝企理，第一二層都係賣磁磚，地板，門鎖，木門，浴室柜，浴屏，水龍頭花灑，廚柜，窗簾，地毯，傢俬等等，總之你up得出嘅建材都有！第三層全層都係賣燈飾，又平又多款！我地第一次去主力睇磁磚同燈，淨係呢個商場都行咗六個鐘，三點行到人地收鋪咁濟，真係過份咗呢～


門鎖

一去到上咗二樓，好多門鎖五金浴室用品，呢D房門鎖喺香港買大陸貨都要around $160，呢度RMB70-90，有D牌子平D RMB45都有，意大利造嘅都係RMB180！珠珠鎖（圓型嗰D）仲平，三十幾蚊都有！


因為我地個屋苑冇鐵閘，所以會用電腦鎖，一來安全D，二來靚嘛！Samsung SHS-6020呢度最平嗰間賣RMB1450（香港鋪頭賣緊最平嗰間二千八，爭千幾蚊喎！），佢話佢地係Samsung代理，係行貨原廠保養，不過因為Samsung唔係全球保養，所以壞咗要拎返嚟深圳整！我上網見到有人喺大陸買都話用咗OK，但諗諗吓喺大陸買電子嘢始終有一定風險，仲要係門鎖喎！用兩用壞咗或者比人爆咗就真係喊都冇謂，所以都係貴D喺香港買啦！

磁磚

原先諗住喺香港買磚，因為好似穏陣D，好似話香港有D大鋪會有QC check貨，花咗崩咗會退返比廠，同埋大陸D廠會揀D靚磚批比香港公司，自己去買嘅散客嗰D貨會渣D！但係話說回來，又見好多人自己喺大陸買磚都冇問題，我地上去睇磚時都見有香港人買完再補貨，都話quality好好，仲叫我地唔洗擔心！

二百幾蚊塊嗰D歐洲磚就買唔起啦，就算喺香港我地都係睇大陸貨，我地間屋以灰白色為主，所以磚都係揀返白中帶灰嘅啞身磚（光身太酒店FEEL啦！）24" x 24" 喺香港見到最平嗰間HKD58，大陸RMB25-28，平成半喎！一模一樣，大家都話係新貨啱啱返，產地都係佛山，牌子就唔記得喇！

下面嗰隻半拋光橫紋磚喺香港已經睇中咗，諗住用米白色嚟鋪浴室牆，12“ x 24" HKD48，「家合居」呢度RMB14，三分一價錢！！上面嗰隻白色波浪紋RMB18！

原本我想用光身磚做浴室牆，因為我實在太太太論盡！住咗間屋廿幾年都可以成日撞到D枱角，枱腳，櫈腳，門，門框，門鎖。。。總之就乜到可以撞一餐！所以安全起見，用光面滑身磚，就算撞親都冇咁傷嘛！仲有容易D打理，冇咁易積污糟嘢！呢個鱷魚紋都幾靚吖！12" x 24" RMB9，香港賣HKD16，不過諗諗吓日日同條鱷魚一齊沖涼，咦。。。都係唔好喇！！

呢類仿古磚睇落就grand好多，冇光身磚咁“娘”，喺大陸真係好多款（雖然香港都好多），不過呢度真係平好多，間間價錢爭少少，有時間可以逐間問吓格吓價，十幾至廿幾蚊都有！如果要切斜邊每條加RMB1.5，不過我覺得越睇越似商場FEEL，所以又要睇吓先！

最後喺地下嗰層見到呢款特色牆，方型粒粒嗰隻24" x 12" RMB25，整喺沖涼花洒位，仲有洗手盆柜同鏡柜中間，其餘地方襯返隻淨灰色磚24" x 12" RMB18, 普通灰色磚有好多，有D仲平D，不過襯嚟襯去都係佢呢隻灰色最靚！

浴室地下用呢隻深灰色磚，有少少紋同閃閃地，實物深色D，襟污糟嘛！24" x 12" RMB12，香港買一半size 12" x 12"都要HKD15，淨色only冇紋冇閃！！

計返喺大陸買磚始終平一截，磚價大約都係香港一半價錢，運費RMB250/噸，一噸已經夠鋪晒一間四百尺嘅屋，買埋其他嘢仲可以夾埋一齊集運添！出貨前如果有時間可以自己上去check check d磚先，睇吓有冇錯或少咗，送貨時一般送到樓下，可以叫裝修師父搬上樓！

木門

因為我地屋苑唔準換大門（要申請），所以我地只係睇咗空心木門for房同厠所，木門連門框RMB850，運費RMB80-90/pcs，計返港紙唔係平香港好多，大陸仲要得好少款（冇問可唔可以來圖造），D料又好似好渣好薄，同埋有人話大陸造D門框可能唔FIT位裝唔到，又話如果冇做防蟲可能會有蟲蟲同白蟻，用落一年半載先走出嚟，到時揾人返嚟滅蟲要幾千蚊，真係得不償失！！

洗手盆櫃＋鏡櫃

香港買洗手盆櫃同鏡／鏡櫃係分開計，細size嘅洗手盆櫃都要二千幾，我地想做三尺大D要三四千，鏡櫃都要二千幾，加埋成五六千啦！香港通常都係得佢地display嗰幾款，size又唔多！大陸就好多款，任你點造都得！訂造係一套套計，我地唔要枱面盆（即枱上面加個dull dull洗手盆），要下面呢隻成個大嘅洗手盆連枱面，因為方便清洗，洗面時又唔使滴到D水周圍都係！

呢款RMB2100／套，我中意塊鏡大D，側邊有個櫃仔放嘢，顏色款式都可以改！仲有大陸D洗手盆櫃興吊腳（唔知係咪留返個位嚟放痰罐），如要做到落加RMB300，一般約兩星期起貨，可跟磚或其他嘢一齊集運落香港，如獨立運加百幾蚊！

呢個鏡櫃設計好正，左右兩邊門係向入面開，三塊鏡加埋就可以照埋後尾枕！RMB2400／套，都係落地加RMB300！

呢款喺catalog見到，個款簡單得嚟又特別，啱晒我STYLE！有黑白兩色，RMB2800／套，包落到地！

浴室用品

呢度有好多賣浴室用品，水龍頭花灑毛巾架呀嗰D，不過我覺得都係喺返香港買來佬嘢好，鋼水好D冇咁易生銹嘛！浴屏更加喺香港度尺造啦，造得唔好漏水點算！！馬桶大陸都有好多款好靚，不過都係香港買穏陣！！

窗簾地毯

窗簾冇乜點睇，因為羅湖商業城同東門都好多，再唔係旺角花園街買都好平，屋企附近嗰D鋪頭都唔係好貴！我地屋企D窗唔係好大，所以買晒全屋窗簾應該唔會好貴！地毯就最緊要啱色啱款同質地靚，應該都唔會大陸買，因為見佢都係淨色多，有pattern嗰D都唔靚！！

牆紙我喺香港一見鍾情嘅馬毛牆紙呢度問咗兩間都冇，見佢地大部份都係來佬牌子，價錢都比香港貴少少！有人話大陸好多款香港揾唔到，價錢又平，我諗應該係講國產貨啦！因為香港賣嘅一係歐美貨，次一級就日本韓國，再唔係就馬來西亞，絕少係大陸貨！大陸貨就唔敢買啦，到時發毛變色生虱點算！！？

傢俬廚櫃

「家合居」都有好多間訂造傢俬廚櫃，我地唔使裝修廚房所以冇乜點睇廚櫃，不過見display出嚟嘅款同料都幾靚，價錢一定平香港好多！訂造櫃大概RMB1000/平方米（香港計平方尺），即係香港三分一價錢（未計運費），我地喺「家合居」冇仔細睇櫃，因為有朋友仔喺「五方家居裝飾材料廣場」訂造，我地都係諗住去返嗰邊先睇，可惜今次唔夠時間去，唯有下次啦！

洗手盆櫃
舵牌衛浴（A2045）
粵寶建材（A2050）
丰雅裝飾材枓（A2009）

磁磚

馬可波羅磁磚（A2035）﹣ 中國十大名牌，好多香港人幫襯，感覺穏陣D，sales亦好老實同nice
深圳市興和達建材（A2031）﹣ service麻麻，開價偏貴
深圳市新輝建材（A2005）﹣ 嬸嬸好落力，helpful得嚟唔hard sell

合盛建材（A1025）﹣ 多款service好，都係多香港人幫襯

下篇先post燈飾，揀到頭痕埋！！！