買樓呢個topic嚟得好突然！因為我地一心諗住租樓結婚，等結完婚一兩年後睇吓樓價會唔會跌返D先買！點知包包突然轉軚，話覺得租樓等於同人供樓，租金分分鐘仲貴過供樓嘅錢（都唔係而家先知啦！），所以佢單方面堅決唔租！如果問我，我都覺得租樓係on居！租金貴地方細，住一輪又要搬，又要執嘢，我最怕煩嘛！不過你話而家買咩，又好似好唔抵咁，睇住個樓市由年頭到而家一路係咁升，真係買唔落手，家陣講緊幾百萬買層樓唔係幾百蚊買件衫呀，買咗就供一世！！但都係嗰句啦，“早買早享受” 嘛！唉。。。如果包包肯同佢屋企人住多一年半載，等結完婚先慢慢揀樓慢慢攪裝修，咁幾好呢！人地就話同屋企人關係唔好，或者屋企細，冇得痴屋企住啫，佢有得揀有得痴都唔痴！係要揾我嚟攪！同一時間要我攪晒兩個人生最大嘅project，真係跳樓都唔掂啦！
呢一個月嚟我地個個星期去睇樓，港島東（我地住開，但貴到冇朋友！），九龍灣（近我細妹有照應），將軍澳（樓價平DD又唔太遠）加加埋埋都睇咗三十幾個盤，本身上星期都睇到一個盤幾中意，但我地都未tune到自己嘅心態同計掂條數，諗咗兩日啫，轉個頭它已走了。。。而家盤少客多，再加上我地都係睇上車盤，所以真係供不應求，手快有手慢冇！！其實我地要求都唔係高（資金所限嘛！），三百幾萬要以下條件都唔係過份吖！但原來以而家個市價都好難揾囉！
1. 交通方便，有巴士小巴撘，行到去港鐵站唔使轉車，又唔好太遠我娘家！
2. 周邊環境企理舒服，唔好太近大街，街市之類
3. 觀景少少開揚，唔需要什麽背山面海（我地都買唔起！），總之唔好樓望樓或者對住條街，望出去舒舒服服就得啦！
4. 唔需要有裝修，因為我地都會大裝！除非廚房好新好乾淨可以唔整，因為我都唔會用！
5. 要屋苑唔要單揀樓
6. 唔需要太高層，中層十幾樓以上已OK！
7. 唔需要新樓，樓齡十幾年，最盡廿二三都OK！怕太舊第時有機會換樓好難賣！
8. 兩房五百幾尺都夠住，第時生埋B迫迫地都OK啦！
經紀又幫我地揾咗兩個盤，聽日去睇，如果OK就會即時confirm！費事諗兩諗轉頭又冇咗或者業主反價唔賣！上次買唔到我個心乸咗幾日呀！久違了的失戀滋味。。。
GOOD LUCK to me!!!
初初我同男友都諗住買，睇睇下個巿升升升咁，而家又縮沙話租喎。雖然我都覺得係十分ON居，但都冇辦法，呢D大決定，我都係留番俾阿男人話事罷啦！~~~
回覆刪除希望你快D搵到心水樓啦！~~ 加油呀！明天努力講價啦！~~~
[版主回覆05/15/2012 17:51:33]講唔到價呀！不過最後都買咗！^^
要搵到心水的樓盤需要不少心機, 希望你們盡快找到~~~
回覆刪除[版主回覆05/15/2012 17:51:52]多謝！最後都揾到了！
呢個真係一個超大超煩既project呀.....
回覆刪除我男人就話想再睇下遲少少梁特首上左場之後樓價會唔會再算>"<
[版主回覆05/15/2012 17:53:08]我地都有諗過等呀梁特首，不過唔覺得佢可以做D咩，又唔知要等到幾時。。。
我同你一樣咁煩...不過好好彩都攪掂左~你都要加油~
回覆刪除[版主回覆05/15/2012 17:54:23]攪掂咗就好啦！我地而家先開始咋。。。
我都想買樓 (但個市咁顛, 真係買唔起)
回覆刪除感覺比租屋住, 似建立自己的小家庭
同埋我男人打算租, 買樓呢個 item 已放棄 ><
Good luck to U!!
[版主回覆05/15/2012 18:03:34]多謝！最後都係買咗。。。
有三百幾萬budget已經算唔錯啦, 應該都有選擇既~
回覆刪除藍田, 將軍澳, 九龍灣都係唔錯既選擇呀~
唔好咁心急~有時買樓都講緣份既~加油~^^~
[版主回覆05/15/2012 18:04:28]多謝！最終都買咗，唔算係最中意，不過都OK啦！