MUA - Gipsy Confirmed!!

等咗個幾月終於都等到尋晚試妝喇！之前幾日都好擔心，唔知試咩頭好，皮膚又唔聽話，生粒粒之餘仲變埋潤腸咀，咀唇邊又紅又甩皮，好彩食咗幾劑中藥好返D咋！

我地七點去到Gipsy喺太子嘅workshop，成間都係白色田園FEEL，有少少香薰味同音樂，好似去咗做SPA咁，感覺幾舒服！一開始助手阿希就幫我做facial機，碌面同眼，碌咗成九個字！唔知係咪心理作用，做完之後覺得白咗膚色均暈咗！（一次就work咁神奇！？）Gipsy話我個眼袋好嚴重所以再碌多幾吓（我夠知啦！），佢D skin care同支碌眼捧捧都係LA MER呀！堅係貴嘢！我都心郁郁想買返SET嚟試吓！

Gipsy幫我上妝，阿希幫我整頭，佢地速度唔算特別快手，不過個底妝真係貼到不得了！黑眼圈眼袋已經算做遮得好好（同佢地講BYE BYE係冇可能的，因為係死症！），眼紋都唔係好覺，Gipsy冇幫我用雙眼皮膠紙，佢話我眼皮太重"long"唔起，所以用膠水輕輕痴一條線，自然啲，又唔會睇到條膠紙。但對於我嚟講好似唔係好work，改善唔到大細眼同多層眼皮問題，但睇落比較自然係真嘅！

第一個褂頭冇乜特別，我淨係話頭頂要set高少少，但出嚟效果唔係好覺！

後面個形都做得唔錯，以我咁短頭髮又乾又行又唔齊，做到咁都算OK啦！

呢個spiral fringe我最中意，真係冇諗過自己可以做到！因為我面濶鰓骨大，平時左右兩邊面絶不能露出嚟，但又估唔到原來都carry到呢個頭喎！Gipsy話因為我個額唔夠濶，所以頭頂加濶D都可以改善到，唔一定要放頭髮遮住兩邊，又好似係喎！

側面睇都幾型吖！

菲比小妹入咗鏡添！

呢個婚紗頭本來係想大突破整個all-back頭，但真係唔得囉！老咗冇十年都有八年！唯有夾硬忟返兩條頭髮落嚟遮吓醜，結果成件事唔同晒！

原本係想整呢個style，但完全唔啱我，改良咗之後都係唔得！灰咗！

原本試妝係兩妝三頭，最後Gipsy話幫我整個佢覺得最襯我嘅頭，就係以下呢個喇！有D日本FEEL，唔係我嘅Style不過又幾靚喎！

試妝total試咗成四個鐘，最後Gipsy仲print埋佢幫我影嘅試妝相做record添！幾體貼呀！

總括而言，Gipsy化妝係自然得嚟又sharp，化完出嚟都係你個樣，唔會一味大眼誇張，set頭係有style嗰隻，會幫你諗點樣改善你嘅面型等缺點，我覺得呢種sense比technique更重要！雖然試妝時唔係所有嘢都100分，不過以Gipsy嘅經驗同sense，big day嗰日肯定冇問題！我只係擔心自己到時諗唔到整咩造型咋．．．Big Day前兩個月要send e-mail問佢拎份image資詢資料，最少一個月前再send返比佢做份image report，內容可以改一次，之後再改就$200一次．

最後梗係confirm咗啦！$880試妝喎！不過都真係GOOD嘅！因為未知book唔book到伯大尼，所以Gipsy建議我hold咗早晚先，到時confirm咗先再upgrade，佢一般中間時間唔會咁早比人book，咁就GOOD晒啦！不過我諗最後都係會full day pkg多，因為就算book唔到伯大尼都會去影外影啦！算啦！呢D錢唔慳得！