Day 1-2 梵蒂岡聖彼得大教堂，羅馬鬥獸場，君士坦丁凱旋門，許願泉

開心嘅時間總係過得特別快，12日歐洲蜜月之旅眨吓眼就過咗啦！個人返咗嚟十幾日，但個靈魂仲未返呢！好掛住歐洲悠閒寫意嘅生活呀！！

我地結婚第二晚即飛啦！KEEP住個MOOD嘛！因為夜晚23：45機，所以都夠時間還衫回門，夜機仲可以訓覺又慳時間，GOOD！！撘咗13個鐘頭機去到倫敦希斯洛機場，仲要轉多程機先到羅馬呀！！

嚟到都夠鐘食lunch lu！今日午晚兩餐都係呢間中菜館，老闆係香港人，D嘢食都OK啦，唔難食囉！

餐廳附近嘅街景～

教堂，週圍到係～

坐車途經嘅意大利舊城區，好有特色吖！

好大雨呢。。。

終於都到咗旅程嘅第一個景點，梵蒂岡 - 聖彼得大教堂啦！！嘩！好宏偉呀！！個廣場好大好靚呀！！本來都仲有D眼訓，嚟到成個人醒晒！！

好彩我地早一日到，因為第二日就係新敎宗登機之日，世界各地嘅總統都會嚟觀禮，大教堂前面排好晒D櫈就係比佢地坐啦！如果我地聽日先到就唔會入到嚟lu！！

聽日新教宗就會喺呢塊紅布度行出嚟啦！


呢棟嘢最高嗰層右邊第二個窗，歴代教宗都係住喺度，佢地嘅Home Office呀！

聖彼得廣場中嘅方尖碑～


歐洲嘅雕塑真係好靚，如果好天仲靚呀！！

入教堂之前要行過呢D石柱，仲要過X-ray，不過流到爆！同埋排隊入去小心鬼佬打尖！唔係強人先會打尖，D鬼佬都好勁呀！！

一入到去，真係覺得好宏偉呢！！

嚟返張合照先！！

好多畫像，近睇會見到好似馬賽克咁由一粒粒石仔造成！

好多唔同嘅雕塑～


貝尼尼設計嘅講壇～

最中意佢D巨型長柱加圓型拱頂，靚到吖！！


手執天國鎖匙嘅聖彼得像，個個行過都模吓佢隻腳，我都唔蝕底模吓先！唔好影咁耐，會比食蕉趕你行呀！

呢個牌上面嘅應該係歴代教宗嘅名，我梗唔知佢地係乜水啦！！

教堂門外有瑞士守衛看守，都幾靚仔吖，個造型好鬼得！！

第二站係羅馬鬥獸場同君士坦丁凱旋門，太陽伯伯出來了！YEAH！！

睇相就睇得多，終於都嚟到喇！睇我幾興奮！！


我要同你決一勝負！！

君士坦丁凱旋門梗係比巴黎嗰個細啦，不過都幾靚吖！意義相同，都係為咗慶祝士兵凱旋歸來而建！

第三站係許願泉，好靚不過好多人！D人坐晒喺池邊度HEA。。。小心好多額頭鑿住“我唔係好人！”嘅人喺度行嚟行去，有時又會行埋嚟問你要唔要幫你影相，唔收錢喎！我就梗係唔會采佢地啦！

咁遠嚟到梗係要許返個願先啦！！我地冇EURO散銀所以用港幣，嘻嘻！攞個意頭啫！

許願泉隔離條街好多賣嘢同食嘢嘅鋪頭，都可以行吓！不過好多人，小心賊仔呀！！

手信來來去去都係嗰D！

PIZZA好大件，不過呢D唔係正宗意大利PIZZA，正宗嘅餅底好薄同冇咁多料，呢D應該係改良過為咗迎合外國遊客口味！


Gelato好好味好滑，我梗有幫襯啦！！呢間門口好大個招牌寫住“ICE﹣CREAM”，我唔知係咪特別好食，不過佢有免費厠所提供！唔幫襯都可以借用，哈哈！

天黑喇，食飽飽就返酒店啦！（D嘢食賣相不佳所以唔POST啦！）意大利嘅鋪頭好早收，六七點就關晒門，想玩夜D都唔得！早D返去休息，抖足精神聽日再玩過！！