Day 9 布魯塞爾大廣場，小英雄銅像場（比利時）, 阿姆斯特丹（荷蘭）

原來已經個幾月冇打過BLOG喇！之前發生咗D事，公司又好忙，個人好攰冇咩心機，襯呢排得閒返少少，等我快趣趣完成埋個Honeymoon後記先！！

上次講到去完Paris，真係好唔捨得呢！雖然仲有幾日行程，但感覺上個trip好似要完結咁。。。下一站係由巴黎去比利時（Belgium）嘅首都布魯塞爾（Brussels），車程要成4個鐘呀！！一早出發就梗係瞓啦，瞓醒又落車lunch啦！哈哈！

呢度成街都係單車，馬路上都有單車線，上落車都要睇清楚有冇單車先！

後尾嗰幾日都係食中餐，唔開心囉！


食飽飽就去行街街啦！首先去睇布魯塞爾好出名嘅小英雄銅像，又名賴尿童像！！

賴尿童像耐不耐就會換吓衫轉吓造型，好攪笑！


附近好多賣朱古力嘅鋪頭，最貴嘅有Godiva，香港都大把啦！使鬼咁遠買返嚟！

導遊推介呢間又平好好食，見佢自己都有買，咁梗要買返D做手信啦！仲有得試食添！！

好多賴尿童像嘅朱古力，不過見到都唔敢食！！


好多款揀呀！！


行過兩條街就係布魯塞爾嘅大廣場啦，周邊嘅建築物都好靚，不過我地去嗰日好大風好凍！好天嘅時候應該有好多賣手信嘅攤檔，側邊應該有好多人high tea～

布魯塞爾市政廳～

布魯塞爾分開新舊兩部份，舊區有皇宮，政府機構等好有特式嘅建築物，新區係商業區，有乜特別！


路過見到嘅教堂～


新區嘅歐盟總部～

我地只係途經Belgium所以只係stay半日，夠啦！感覺上Belgium唔太乾淨，D人樣都冇咁nice，行過就算lu！出發去荷蘭喇，好奇怪，呢度水位好高，有時甚至會見到條河高過陸地，咁咪好易水浸！？？

見到風車喇！！！


Amsterdam阿姆斯特丹好多人踩單車，呢度比人嘅感覺好舒服，好似一個寧靜嘅小鎮！

好靚嘅日落，不過傻機影到黑忟忟～


又係鐘樓～


有個樂園仲有摩大輪添呀！！有得睇冇得玩！其實都真係冇人幫襯！！

D樓全部迫埋晒一齊，揾條“喇”都冇！


以為有得坐船仔，原來聽日先坐，因為開始天黑啦，同埋好鬼凍，行陣就食飯啦！！

我地去紅燈區食中餐，好可惜只係行街食飯，冇飲“咖啡”囉！紅燈區有好多酒吧，coffee shop，金魚缸，不過品流複雜唔敢影相，導遊話比人發現會沒收相機，唔係講笑！！不過金魚缸D女仔真係靚到不得了！個個都樣靚身材正！！唔怪得Amsterdam會被男性遊客選為全球十大擁有最多美女的城市第一位！！

自費荷蘭啤酒～


餐廳出面好多賣嘢嘅鋪頭，大部份都係同色情或者大麻有關嘅，睇吓都幾得意吖！

大麻珍寶珠，唔知好唔好味呢！？？


今晚間酒店好大好靚，真係一晚比一晚好！！