派帖啦！！

用咗兩個weekend嘅時間，有細妹同包包幫手，終於攪掂晒D帖啦！！

因為唔想“晒”幾千蚊喺出面印帖，睇過又冇咩款特別中意，靚少少嘅都要十幾廿蚊張，印三百張好貴呢！！所以最後經過一輪掙扎都係決定用返酒樓送嗰D算！我唔LIKE粉紅色，紅色又好似好娘，所以揀咗米白色嘅西式款，可能好多老人家都唔中意，但我媽咪同未來99都話好靚喎！哈哈！因為佢地都係新潮媽咪嘛！！

帝廷service都唔錯，有個姐姐專門負責攪印帖，DVD，海報嗰D嘢，唔使自己拎出去攪，比晒資料佢就會自動波安排！開頭話要三星期，最後個幾星期就起貨啦！多咗D時間加工同印帖封，正！！

我地預擺三十一圍（而家可能又唔止啦！），佢比咗380套我地，使唔使咁豪呀！！回禮利是封都包埋，又慳咗！！兩大袋！！包裝得幾好，冇縐冇爛冇污積！

準備開工！要入餅咭，入回禮利是，ZIP張牛油紙入帖度，仲有痴閃石呀！！

其實張帖本身都幾靚，不過好似話好多用人，所以我就做D加工，希望佢會特別少少啦！我用咗之前整立體字母嗰D閃石貼上張帖D花花度，即刻SHARP晒！（不過呢張相影唔出個效果。。。）

我仲自己印埋伯大尼個地圖，加埋上車時間添！幾體貼呀！！

戲肉到啦！喺淘寶買咗個熱風槍，金色凸粉，囍字印同我地嘅wedding logo印，咪就係整凸粉LOGO囉！封面加個囍字，開頭諗住用紅色印台，諗住加少少紅色喜慶D嘛！但睇落怪怪地咁，都係用返金色順眼D靚D！

首先用個有膠水嘅印台，印個LOGO落帖封度（膠水要平均，太多太少都唔靚），然後灑D金色凸粉上去（灑多D，要蓋過晒D膠水，多咗可以輕輕力拍返出嚟），再用個熱風槍吹一陣，你就會睇到D金粉變令咗同凸起咗，好靚好好玩呀！！

睇吓包包幾比心機喺度吹呀吹！

YEAH！大功告成啦！前面加咗喜字，呢個係朋友版，英文名加個花紋外框，靚晒！

後面仲靚呀！因為有我地個wedding logo嘛！！


包包入帖好快手呀！！

攪掂！可以開始派帖啦！呵呵！


之前印帖封時研究咗好耐都唔知應該點寫，特別係親戚嘅稱謂，以下呢個網址係解釋得比較全面同清楚嘅，大家可以參考吓！^^

http://blog.yam.com/hellomimi_yblog/article/5469644

過大禮 - 落訂了！

上星期日1/27終於落訂了！

其實我媽咪好簡單，只要求買籃生果同少少海味，花膠一定要！因為係我同媽咪嘅至愛！！禮金唔少得啦，幾多都冇特別要求，我諗同細妹嗰時咁上下就OK！其他嘢就包羅萬有利是攪掂！誰不知未來老爺話一定要椰子喎，咁我禮貎上咪問埋未來99有乜要求囉，點知佢乜都唔知話要問未來姑奶，一問就出事啦！Send咗個表嚟，除咗魚同雞同海味之外乜都要齊！OMG...咪去立興買囉！慳得就慳嘛！！而女家嗰邊就唔攪啦，全部用利是代替！

過大禮清單
	傳統版	我的簡化版

禮餅：	嫁女餅八個 龍鳳禮餅兩對 其他唐餅及西餅以餅咭代替	龍鳳餅兩對＋唐餅咭及西餅咭
海味：	髮菜(不可缺)，其他可選的物品包括：鮑魚、蠔豉、元貝、冬菇、海蔘、魷魚、蝦米、魚翅及魚肚等。	髮菜，花菇，花膠，罐頭飽魚
三牲：	生雞兩對，兩雄兩雌（代表兩家父母） 豬肉三至五斤，起雙飛（即一片相連開二）（代表家肥屋潤）	包羅萬有利是代替 (雙封)
魚：	大魚或鯪魚兩條，取其有腥（聲）氣	包羅萬有利是代替 (雙封)
酒：	洋酒及米酒各兩支	4支VSOP
椰子：	兩對（代表有爺有子）	立興禮籃
四京果：	荔枝乾、龍眼乾、合桃乾及連殼花生	立興禮籃
生果：	一籃(每種生果要四個)，取其生生猛猛之意。	一籃，不要梨，芒果和瓜
茶葉：	茶葉兩罐	立興禮籃
帖盒(禮金盒)︰	檳榔兩對、紅頭繩、青縷、扁柏、利是、禮金、飾金、龍鳳燭兩對及男女家對聯各一對 蓮子、百合、紅棗、紅豆、綠豆、芝麻＋四京果	立興禮籃＋另買扁柏
上頭用品：	男女家各一份	立興
帖：	已入好的喜帖	女家部份
女家回禮
回禮	男家送來禮物的一半 其中必須包括茶葉、生果、扁柏及利是	OK
回禮金及檳榔：	回禮金、及檳榔三個（自留一個，意即一郎到尾）	OK
回禮籃：	蓮藕、煎堆、鬆榚、大發、芋頭、薑、石榴各一對	包羅萬有利是代替 (單封)
賀帷巾：	賀帷巾	包羅萬有利是代替 (單封)
女婿金：	長褲(長命富貴)、皮帶(腰纏萬貫)、銀包(內置利是)及鞋一對(同偕到老)	利是代替 (單封)
利是兩封：	「百年好合，永結同心」及「五代同堂、百子千孫」	OK

過大禮前一日同埋包包喺男家PACK定嘢，唔係佢一定會執漏／錯啦！信佢唔過呀！！冇諗過夾夾埋埋有咁多嘢囉！一張枱都放唔晒！！

立興個禮籃，對椰子好大個好靚呀！油咗金色面，自己貼埋張囍字，靚晒！

呢個係立興禮籃包埋嘅禮金盒，又係勁靚！要自己摺嘅，對我嚟講當然冇難度啦！摺起咗之後好紅好SHARP呀！！留返佢第時唔知可以用嚟放咩呢！？
入面放咗禮金，利是，餅咭同龍鳳鈪，對龍鳳鈪好大好靚呀！！要保持神秘感唔好影相住！！


喺奇華訂龍鳳餅時HOLD埋呢兩個禮盒，好大好重，不過好靚好有特色！！Highly recommend呀！！影相一流！
本身應該用嚟放唐餅，但我地冇拎唐餅用餅咭only，個盒就用嚟放海味， 一樣咁GOOD！！


仲有唔少得嘅生果籃，揀咗八款生果，有D兩個，有D四個，有D八個，總之就要雙數啦！唔要梨，芒果同瓜，三樣我都中意食，too bad!!

當日十點幾包包嘅家姐同舅母兩個人嚟，我就同嫲嫲媽咪三個人坐陣，爸爸一早閃走咗啦！怕唔知講乜尷尬喎！笑屎我！！半個鐘唔使攪掂走人！！

Save The Date Card

之前太無聊，見好多bloggers都有整Save the Date card，我諗住放喺Facebook event invitation，所以梗係唔執輸整埋一份啦！仲整咗十幾款添！！貪心到呢！！

最受歡迎嘅應該係呢幾款，又colorful又繽紛又開心!

呢款因為有黃色所以好中意！

黑板。。。好有校園puppy love嘅FEEL！！不過我地唔係喺學校識呢。。。


浪漫型格風（啱我！）

再型D！


再浪漫D！


Sweet sweet嘅都有。。。

呢張完全睇唔到D字咁滯，不過加咗D黃白色嘅葉又好襯個海灘好靚喎！重點係。。。Facebook event張相咁鬼細根本乜都睇唔到，就揀呢張啦！！呵呵！！

有興趣嘅朋友可以到以下網址試吓整，揀template，輸入名同日期，upload相，攪掂！勁易整！！
http://www.weddingpaperdivas.com/shop/save-the-date-cards.htm

婚禮進度表 - 倒數2個月

得返2個月咋! 婚期越來越近, 越來越緊張, 雖然呢個幾月都做咗好多嘢, 但都仲有好多嘢未做!!

今個月27號過大禮, 要快D攪掂D帖先得! 仲要見律師, 婚紗定款, 做埋個image report比Gipsy! Candy corner同DIY deco D嘢都未有時間攪!!! 二月頭仲要做公司Annual Dinner MC, 真係三頭六臂都唔掂呀!!!

Yuki & Kenneth’s Wedding Ceremony – 16 March 2013 (Sat)
進度表 - 16 Jan 2012 (倒數2個月)
註冊 & 婚宴
出門地點：	嫲嫲屋企
註冊地點：	伯大尼
婚宴埸地：	北京道一號帝廷
結婚戒指：	六福, 已取
證婚律師：	岑漢和律師 (First meeting on 20 Jan 2013)
結婚證書封套：	律師提供
佈置：	Firenze Wedding Workshop
音樂：	TBC
戒指枕：	律師提供
羽毛筆：	律師提供
MC：	Handsome + 車
回禮小禮物：	未必整
結婚蛋糕：	帝廷送8磅
席前飲品小食：	帝廷提供
紅酒 & 烈酒：	已買5箱紅酒，白酒烈酒未買
Reception - 座位表：	TBC
Reception - 簽名布：	板橋費加洛婚禮 + 帝廷提供
Reception - 簽名筆：	TBC
Reception - Welcome Board：	Hei Hei Wedding
Table Card：	TBC
啤牌：	已買8副＠筍崗
兄弟姊妹團
伴郎：	Davis
伴娘：	Kelly
兄弟團名單：	Handsome, Bon, James, Vincent, 糖仔
姊妹團名單：	車, Avis, C, Phoebe, Ning
兄弟姊妹聚會：	TBC
禮服
新娘 - 裙褂：	褂皇@錦發
新娘 - 婚紗：	Elegance x 2 (1/24定款)
新娘 - 晚裝：	Perfection x 3 (已定款)
新娘 - 褂鞋：	已買＠筍崗
新娘 - 婚紗鞋：	淘寶
新娘 - 晚裝鞋：	已買@Topicks
新郎 - 禮服：	VA x 3
新郎 - 恤衫：	VA x 3
新郎 - 皮鞋(黑+白)：	已買@Jusco + 荷里活
媽咪衫(晚裝)：	玲瓏 x 2 (1/24定款)
奶奶衫(晚裝)：	顯卓 x 2 (已hold)
爸爸禮服：	華利高男仕禮服
老爺禮服：	俊雅禮服
伴娘裙：	Inezitar Production Co., Ltd.
姊妹裙：	Inezitar Production Co., Ltd.
兄弟bow tie：	淘寶
頭飾：	Perfection及Gipsy提供
Girdle：	已買girdle & nude bra@GLC
MUA
新娘化妝 & 造型：	Gipsy
媽咪, 奶奶化妝：	Gipsy's team
伴娘化妝：	Gipsy's team
姊妹化妝：	自己攪掂
Gipsy Image Report：	TBC
禮儀
過大禮日期：	2013-1-27
過大禮用品：	已買＠筍崗
禮金：	已準備
西式喜餅：	已買160張＠美心 (後加50張, total 210)
中式喜餅：	已買52張＠奇華
龍鳳被 & 床單：	已買@Casablanca
金器/ 嫁妝：	已買
囍字貼 & 對聯：	已買＠筍崗
男女家上頭時間：	2013-3-15晚
男女家上頭用品：	已買＠筍崗
男女家上頭睡衣：	已買＠筍崗
老公老婆拖鞋：	已買＠筍崗
好命公：	未來外父
好命婆：	My lovely mama
接新娘 - 綵球：	已買＠筍崗
接新娘 - 遊戲道具：	TBC
接新娘 - 愛的宣言：	TBC
接新娘 - 開門利是：	TBC
敬茶 - 茶具：	媽咪珍藏 + 未來姑奶’s
敬茶 - 紅棗蓮子：	未買
敬茶 - 跪墊：	已買＠筍崗
出門 - 紅傘：	已買＠筍崗
出門 - 米&紅豆：	已買＠筍崗
回門乳豬：	帝廷提供
利是封：	已買＠筍崗
囍帖
囍帖：	已收貨by帝廷，加工中
信封：	已收貨by帝廷，加工中
封口貼紙：	已買＠筍崗
回禮利是：	帝廷提供
婚照 & 攝錄
當日攝影：	Luster Angle
成長片段 / 早拍晚播：	Luster Angle
Pre-wedding by MonaLisa：	2月已拍，6月已收相
Pre-wedding by 板橋費加洛婚禮：	4月已拍，6月已收相
其他
鮮花球：	秋子花藝
絲花球：	Jack Jack + Phoebe’s
主禮人襟花：	秋子花藝
兄弟襟花：	秋子花藝
姊妹手花：	秋子花藝
主花車：	1999長長久久
24座van：	1999長長久久
旅遊巴：	TBC
花車公仔：	已到港，加工中
花車佈置：	TBC
兄弟姊妹分工表：	TBC
工作人員Contact list：	TBC
賓客名單：	TBC
Rundown：	已draft
Check list：	已draft

我的婚鞋

一共有三對婚鞋，第一對係晚裝鞋，上年過年前減價買落，因為最初揀咗件前短後長嘅晚裝，所以好心急要買對靚靚嘅高踭鞋襯佢，點知最後冇揀到嗰件晚裝，因為前短後長太型啦！Big day著好似唔係好幾好。。。呢對鞋HK影pre-wedding時著過，高得嚟都幾穏陣，係後面有少少刮腳，痴定膠布應該冇問題！個閃石裝飾可以拆出嚟，夾喺鞋頭都得！


第二對係緍紗鞋，淘寶見到一見鐘情！實物同相一樣呀！！LACE同手工都好靚，絕對唔似CHEAP嘢！前面有platform好穏陣，係硬咗少少，著得耐有機會腳痛。。。諗緊買唔買過對，不過呢對真係好靚好中意呀！！


實物好靚，不過我影得好黑！


第三對梗係褂鞋啦！好想買先達商店嗰對金色褂鞋，全人手造，真係好靚，襯褂皇超正！！可惜金色佢得平底冇踭，訂造都唔得。。。揾咗好耐都揾唔到有金色褂鞋，放棄！唯有買返對傳統紅色褂鞋算啦！反正都係著一次！！

最後咪喺立興攪掂咗囉！！最傳統嘅紅色龍鳯褂鞋，承惠RMB35，淘寶都要成四十蚊呀！抵到吖！！

立興喜慶掃貨

星期日北上去咗筍崗立興掃貨，差唔多買齊埋結婚同過大禮D嘢啦！本來諗住淘寶，但揾咗好耐都揾唔到一間有齊晒所有嘢，同埋始終都係睇過摸過先買安心D！

而家除咗立興之外，鵬鵬同飛翔都開始出名，呢兩間價錢平少少，不過好似話選擇冇咁多，最重要係佢地冇賣過大禮籃！香港最平都要＄388，立興賣238人仔，計落都平成九十蚊，加埋其他林嬏嘢就差幾舊水啦！！所以上去行一轉，食埋飯，當係weekend嘅一個節目，幾GOOD吖！

我地慣例喺皇崗打的去（但其實羅湖會近少少），三十蚊，如果撘地鐵只係三個站，不過要行幾條街喎！咪攪！！
去到寶安北路，成條街都賣晒過年嘢，好有氣氛呀！！

我地本身去第一分店，即係文具批發市場最多人去嗰間，去到佢地話帶我地去新鋪，今年先開所以冇咩人知，好寬敞好舒服，唔使同人迫！D嘢又好齊整，店員一路帶住我地行逐樣執，揀啱佢就放入籃落單，基上係唔會買漏嘢！

好多喜字貼好靚呀！由幾蚊到十幾蚊都有！絨布嘅都有分唔同級數，！

開頭仲諗住冇咩買，五六百蚊都攪掂，點知最後都買咗RMB720，店員都唔肯減價，之前有bloggers話要逐樣講價嘛，佢直頭唔啋我囉，次次都話佢地已經係最平，到最後埋大數先平得七蚊雞！同埋送咗兩包利是封同mini喜字貼，孤寒到呢！！

下面就係佢地張新咭片，多咗第一行“總店”！